3
Ema Israel hakur mota Jordaun
1 Dadeer-saan deit Josué ho ema Israel sira hotu sai husi rai Xitim hodi baa iha mota Jordaun. Too iha nebaa sira dada tenda hodi hela lai molok atu hakur mota.
2 Liu tiha loron tolu lider sira lao haleu akampamentu
3 hodi haruka povu dehan, “Bainhira imi haree nai lulik sira husi suku Levi nian hulan NAI imi nia Maromak nia kaixoti promesa, imi tenki sai husi imi nia fatin hodi lao tuir.
4 Nunee imi sei hatene dalan nebee mak imi atu baa, tanba dalan nee foun ba imi. Maibee la bele besik kaixoti promesa, tenki dook maizoumenus kilometru ida.”
5 Josué hatete ba povu, “Hamoos imi nia aan, tanba aban NAI Maromak sei hatudu milagre iha imi nia leet.”
6 Josué dehan ba nai lulik sira, “Foti kaixoti promesa hodi lao uluk iha povu nia oin.” Entaun sira foti kaixoti promesa hodi lao iha oin.
7 NAI Maromak hatete ba Josué, “Ohin loron Hau komesa foti aas o nia naran iha povu Israel nia matan, atu nunee sira bele hatene katak Hau hamutuk ho o hanesan uluk Hau hamutuk ho Moisés.
8 Haruka nai lulik sira nebee hulan kaixoti promesa nee dehan, ‘Bainhira imi too iha mota Jordaun, imi tenki tama ba hamriik iha bee laran besik mota ninin.’ ”
9 Depois Josué dehan ba povu Israel, “Mai besik hodi rona NAI imi nia Maromak nia liafuan.”
10 Nia hatutan, “Husi nee imi sei hatene katak, Maromak Moris hela iha imi nia leet, no bainhira imi lao ba oin, Nia sei duni sai tiha ema Kanaán, Ete, Heveu, Perez, Girgas, Amori ho ema Jebus.
11 Haree ba, mundu tomak nia Nai nia kaixoti promesa sei baa uluk iha imi nia oin tama ba mota Jordaun.
12 Nee duni, agora hili mane ida-ida husi suku sanulu resin rua iha Israel.
13 Nai lulik sira sei hulan NAI nia kaixoti promesa, NAI nee mundu tomak nia Nai. Bainhira sira tau ain ba iha mota Jordaun, bee nebee suli tuun husi leten sei para kedas, sai butuk aas tiha.”
14 Entaun povu sai husi sira nia fatin akampamentu para hakur mota Jordaun, nai lulik sira nebee hulan kaixoti promesa lao uluk iha sira nia oin.
15 Momentu nebaa tempu kolheta, bee sae nakonu too liu mota ninin. Maski nunee, bainhira nai lulik sira nebee hulan kaixoti promesa nee too ona iha mota Jordaun, sira foin tau ain ba iha bee laran,
16 bee nebee suli husi leten mai para derepenti. Bee nee butuk aas tiha dook husi sira, iha sidade Adam besik Sartan. Nunee bee la suli tan tuun ba tasi Araba (ema mos bolu tasi Mate). Depois povu sira hakur mota ba fatin ida besik sidade Jerikó.
17 Bainhira povu hakur mota, nai lulik sira nebee hulan NAI nia kaixoti promesa hamriik metin iha rai maran iha mota Jordaun nia klaran, too povu Israel tomak lao husi sira nia oin liu husi rai maran.