7
Akan kontra NAI Maromak nia orden
1 Maibee povu Israel la halo tuir NAI Maromak nia orden kona ba sasaan nebee mak sira tenki halo rahun. Ema ida naran Akan foti sasaan sira nee balu. Entaun NAI Maromak laran nakali teb-tebes hasoru ema Israel. Akan nee Karmi nia oan, Karmi Zabdi nia oan, Zabdi Zerá nia oan, nia husi suku Judá.
2 Iha tempu nebaa Josué haruka ema balu lao husi Jerikó ba iha sidade Ai, sidade nee besik Bet-Aven, iha Betél nia parte lorosae. Josué dehan, “Imi sae baa hodi hafuhu rai nebaa.” Entaun sira sae baa hafuhu Ai.
3 Bainhira sira fila fali, sira hatete ba Josué, “Ema iha nebaa uitoan deit. Tanba nee la presiza militar hotu-hotu baa asalta sira. Haruka deit rihun rua ka tolu mos natoon ona.”
4 Entaun militar maizoumenus rihun tolu sae ba atu asalta Ai. Maibee too iha nebaa sira halai husi tropas Ai.
5 Ema Ai duni sira husi portaun sidade nia oin too iha fatin kee fatuk. Sira halai dadauk tuun tuir foho lolon, tropas Ai oho militar Israel maizoumenus nain tolu-nulu resin neen iha nebaa. Nunee ema Israel, sira tauk too nakdedar.
6 Hotu tiha Josué lees nia hena nebee nia hatais, nia taka rabat oin ba rai iha NAI nia kaixoti promesa nia oin too loro matan monu. Katuas lia nain Israel nian mos halo hotu nunee. Josué ho katuas lia nain sira nee kari rai rahun ba sira nia ulun.
7 Depois Josué harohan, “NAI Maromak Kbiit Nain, tansaa mak Ita Boot lori povu nee hakur liu mota Jordaun? Ita Boot hakarak entrega ami ba ema Amori nia liman laran para oho ami ka? Nusaa mak uluk ami la desidi atu hela deit iha mota Jordaun nia sorin ba?
8 Nai, hau atu dehan saida? Agora ema Israel sira halai tiha ona husi sira nia inimigu.
9 Ema Kanaán sira ho ema hotu nebee hela iha rai nee sei rona kona ba ida nee. Sira sei haleu ami hodi dasa sai tiha hotu ami husi mundu nee. Depois halo nusaa mak Ita Boot atu defende Ita nia naran boot nee?”
10 NAI Maromak dehan ba Josué, “Hamriik ba! Nusaa mak o taka rabat oin ba rai nunee?
11 Ema Israel halo sala tiha ona, sira kontra ona orden nebee mak Hau foo ba sira. Sasaan nebee mak sira tenki halo rahun hodi hatudu katak buat sira nee Hau nian, sira foti tiha balu. Sira naok, sira bosok, depois sasaan hirak nee sira tau hamutuk ho sira nia sasaan rasik.
12 Tanba nee mak ema Israel sira la bele hamriik hasoru sira nia inimigu. Sira fila kotuk hodi halai husi inimigu sira nia oin tanba agora sira mos hola parte ona ba sasaan sira nebee mak tenki rahun. Se imi la harahun sasaan sira nee, Hau sei la hela tan ho imi.
13 Hamriik ona! Baa haruka povu hamoos sira nia aan para sira prontu ba loron aban. Hatete ba sira, NAI, Israel nia Maromak dehan nunee: ‘Povu Israel, sasaan nebee mak tuir loos imi tenki halo rahun hodi hatudu katak nee Hau nian, balu sei iha hela imi nia leet. Se imi la hasai, imi sei la bele hamriik hasoru imi nia inimigu.
14 Aban dadeer-saan imi tenki mai aprezenta aan tuir suku ida-idak. Suku ida nebee NAI hatudu tenki lori nia familia ida-idak baa aprezenta iha oin. Familia ida nebee NAI hatudu tenki lori nia uma kain ida-idak baa aprezenta iha oin. Nunee mos uma kain nebee NAI hatudu tenki lori mane ida-idak baa aprezenta iha oin.
15 See mak foti tiha sasaan nebee mak imi tenki halo rahun, imi tenki lori ahi sunu tiha ema nee, nia familia ho mos nia sasaan sira hotu, tanba nia kontra tiha ona NAI Maromak nia orden. Nia hahalok aat nee halo foer ona povu Israel nia naran.’ ”
16 Entaun aban dadeer-saan, Josué hadeer sedu, nia haruka povu Israel baa hamriik iha oin tuir suku ida-idak. NAI Maromak hatudu suku Judá.
17 Depois Josué haruka suku Judá nia familia ida-idak baa hamriik iha oin. NAI hatudu Zerá nia familia. Josué haruka Zerá nia familia, uma kain ida-idak baa hamriik iha oin. NAI hatudu Zabdi.
18 Hotu tiha, Josué haruka uma kain Zabdi nian, mane ida-idak baa iha oin, NAI hatudu Akan. Akan nee Karmi nia oan, Karmi Zabdi nia oan, Zabdi Zerá nia oan, sira nee husi suku Judá.
19 Josué dehan ba Akan, “Oan, foti aas NAI, Israel nia Maromak. Foo sai o nia sala ba Nia. Konta mai hau saida mak o halo tiha ona, la bele subar o nia hahalok nee mai hau.”
20 Akan hataan, “Loos duni, hau halo sala tiha ona hasoru NAI, Israel nia Maromak. Buat nebee hau halo mak nee.
21 Bainhira hau hateke ba sasaan sira nebee ita hadau, hau haree batina furak ida husi rai Babilónia, osan mutin atus rua ho osan mean baluk ida, nia todan kilu sorin balu. Hau kaan loos, entaun hau foti. Hau subar buat hirak nee iha rai okos iha hau nia tenda laran, osan mutin mak iha sasaan sira seluk nia okos.”
22 Entaun Josué haruka ema balu baa haree. Sira halai ba iha Akan nia tenda. Too iha nebaa sira hetan duni sasaan sira nee subar hela iha nia tenda laran, osan mutin mak iha sasaan sira seluk nia okos.
23 Sira foti sasaan sira nee sai husi tenda laran lori ba Josué ho ema Israel hotu hodi tau iha NAI Maromak nia oin.
24 Depois Josué hamutuk ho ema Israel hotu lori Zerá nia oan Akan hamutuk ho osan mutin, batina ho osan mean baluk nee. Sira mos lori nia oan mane ho oan feto sira, nia karau, kuda buru, bibi malae, tenda ho buat hotu nebee nia iha. Sira lori hotu ba iha rai klean Akor.
25 Too iha nebaa, Josué dehan ba Akan, “Nusaa mak o lori susar nee mai ami? Ohin loron NAI Maromak sei lori susar ba o.” Depois ema Israel hotu foti fatuk tuda mate Akan, sira mos tuda mate nia familia. Sira sunu mutuk tiha Akan ho nia familia sira nia mate isin ho sira nia sasaan hotu.
26 Sira bou fatuk halo aas iha Akan nia mate isin nee, fatuk nee sei iha too ohin loron. Tanba istoria nee mak too agora fatin nee hanaran rai klean Akor. Nee hotu mak NAI Maromak nia laran la nakali tan ona.