22
Suku lorosae fila ba sira nia rain
1 Hotu tiha Josué bolu ema suku Ruben, Gad ho Manassés sorin balu
2 hodi dehan ba sira, “Imi halo ona buat hotu nebee NAI Maromak nia atan Moisés haruka imi halo, imi mos halo ona buat hotu-hotu nebee mak hau haruka.
3 Durante tempu naruk nee imi nunka husik imi nia maluk sira, too ohin loron imi ajuda nafatin sira. Imi sempre hakaas aan hodi halo tuir NAI imi nia Maromak nia orden ba imi.
4 Agora NAI imi nia Maromak foo ona fatin hakmatek ba imi nia maluk sira tuir Nia promete ba sira. Nee duni imi bele fila ona ba imi nia hela fatin iha imi nia rain rasik. Rai nee mak NAI Maromak nia atan Moisés foo tiha ona ba imi iha mota Jordaun nia sorin ba.
5 Kuidadu di-diak hodi halo tuir ukun fuan ho lei nebee NAI Maromak nia atan Moisés foo ona ba imi. Hadomi NAI imi nia Maromak, moris tuir Nia hakarak, kaer metin Nia ukun fuan, sadere ba Nia no serbi Nia ho neon ho laran tomak.”
6 Koalia hotu tiha, Josué foo bensaun ba sira, depois haruka sira sai baa ona. Entaun sira fila fali ba uma.
7 Suku Manassés sorin balu, uluk Moisés foo rai ba sira iha rejiaun Basán iha mota Jordaun nia parte lorosae. Maibee ba sorin balu ida seluk, Josué foo rai iha mota Jordaun parte loromonu iha sira nia maluk Israel nia leet. Bainhira Josué haruka suku rua ho balu nee fila fali ba sira nia rain, nia foo bensaun ba sira.
8 Nia dehan, “Fila fali ba imi nia rain. Lori ho imi nia riku-soin bar-barak. Lori imi nia karau ho bibi barak teb-tebes. Lori hotu imi nia osan mutin ho osan mean, riti ho besi, lori imi nia hena barak teb-tebes. Too iha nebaa, sasaan sira nebee mak imi hadau tiha ona husi imi nia inimigu sira, imi fahe ho imi nia maluk sira.”
9 Entaun ema suku Ruben, Gad ho Manassés sorin balu fahe malu ho ema Israel sira seluk iha sidade Silo iha rai Kanaán. Sira fila fali ba sira nia rain iha rejiaun Gilead. Rai nee uluk sai sira nian ona tuir NAI Maromak nia orden liu husi Moisés.
Suku balu harii altar iha mota Jordaun
10 Bainhira ema suku Ruben, Gad ho Manassés sorin balu too iha rejiaun besik mota Jordaun iha rai Kanaán, sira harii altar boot ida iha mota ninin.
11 Ema Israel sira seluk rona katak sira harii ona altar ida iha Kanaán nia baliza, iha rejiaun mota Jordaun, iha parte Israel nian.
12 Rona nunee, ema Israel sira hotu halibur malu iha Silo atu halo funu hasoru sira.
13 Depois ema Israel sira haruka nai lulik Eleazar nia oan Fineas baa rejiaun Gilead hodi hasoru malu ho suku Ruben, Gad ho Manassés sorin balu.
14 Sira haruka Fineas hamutuk ho nai ulun Israel nain sanulu. Kada suku, sira haruka nai ulun ida, nai ulun sira nee hotu mesak xefi familia.
15 Bainhira sira too iha Gilead atu koalia ho ema suku Ruben, Gad ho Manassés sorin balu, nai ulun sira nee dehan,
16 “NAI Maromak nia povu tomak hatete nunee: ‘Nusaa mak imi fila kotuk ona ba Israel nia Maromak? Halo nusaa mak agora imi lao sees fali husi NAI Maromak? Imi harii tiha imi nia altar rasik hodi kontra Nia!
17 Sala nebee uluk ita halo iha foho Peor seidauk too ka? Iha tempu nebaa sala nee lori moras aat ida ba NAI Maromak nia povu. Too ohin loron ita seidauk hamoos ita nia aan husi sala nee.
18 Agora imi atu lao sees fali husi NAI Maromak ka? Se ohin loron imi kontra NAI Maromak, aban Nia sei hirus povu Israel tomak.
19 Agora, se karik imi nia rain la merese atu imi adora NAI Maromak iha nebaa, entaun hakur fali mota hodi hela iha NAI Maromak nia rain, NAI nia tenda hamriik iha rai nee. Simu rai iha ami nia leet hodi sai imi nian. Maibee la bele kontra NAI Maromak ka kontra ami hodi harii rasik altar ida, tanba NAI ita nia Maromak nia altar iha tiha ona.
20 Keta haluha, uluk Zerá nia oan Akan kontra NAI Maromak nia orden kona ba sasaan sira nebee mak tuir lo-loos nia tenki halo rahun hodi hatudu katak sasaan sira nee NAI Maromak nian. Tanba Akan nia sala nee mak NAI Maromak fakar Nia hirus ba povu Israel tomak. Laos Akan mesak deit mak hetan kastigu tanba nia sala nee.’ ”
21 Ema suku Ruben, Gad ho Manassés sorin balu hataan ba xefi familia sira husi Israel dehan,
22 “NAI mak Maromak Kbiit Nain! NAI mak Maromak Kbiit Nain! Nia hatene tanba saa mak ami halo ida nee. Ami hakarak povu Israel mos hatene. Se karik ami kontra duni NAI Maromak no la halo tuir Nia orden, entaun keta husik ami moris.
23 Se karik ami harii altar atu fila kotuk ba NAI Maromak, se ami hasae sakrifisiu tunu mutuk, oferta trigu, ka sakrifisiu amizade ba NAI iha altar leten, entaun husik NAI Maromak rasik mak kastigu ami ba.
24 Maibee ami harii altar nee tanba ami tauk, keta halo be aban bainrua imi nia jerasaun hatete ba ami nia jerasaun dehan, ‘Imi iha relasaun saida ho NAI, Israel nia Maromak?
25 NAI Maromak halo ona mota Jordaun sai baliza entre ami ho imi suku Ruben ho Gad, imi la hola parte iha NAI Maromak nia povu.’ Se imi nia jerasaun sira koalia nunee, sira bele halo ami nia jerasaun la hamtauk tan NAI Maromak.
26 Tanba nee mak ami desidi harii altar ida, laos atu halo sakrifisiu tunu mutuk ka sakrifisiu seluk.
27 Altar ida nee hanesan sinal ida entre ami ho imi, no mos ba ita nia jerasaun sira tuir mai katak, ami adora NAI Maromak iha Nia oin. Ami adora Nia ho ami nia sakrifisiu tunu mutuk, sakrifisiu amizade ho sakrifisiu sira seluk. Nunee aban-bainrua imi nia jerasaun sira sei la hatete ba ami nia jerasaun dehan, ‘Imi la tama iha NAI Maromak nia povu.’
28 Ami hanoin, se aban-bainrua imi koalia hanesan nee ba ami ka ba ami nia jerasaun sira, ami bele hataan nunee: ‘Haree ba altar ida nee, ami nia bei-ala sira halo tuir NAI Maromak nia altar, laos atu hasae sakrifisiu tunu mutuk ka sakrifisiu seluk, maibee sira halo ida nee nudar sinal entre ami ho imi.’
29 Ami nunka hanoin atu kontra NAI Maromak ka lao sees husi NAI nia dalan. Ami nunka hanoin atu harii altar ida atu hasae sakrifisiu tunu mutuk, oferta trigu ka sakrifisiu seluk ba NAI. Ami so iha deit mak NAI ita nia Maromak nia altar iha Nia tenda nia oin.”
30 Bainhira nai lulik Fineas ho xefi familia Israel nebee hamutuk ho nia nudar nai ulun povu nian rona ema suku Ruben, Gad ho Manassés sorin balu nia liafuan nee, sira senti hakmatek.
31 Nai lulik Eleazar nia oan Fineas hataan, “Ohin loron ami hatene katak NAI Maromak hamutuk ho ita, tanba imi la fila kotuk ba NAI Maromak, afinal imi kuidadu atu NAI Maromak la bele kastigu povu Israel.”
32 Depois nai lulik Eleazar nia oan Fineas ho nai ulun sira fahe malu ho ema suku Ruben ho Gad. Sira sai husi rejiaun Gilead hodi fila fali ba rai Kanaán. Too iha nebaa, sira hatoo fila fali informasaun nee ba povu Israel.
33 Rona nunee, povu Israel kontenti hodi hahii Maromak. Sira la koalia tan buat ida kona ba halo funu atu harahun rai nebee ema suku Ruben ho Gad hela ba nee.
34 Ikus mai ema suku Ruben ho Gad dehan, “Altar nee sai sasin ba ita hotu katak NAI mak Maromak.” Entaun sira hanaran altar nee Sasin.