23
Josué nia lia menon ikus ba povu Israel
1 Liu tiha tinan barak nia laran NAI Maromak halo povu Israel moris hakmatek ona maski nasaun inimigu haleu sira. Iha tempu nebaa Josué katuas liu ona.
2 Nia halibur katuas lia nain sira, xefi familia sira, juis sira, ho mos administrador sira hotu hodi dehan ba sira, “Hau katuas liu ona.
3 Imi rasik haree ona buat hotu-hotu nebee mak NAI imi nia Maromak halo hasoru nasaun sira nee ba imi nia diak. NAI imi nia Maromak mak halo funu hodi tulun imi.
4 Keta haluha, rai husi mota Jordaun ba too iha tasi Mediteráneu iha parte loromonu, hau fahe tiha ona ba imi tuir suku ida-idak hodi sai imi nian, liu husi dada rifa. Rai hirak nee balu, ita hadau ona husi nasaun hirak nebee mak hau manaan tiha ona, rai balu nasaun seluk mak sei hela.
5 NAI imi nia Maromak rasik mak sei dudu sees tiha sira. Nia sei duni sai sira husi imi nia oin atu nunee rai nee sai imi nian, tuir NAI imi nia Maromak promete ona ba imi.
6 Nee duni imi tenki hakaas aan hodi kaer metin no halo tuir buat hotu nebee hakerek iha livru lei Moisés nian. La bele lao sees husi lei nee.
7 La bele ranxu ho povu nasaun seluk nian nebee sei hela iha imi nia leet. La bele temi sira nia maromak nia naran, la bele jura hodi sira nia maromak nia naran, la bele serbi sira nia maromak, la bele hakruuk ba sira nia maromak.
8 Maibee imi tenki foo laran tomak nafatin ba NAI imi nia Maromak, hanesan imi halo ona too ohin loron.
9 Tanba NAI duni sai ona nasaun bo-boot ho forti iha imi nia oin. Too ohin loron la iha ema ida mak bele hamriik hodi hasoru imi.
10 Imi ema nain ida deit bele duni sai ema rihun ida tanba NAI imi nia Maromak mak halo funu hodi tulun imi, hanesan uluk Nia promete ona ba imi.
11 Nunee kuidadu di-diak atu hadomi NAI imi nia Maromak.
12 Maibee se imi fila kotuk ba Maromak hodi hamutuk fali ho ema nasaun jentiu sira nebee sei moris iha imi nia leet ka imi hola malu ba-mai ho sira,
13 entaun imi tenki hatene mo-moos katak, NAI imi nia Maromak sei la duni tan nasaun hirak nee iha imi nia oin. Sira sei sai lasu ho gaiola ba imi. Sira sei sai sikoti iha imi nia kotuk laran. Sira sei sai ai tarak iha imi nia matan laran too imi mate mohu husi rai diak ida nee, rai nebee NAI imi nia Maromak foo tiha ona ba imi.
14 Agora hau besik atu husik ona mundu. Imi hotu hatene ho fuan ho laran katak, buat diak hotu-hotu nebee NAI imi nia Maromak promete ba imi, la iha ida mak la akontese, Nia promesa hotu-hotu Nia halo tuir, la iha ida mak la akontese.
15 Buat diak hotu-hotu nebee NAI imi nia Maromak promete ba imi sai ona realidade. Maibee se imi kontra fali Nia, entaun Nia mos sei hatuun buat aat hotu-hotu ba imi nia leten, too Nia dasa sai tiha imi husi rai diak ida nee, rai nebee NAI imi nia Maromak foo tiha ona ba imi.
16 Se imi la halo tuir lei nebee NAI imi nia Maromak foo bainhira Nia halo aliansa ho imi, se imi serbi no hakruuk fali ba maromak seluk, entaun NAI nia laran sei nakali hasoru imi. Imi sei mate mohu lalais deit husi rai diak ida nee, rai nebee NAI imi nia Maromak foo tiha ona ba imi.”