Josué
1
NAI Maromak foo knaar ba Josué
1 Bainhira NAI Maromak nia atan Moisés mate tiha, NAI koalia ba Moisés nia visi Josué, nia nee Nun nia oan. NAI dehan,
2 “Hau nia atan Moisés mate tiha ona. Entaun o hamutuk ho povu Israel sira hotu tenki prepara aan hodi hakur mota Jordaun ba iha rai nebee mak Hau atu foo ba sira.
3 Fatin nebee deit mak o nia ain sama kona, Hau sei foo ba imi, hanesan uluk Hau promete ona ba Moisés.
4 Imi nia teritoriu sei baliza husi rai fuik maran too rai Líbanu, husi mota boot Eufrates iha lorosae too iha tasi luan Mediteráneu iha loromonu. Ema Ete nia rain tomak tama hotu iha laran.
5 Iha o nia moris tomak, la iha ema ida mak bele hamriik hasoru o. Hau sei hamutuk ho o hanesan mos uluk Hau hamutuk ho Moisés. Hau sei la husik o mesak, Hau nunka atu abandona o.
6 Forti no aten brani ba, tanba o sei lidera povu ida nee hodi sai nain ba rai nebee Hau jura tiha ona ba sira nia bei-ala atu foo ba sira.
7 Forti no aten brani teb-tebes ba. Kuidadu di-diak para halo tuir lei hotu-hotu nebee Hau nia atan Moisés foo tiha ona ba o. La bele lao sees husi lei nee ba sorin loos ka karuk, atu nunee o baa nebee deit, bele susesu.
8 O nia ibun tenki temi beibeik lei nee. Medita loron-kalan lei nee atu o bele kuidadu hodi halo tuir buat hotu nebee hakerek iha laran. Halo nunee mak o sei hetan moris diak no susesu.
9 Hau foo hatene ona o katak, forti no aten brani ba. Keta tauk, la bele lakon esperansa, tanba o baa nebee deit Hau hamutuk ho o. Hau nee NAI, o nia Maromak.”
Josué haruka povu prepara atu tama rai Kanaán
10 Nunee Josué foo orden ba lider povu Israel dehan,
11 “Imi baa lao liu akampamentu hodi haruka povu nunee: ‘Prepara imi nia bukae, tanba too iha loron tolu, imi sei hakur liu mota Jordaun hodi sai nain ba rai nebee mak NAI imi nia Maromak foo para sai imi nian rasik.’ ”
12 Depois Josué dehan ba ema suku Ruben, Gad ho suku Manassés sorin balu,
13 “La bele haluha liafuan nebee NAI Maromak nia atan Moisés hameno ona ba imi dehan, ‘NAI imi nia Maromak sei foo rai nee ba imi, atu imi bele hela hakmatek.’
14 Imi nia feen, oan ho animal sira bele hela iha rai nebee Moisés foo ona ba imi iha mota Jordaun nia sorin parte lorosae nian nee. Maibee imi nia funu nain sira hotu tenki lori ekipamentu funu nian lao uluk iha imi nia maluk sira nia oin hodi hakur liu mota Jordaun. Imi tenki ajuda sira
15 too NAI Maromak foo fatin seguru ba sira, hanesan mos Nia foo tiha ona ba imi. Nunee sira mos bele sai nain ba rai nebee NAI imi nia Maromak atu foo ba sira. Hotu tiha imi bele fila fali ba imi nia rain rasik, imi bele hela metin iha rai nebee NAI Maromak nia atan Moisés foo tiha ona ba imi iha mota Jordaun nia sorin lorosae nee.”
16 Sira hataan ba Josué, “Saida deit mak ita boot haruka ami halo, ami sei halo. Ita boot haruka ami baa nebee deit mos, ami sei baa.
17 Ami sei halo tuir ita boot nia liafuan hotu-hotu hanesan uluk ami halo tuir Moisés. Ami hein katak NAI ita boot nia Maromak akompanha ita boot hanesan uluk Nia akompanha Moisés.
18 See deit mak kontra ita boot nia orden no lakohi halo tuir ita boot nia liafuan, nia sei hetan kastigu mate. Nunee forti no aten brani ba.”