24
Povu Israel tomak hafoun sira nia promesa ba NAI Maromak
1 Hotu tiha Josué halibur suku Israel sira hotu iha sidade Sikem. Nia bolu Israel nia katuas lia nain sira, lider sira, juis sira ho administrador sira. Ema sira nee aprezenta sira nia aan iha Maromak nia oin.
2 Depois Josué koalia ba ema Israel sira hotu hodi dehan, “NAI, Israel nia Maromak hatete nunee: ‘Uluk imi nia bei-ala sira hela iha mota Eufrates nia sorin ba, sira serbi maromak seluk. Imi nia bei-ala ida mak Tera, nia nee mak Abraão ho Naor nia aman.
3 Depois Hau lori imi nia aman Abraão sai husi nebaa. Hau lori nia lao haleu rai Kanaán tomak. Hau halo nia jerasaun sai barak. Hau foo Isac ba nia,
4 depois Hau foo Jacó ho Esaú ba Isac. Hau foo rejiaun foho ki-kiik Seir nian ba Esaú, maibee Jacó ho nia oan sira tuun ba iha rai Ejitu.
5 Too ikus Hau haruka Moisés ho Arão ba iha imi. Hau foo dezastre oi-oin ba ema Ejitu, depois Hau lori imi sai husi nebaa.
6 Bainhira Hau lori imi nia bei-ala sira sai husi rai Ejitu, sira too iha tasi Mean, ema Ejitu sira duni tuir sira too iha nebaa lori kuda kareta funu ho kuda.
7 Maibee imi nia bei-ala sira halerik hodi husu tulun ba Hau. Hau halo rai nakukun hodi hafahe imi nia bei-ala sira ho ema Ejitu sira. Hau halo tasi taka tiha ema Ejitu sira too mout. Imi haree rasik ho matan saida mak Hau halo ba ema Ejitu sira nee. Hotu tiha imi hela kleur loos iha rai fuik maran.
8 Depois Hau lori imi ba ema Amori sira nia rain iha mota Jordaun nia sorin ba. Sira halo funu hasoru imi, maibee Hau entrega tiha sira ba imi nia liman laran. Hau harahun tiha sira iha imi nia oin, nunee sira nia rai sai imi nian.
9 Depois Zipor nia oan Balak, nia mak liurai Moab, nia prepara aan atu halo funu hasoru ema Israel. Nia haruka ema baa bolu Beor nia oan Balaão, para foo malisan ba imi.
10 Maibee Hau lakohi rona Balaão, nee mak nia foo fali bensaun ba imi fila-fila. Ho nunee Hau hasai imi husi nia liman laran.
11 Hotu tiha imi hakur mota Jordaun ba iha sidade Jerikó. Too iha nebaa ema Jerikó funu hasoru imi. Ema Amori, Perez, Kanaán, Ete, Girgas, Heveu ho ema Jebus mos halo funu hasoru imi. Maibee Hau entrega sira hotu ba iha imi nia liman laran.
12 Hau halo tauk liurai Amori nain rua hodi duni sai sira husi imi nia oin. Nunee laos imi nia surik ka imi nia rama mak halo imi manaan.
13 Hau foo rai ba imi, rai nee laos imi nia kosar been. Hau foo sidade nebee laos imi mak harii, agora imi hela iha laran. Imi haan ai fuan husi toos uvas ho ai oliveira nebee laos imi mak kuda.’ ”
14 Josué hatutan tan dehan, “Nee duni imi tenki hamtauk NAI Maromak hodi serbi Nia ho neon ho laran tomak. Soe tiha maromak sira nebee mak imi nia bei-ala sira uluk serbi iha mota Eufrates nia sorin ba no iha rai Ejitu. Serbi NAI Maromak mesak deit.
15 Maibee se imi lakohi serbi NAI Maromak, entaun agora imi tenki hili, imi atu serbi see loos. Imi hakarak serbi maromak sira nebee uluk imi nia bei-ala sira serbi iha mota Eufrates nia sorin ba ka? Ou imi hela iha ema Amori nia rain, keta imi hakarak serbi sira nia maromak? Maibee ba hau ho hau nia familia uma laran tomak, ami sei serbi NAI Maromak.”
16 Povu Israel hataan, “Ami nunka atu husik NAI Maromak hodi serbi fali maromak seluk!
17 Tanba uluk ita sai atan iha rai Ejitu, NAI ita nia Maromak mak lori ita ho ita nia avoo sira sai husi nebaa. Nia hatudu milagre bo-boot iha ita nia oin. Durante ita lao, Nia mak tau matan ba ita. Nia mak proteje ita husi nasaun hotu-hotu nebee mak ita liu.
18 Too iha rai nee, ema Amori sira mak hela, NAI Maromak duni sai tiha ema Amori sira nee hotu husi ita nia oin. Nee duni ami mos sei serbi NAI, tanba Nia mak ita nia Maromak.”
19 Josué hatete ba ema Israel, “Imi serbi NAI Maromak la bele, tanba Nia Maromak santu, Nia la simu bainhira imi serbi maromak seluk. Se imi kontra Nia ka halo sala hasoru Nia, Nia sei la perdua imi.
20 Se imi husik NAI Maromak hodi serbi fali nasaun seluk nia maromak, NAI sei fila kotuk hodi foo dezastre ba imi, Nia sei halo imi mate mohu, maski uluk Nia halo diak ba imi.”
21 Maibee povu hataan, “Lae! Ami sei serbi NAI Maromak.”
22 Josué hataan fali, “Imi sai sasin ba imi nia aan rasik katak, imi hili atu serbi NAI Maromak.”
Sira hataan, “Diak, ami mak sai sasin.”
23 Hotu tiha Josué dehan, “Se nunee, soe tiha nasaun seluk nia maromak sira nebee mak iha imi nia leet. Foo imi nia laran ba NAI, Israel nia Maromak.”
24 Povu hataan, “Ami sei serbi NAI ita nia Maromak, ami sei moris tuir Nia liafuan.”
25 Iha loron nee, Josué halo aliansa ho ema Israel sira iha Sikem. Nia halo lei ho regra ba sira.
26 Josué hakerek liafuan hirak nee hotu iha livru lei Maromak nian. Depois nia foti fatuk boot ida hodi harii iha ai huun boot ida nia okos besik NAI Maromak nia santuariu.
27 Nia dehan ba povu Israel tomak, “Haree ba! Fatuk nee mak sai sasin ba ita, tanba fatuk nee rona liafuan hotu nebee NAI koalia ona mai ita. Nunee se imi kontra imi nia Maromak, fatuk nee mak sei foo sasin katak imi kontra ona Maromak.”
28 Hotu tiha Josué haruka sira fila fali ba ida-idak nia uma.
Josué ho Eleazar mate
29 Liu tiha nee, NAI Maromak nia atan Josué, Nun nia oan nee mate ho tinan atus ida sanulu.
30 Ema Israel hakoi nia iha nia rain rasik iha sidade Timnat-Sera iha rejiaun foho ki-kiik Efraim nian, iha foho Gaas norte nian.
31 Ema Israel sira serbi NAI Maromak durante Josué nia moris tomak. Josué mate tiha, sei iha katuas lia nain balu nebee uluk haree buat hotu-hotu nebee NAI Maromak halo ba Israel. Durante katuas lia nain sira nee sei moris, ema Israel serbi nafatin NAI Maromak.
32 Uluk ema Israel sai husi rai Ejitu, sira lori ho José nia ruin. Nia ruin sira nee lori baa hakoi iha Sikem, iha rai nebee uluk Jacó sosa ho osan mutin atus ida husi Hamór nia oan sira. Hamór nee Sikem nia aman. Rai nee agora sai tiha José nia jerasaun sira nian.
33 Arão nia oan Eleazar mos mate. Ema Israel hakoi nia iha sidade Gibea, iha rejiaun foho ki-kiik Efraim nian, sidade nee uluk foo tiha ona ba Eleazar nia oan Fineas.