5
Mane Israel sira sunat iha Gilgal
1 Liurai sira nebee ukun iha rai Amori iha mota Jordaun parte loromonu ho mos liurai sira nebee ukun iha rai Kanaán iha tasi ibun, sira rona katak NAI Maromak halo maran tiha bee mota Jordaun iha povu Israel nia oin too sira bele hakur. Entaun liurai sira nee fuan nakdedar, sira la brani ona atu halo funu hasoru ema Israel.
2 Iha tempu nebaa NAI Maromak dehan ba Josué, “O tenki halo tudik husi fatuk hodi halo serimonia sunat ba ema Israel nebee mak seidauk moris iha tempu serimonia sunat uluk nian.”
3 Entaun Josué halo tudik husi fatuk hodi sunat mane Israel sira iha foho Sunat.
4-6 Josué tenki sunat sira tanba nee. Uluk povu Israel sai husi rai Ejitu, mane hotu-hotu sunat. Maibee durante tinan haat-nulu nia laran povu lao liu husi rai fuik maran, labarik mane sira nebee moris iha tempu nebaa seidauk sunat. Mane sira nebee mak sai husi Ejitu ho idade too atu sai militar mate mohu ona tanba sira la halo tuir NAI Maromak nia liafuan. Nunee NAI jura katak, sira sei la haree rai nebee Nia promete tiha ona ba sira nia bei-ala atu foo ba sira, rai nee nakonu ho susu been ho bani been.
7 Maromak hili sira nia oan hodi troka fali sira nia fatin, maibee oan sira nee seidauk sunat, tanba ema Israel la halo serimonia sunat iha dalan klaran. Nee mak agora Josué sunat sira.
8 Bainhira mane Israel sira sunat hotu ona, sira hela deit iha akampamentu too sira nia kanek diak fali.
9 Hotu tiha NAI Maromak hatete ba Josué dehan, “Loron ohin Hau duir sai tiha imi nia moe nudar atan iha Ejitu.” Nunee mak too agora ema bolu fatin nee Gilgal.
Israel selebra Paskua iha Gilgal
10 Bainhira povu Israel hela iha akampamentu iha Gilgal, iha rai tetuk Jerikó nian, sira selebra Paskua. Selebrasaun nee hahuu bainhira loro matan tuun iha loron sanulu resin haat, fulan primeiru.
11 Selebrasaun Paskua hotu ona, iha kedas aban dadeer-saan, sira komesa haan ai haan husi toos, nee mak paun la tau fermentu ho trigu musan tunu.
12 Sira haan tiha ai haan rai nee nian, manaa la monu tan husi leten mai. Nunee ema Israel la haan tan paun manaa, maibee iha tinan nee sira haan ai haan husi toos rai Kanaán nian.
NAI nia militar sira nia komandante hasoru Josué
13 Iha loron ida bainhira Josué besik Jerikó, nia foti matan haree mane ida hamriik iha nia oin kaer hela surik iha nia liman laran. Josué hakat baa hodi husu ema nee dehan, “Ita boot ami nia maluk ka ami nia inimigu?”
14 Ema nee hataan, “Ru-rua nee lae hotu. Hau mai iha nee nudar NAI Maromak nia militar sira nia komandante.” Nunee Josué hakruuk too rai iha nia oin. Depois Josué husu, “Senhor hakarak atan hau atu halo saida?”
15 NAI nia militar sira nia komandante hataan, “Hasai tiha sandalias husi o nia ain, tanba fatin nebee o hamriik ba nee fatin santu.” Josué mos halo tuir.