2
Rahab proteje espiaun husi Israel
1 Hotu tiha Nun nia oan Josué haruka espiaun nain rua lao sub-subar husi rai Xitim. Nia dehan, “Baa hafuhu rai Kanaán, liu-liu sidade Jerikó.” Nunee sira nain rua baa. Too iha feto luroon ida naran Rahab nia uma, sira tama atu toba kalan ida iha nebaa.
2 Iha ema ruma baa foo hatene liurai Jerikó dehan, “Iha kalan nee ema Israel balu mai iha nee atu hafuhu rai.”
3 Entaun liurai haruka ema lori orden ba Rahab dehan, “Hasai tiha ema sira nebee ohin mai tama iha o nia uma nee, tanba sira mai atu hafuhu rai nee tomak.”
4 Maibee Rahab lori tiha ona mane nain rua nee baa subar. Nia hatete ba liurai Jerikó nia ema, “Loos duni, ema sira nee mai duni iha nee, maibee hau la hatene sira mai husi nebee.
5 Bainhira rai besik kalan, oras atu taka portaun sidade nian, sira sai ona. Hau la hatene sira baa nebee. Duni tuir lalais ba, karik imi bele toman.”
6 Afinal nia lori tiha sira sae ba uma kakuluk hodi subar sira iha ai linhu kain nia okos, linhu kain nee latan hela iha nebaa.
7 Entaun liurai Jerikó nia ema sai baa buka sira nain rua tuir dalan ba mota Jordaun nian, too iha fatin nebee baibain ema hakur mota. Bainhira sira sai tiha, portaun sidade nian mos taka kedas.
8 Antes espiaun nain rua nee toba, Rahab sae ba uma leten
9 hodi dehan ba sira, “Hau hatene katak NAI Maromak foo tiha ona rai nee ba imi. Ami tauk teb-tebes imi, ami hotu nebee hela iha rai nee tauk too nakdedar tanba imi.
10 Ami rona tiha ona katak, bainhira imi sai husi rai Ejitu, NAI Maromak halo maran tasi Mean husi imi nia oin. Ami mos rona katak, imi oho Sihon ho Og, ema Amori sira nia liurai iha mota Jordaun nia sorin lorosae ba.
11 Bainhira ami rona ida nee, ami nia fuan lakon kedas, ema hotu iha nee lakon korajen. Tanba NAI, imi nia Maromak mak Maromak iha lalehan no iha rai.
12 Entaun agora jura mai hau hodi NAI nia naran katak, imi sei hatudu laran diak mai hau nia familia hanesan mos hau hatudu tiha ona laran diak ba imi. Foo sinal ruma mai hau atu hau bele fiar
13 katak, imi sei salva hau nia inan-aman, hau nia maun-alin sira ho mos sira nia familia tomak. Imi la bele husik ema ida oho ami.”
14 Espiaun nain rua nee hataan ba nia, “Ami prontu foo ami nia aan hodi proteje imi. Naran katak o la konta sai buat nebee ami halo iha rai nee, ami sei kaer metin ami nia promesa hodi hatudu laran diak ba imi bainhira NAI Maromak foo rai nee mai ami.”
15 Depois Rahab hatuun sira ho tali husi janela, tanba nia uma nia paredi hola parte moru sidade nian.
16 Molok atu hatuun sira, Rahab dehan ba sira, “Baa iha foho atu nunee ema nebee buka imi la bele hetan. Subar iha nebaa durante loron tolu nia laran. Sira fila fali mai mak imi foin lao tan.”
17 Sira nain rua hatete ba nia, “Ami sei kaer metin promesa nebee o haruka ami halo ba o,
18 naran katak o halo hanesan nee. Bainhira ami tama mai rai nee, o tenki kesi tali mean nee iha janela nebee o hatuun ami ba. O mos tenki halibur o nia inan-aman, o nia maun-alin sira ho o nia familia tomak iha o nia uma nee.
19 See deit mak hakat ain sai husi o nia uma, nia tenki responsabiliza ba nia aan rasik. Karik nia raan fakar, nee laos ami nia sala. Maibee karik ema halo kanek o nia ema ruma iha uma laran, ami mak sei responsabiliza ba nia raan.
20 Maibee karik o konta buat nebee ami halo, entaun ami sei livre husi promesa nebee o haruka ami halo nee.”
21 Rahab hataan, “Diak, mai ita halo tuir imi nia liafuan.” Depois nia haruka sira baa, sira mos lao ona. Nia kesi tali mean nee ba iha janela.
22 Espiaun sira sai, sira baa too iha foho hodi subar iha nebaa. Ema nebee buka sira, buka tu-tuir dalan, maibee la hetan, too ema sira nee fila tiha deit.
23 Nunee espiaun nain rua tuun husi foho hodi hakur liu mota baa too Nun nia oan Josué. Depois sira konta sira nia esperiensia hotu ba nia.
24 Sira dehan, “NAI Maromak foo tiha ona rai nee tomak mai iha ita nia liman laran. Populasaun hotu iha nebaa tauk too nakdedar tanba ita.”