6
Nai Maromak entrega sidade Jerikó ba Josué
1 Iha tempu nebaa sidade Jerikó nia portaun taka metin tiha atu nunee ema Israel la bele tama. La iha ema ida mak lao tama-sai iha sidade nee.
2 NAI Maromak hatete ba Josué, “Haree ba, sidade Jerikó, nia liurai ho nia aswain sira, Hau entrega tiha ona ba o nia liman laran.
3 O tenki lao haleu sidade nee dala ida hamutuk ho funu nain sira hotu. Imi tenki halo nunee durante loron neen.
4 Nai lulik nain hitu tenki lori korneta nebee halo husi bibi malae aman nia dikur hodi lao uluk iha kaixoti promesa nia oin. Too loron hitu, imi tenki lao haleu sidade nee dala hitu, nai lulik sira huu dadauk korneta hodi lao akompanha imi.
5 Depois nai lulik sira tenki huu korneta nee ho lian naruk. Bainhira imi rona lian nee, militar hotu-hotu tenki haklalak ho lian makaas. Depois sidade nia moru sei naksobu too rai. Militar sira tenki halai loos deit ba oin tama ba sidade.”
6 Entaun Nun nia oan Josué bolu nai lulik sira hamutuk hodi dehan ba sira, “Imi tenki hulan NAI Maromak nia kaixoti promesa. Hili nai lulik nain hitu atu lori korneta nebee halo husi bibi malae aman nia dikur, sira sei lao uluk iha kaixoti nee nia oin.”
7 Depois nia hatete ba povu, “Baa ona, lao haleu sidade nee. Militar balu lori kroat tenki lao uluk iha NAI nia kaixoti promesa nia oin.”
8 Bainhira Josué koalia ba povu hotu ona, nai lulik nain hitu lori korneta hitu lao uluk iha NAI nia oin. Sira lao dadauk, huu dadauk korneta. Nai lulik seluk hulan NAI nia kaixoti promesa hodi lao tuir sira.
9 Iha militar balu lao uluk iha nai lulik sira nebee huu korneta nee nia oin, militar balu tan lao iha kaixoti promesa nia kotuk. Nai lulik sira huu korneta la para.
10 Maibee Josué haruka povu dehan, “La bele haklalak, ema ida la bele rona imi nia lian, liafuan ida mos la bele sai husi imi nia ibun. Too loron nebee mak hau haruka imi haklalak mak imi foin haklalak.”
11 Nunee nai lulik sira hulan NAI nia kaixoti promesa lao haleu sidade dala ida, depois sira fila fali ba fatin akampamentu hodi deskansa kalan iha nebaa.
12 Iha aban dadeer fali Josué hadeer sedu, depois nai lulik sira hulan NAI nia kaixoti promesa.
13 Nai lulik nain hitu nebee lori korneta hitu huu nafatin korneta hodi lao iha NAI nia kaixoti promesa nia oin. Militar balu lao iha nai lulik sira nee nia oin, balu tan lao iha NAI nia kaixoti promesa nia kotuk. Sira lao dadauk, korneta lian la para.
14 Iha loron tuir mai, sira lao haleu sidade nee dala ida, depois sira fila fali ba akampamentu. Sira halo nunee durante loron neen.
15 Too iha loron hitu sira hadeer iha dadeer-saan rai huun mutin, sira lao haleu sidade hanesan baibain, maibee dala hitu. Iha loron nee deit mak sira haleu sidade dala hitu.
16 Too dala hitu, nai lulik sira huu korneta ho lian naruk, Josué haruka povu, “Haklalak ona ba! Tanba NAI Maromak foo tiha ona sidade nee ba imi.
17 Sidade nee ho saida deit mak iha sidade nia laran, imi tenki halo rahun hotu hodi hatudu katak nee NAI Maromak nian. So Rahab feto luroon nee ho ema sira nebee mak hamutuk ho nia iha nia uma mak bele moris, tanba nia subar espiaun sira nebee mak uluk ita haruka mai iha sidade nee.
18 Maibee imi la bele foti buat ruma husi sasaan sira nebee NAI haruka imi atu halo rahun nee. Karik imi foti sasaan sira nee, entaun Israel nia akampamentu sei rahun, no povu Israel sei hetan susar.
19 Osan mutin, osan mean ho sasaan nebee halo husi riti ka besi, hotu-hotu NAI Maromak nian. Sasaan hirak nee imi tenki rai iha NAI Maromak nia armazen.”
20 Bainhira korneta lian, povu haklalak ho lian makaas. Derepenti moru sidade nian naksobu too rai. Militar sira halai tama ba sidade laran, ida-idak halai sae ba oin. Nunee sira hadau tiha sidade.
21 Buat hotu nebee moris iha sidade, sira oho ho surik hodi hatudu katak sidade nee NAI Maromak nian. Feto ho mane, joven ho ferik-katuas, karau, bibi malae ho kuda buru, sira oho hotu.
22 Josué hatete ba espiaun nain rua nebee uluk mai hafuhu rai nee, “Baa iha feto luroon nee nia uma, lori sai nia hamutuk ho nia familia, tuir juramentu nebee mak uluk imi halo ba nia.”
23 Entaun mane klosan nain rua nebee uluk sai espiaun nee tama ba hodi lori sai Rahab ho nia inan-aman, nia maun-alin ho nia maluk sira seluk. Nunee sira hasai nia ho nia familia tomak hodi lori sira baa hela besik iha Israel sira nia fatin akampamentu.
24 Depois militar sira sunu mutuk sidade nee tomak ho buat hotu nebee iha laran. So lori osan mutin, osan mean ho sasaan nebee halo husi riti ka besi mak sira lori baa rai iha armazen iha NAI Maromak nia uma.
25 Maibee Josué salva Rahab, feto luroon nee ho nia aman nia uma kain ho Rahab nia familia tomak, tanba uluk Rahab subar tiha espiaun nain rua nebee Josué haruka mai hafuhu Jerikó. Rahab hela iha ema Israel sira nia leet too ohin loron.
26 Iha tempu nebaa Josué jura dehan,
“Ema nebee komesa harii fila fali sidade Jerikó nee,
NAI Maromak sei hatuun malisan ba nia.
Bainhira nia hada moru nia alsesu, nia oan boot sei mate;
bainhira nia harii portaun sidade, nia oan ikun sei mate.”
27 NAI Maromak hamutuk ho Josué. Josué nia naran boot iha rai nee tomak.