9
Ema Gibeon bosok Josué
1 Liurai sira husi mota Jordaun parte loromonu, sira hotu-hotu rona kona ba buat nebee akontese nee. Sira nee husi suku Ete, Amori, Kanaán, Perez, Heveu ho Jebus. Sira hela iha rejiaun foho ki-kiik, iha foho huun no besik tasi Mediteráneu too besik rai Líbanu.
2 Liurai sira nee hotu halibur hamutuk ho lia ida atu halo funu hasoru Josué ho ema Israel.
3 Maibee, bainhira ema iha sidade Gibeon rona kona ba saida mak Josué halo ona ba sidade Jerikó ho sidade Ai,
4 sira halo manobra. Sira prepara bukae tau ba karoon nebee aat ona. Sira mos enxe tua ba tua fatin nebee halo husi animal kulit. Tua fatin nee bosan ona, naklees ona mak suku fila fali. Depois sira tula ba kuda buru.
5 Sira tau sandalias aat nebee suku fila fali, no hatais hena bosan. Sira nia paun maran no kulafur hotu.
6 Prepara hotu tiha, sira baa hasoru Josué iha akampamentu iha Gilgal. Sira hatete ba Josué ho ema Israel sira, “Ami mai husi rai dook. Ami hakarak atu ita boot sira halo akordu pas ho ami.”
7 Maibee ema Israel hatete ba ema Heveu sira nee, “Keta imi hela besik ami iha nee karik. Se nunee, ami la bele halo akordu ho imi.”
8 Ema Heveu sira dehan ba Josué, “Ami nee ita boot nia atan.”
Josué husu, “Imi nee see? Imi mai husi nebee?”
9 Sira hataan, “Ami ata mai husi rai nebee dook teb-tebes, tanba ami rona NAI, senhor nia Maromak nia naran. Ami rona tiha ona kona ba Nia, no kona ba buat hotu nebee Nia halo ona iha rai Ejitu.
10 Ami mos rona ona kona ba buat hotu-hotu nebee mak Nia halo ba ema Amori nia liurai nain rua iha mota Jordaun nia sorin ba, nee mak Sihon liurai Hesbon ho Og liurai Basán, nia hela iha sidade Astarot.
11 Nunee ami nia katuas lia nain sira ho ema hotu nebee hela iha ami nia rain haruka ami prepara bukae para haan iha dalan. Sira haruka ami mai hasoru ita boot sira hodi dehan ba ita boot sira nunee: ‘Ami nee ita boot sira nia atan, favor halo akordu ho ami.’
12 Ita boot sira haree took ami nia paun nee, ami lori atu haan iha dalan. Uluk ami sai husi uma atu mai hasoru ita boot sira, paun nee sei mana-manas hela, agora sai maran no kulafur hotu ona.
13 Tua fatin sira nee, uluk ami enxe tua atu lori nee sei foun hela, agora haree took ba, naklees hotu ona. Ami nia ropa ho sandalias sira nee aat hotu ona tanba ami halo viajen dook teb-tebes.”
14 Nunee ema Israel revista ema Gibeon sira nee nia bukae, maibee sira la husu NAI Maromak nia hakarak.
15 Depois Josué halo akordu pas ho ema Gibeon sira atu la bele oho sira. Lider Israel sira jura katak sira sei kaer metin akordu pas nee.
16 Maibee sira halo akordu hotu, liu tiha loron tolu ema Israel rona fali katak, afinal ema sira nee hela besik, iha ema Israel sira nia leet.
17 Entaun ema Israel sira sai husi nebaa hodi lao ba ema sira nee nia sidade. Iha loron tolu sira too. Sidade hirak nee mak Gibeon, Kefira, Beerot ho Kiriat-Jearim.
18 Maibee ema Israel la asalta sira, tanba lideransa Israel halo tiha ona juramentu ba ema Gibeon hodi NAI, Israel nia Maromak nia naran.
Depois povu Israel hotu-hotu murmura hasoru lider sira nee.
19 Maibee lider sira nee hotu hatete ba povu tomak, “Ami jura tiha ona ba sira hodi NAI, Israel nia Maromak nia naran. Tanba nee agora ita la bele halo aat sira.
20 Ita sei halo hanesan nee. Ita sei husik sira moris. Tanba se ita oho sira, NAI Maromak sei fakar sai Nia hirus mai ita tanba ita kontra juramentu nebee mak ita halo ona ba sira.”
21 Lider sira hatete tan, “Ita tenki husik sira moris.” Nunee ema Gibeon sira halo servisu fera ai no kuru bee ba ema Israel hotu, tuir lider sira nee nia desizaun.
22 Depois Josué bolu ema Gibeon sira hodi dehan, “Nusaa mak imi bosok ami dehan, ‘Ami hela dook loos husi imi?’ Afinal imi hela besik ami.
23 Tanba nee agora malisan kona imi. Imi sai ami nia atan too tinan ba tinan. Imi sei fera ai no kuru bee ba hau nia Maromak nia uma.”
24 Ema Gibeon sira hataan, “Ami halo hanesan nee tanba ami ata rona mo-moos katak, uluk NAI, senhor nia Maromak haruka Nia atan Moisés atu foo rai nee tomak ba ita boot sira. NAI haruka Moisés oho ema rai nain hotu nebee ita boot sira hetan iha rai nee. Nunee ami tauk teb-tebes, keta halo be ita boot sira atu oho ami. Nee mak ami halo nunee.
25 Agora ami iha senhor nia liman. Saida deit mak senhor senti diak no loos, halo tuir ba.”
26 Nunee Josué salva sira husi ema Israel nia liman, ema Israel la konsege oho sira.
27 Maibee iha loron nee kedas Josué foo knaar ba ema Gibeon sira hodi fera ai no kuru bee ba ema Israel sira no mos ba NAI Maromak nia altar iha fatin nebee deit mak NAI hili. Sira kaer nafatin servisu nee too ohin loron.