21
Suku Levi simu sidade
1 Hotu tiha xefi familia sira husi suku Levi nian mai hasoru nai lulik Eleazar ho Nun nia oan Josué ho mos xefi familia husi suku Israel sira seluk
2 iha Silo iha rai Kanaán. Sira dehan, “NAI Maromak foo orden ba Moisés atu ami tenki simu sidade hodi hela ho mos rai luan haleu sidade hirak nee para ami bele hakiak animal.”
3 Entaun ema Israel halo tuir NAI Maromak nia orden nee. Sira foo sidade ho mos rai luan haleu sidade hirak nee husi sira nia teritoriu rasik ba suku Levi.
4 Sira dada rifa, rifa primeiru monu ba Kohat nia jerasaun tuir familia ida-idak. Ema Levi nebee mak nai lulik Arão nia jerasaun, sira hetan sidade sanulu resin tolu husi suku Judá, Simeão ho Benjamim.
5 Kohat nia jerasaun sira seluk hetan sidade sanulu husi familia sira iha suku Efraim, Dan ho suku Manassés sorin balu.
6 Gerson nia jerasaun sira hetan sidade sanulu resin tolu husi familia sira iha suku Isakar, Asér, Naftali, ho mos suku Manassés sorin balu nebee hela iha rai Basán.
7 Merari nia jerasaun tuir familia ida-idak hetan sidade sanulu resin rua husi suku Ruben, Gad ho Zebulón.
8 Ema Israel foo sidade hirak nee ho mos rai luan haleu sidade ba suku Levi tuir NAI Maromak nia orden ba sira liu husi Moisés.
9 Husi suku Judá ho suku Simeão nia rain, ema Israel foo sidade ho naran tuir mai
10 ba Arão nia jerasaun husi familia Kohat iha suku Levi, tanba sira mak hetan rezultadu rifa primeiru.
11 Sira hetan sidade Kiriat-Arba, Arba nee Anak nia aman. Sidade nee mos naran Hebron. Sira simu sidade nee hamutuk ho nia rai luan haleu, iha rejiaun foho ki-kiik rai Judá nian.
12 Maibee toos ho aldeia sira nebee haleu sidade nee, ema Israel sira foo tiha ona ba Jefune nia oan Caleb hodi sai ninian.
13 Nai lulik Arão nia jerasaun sira simu sidade hirak tuir mai nee: Hebron (nee sidade protesaun ida ba ema nebee halo ema mate la ho intensaun), Libna,
14 Jatir, Estemoa,
15 Holon, Debir,
16 Ain, Juta ho Bet-Semes. Husi suku rua nee, sira simu hamutuk sidade sia, ida-idak ho nia rai luan haleu.
17 Husi suku Benjamim nia rain, ema Israel foo sidade Gibeon ho Geba,
18 Anatot ho Almon, hamutuk sidade haat ida-idak ho nia rai luan haleu.
19 Sidade sira nebee nai lulik sira husi Arão nia jerasaun simu nee hamutuk sanulu resin tolu, ida-idak ho nia rai luan haleu.
20 Kohat nia jerasaun sira seluk husi suku Levi simu sidade husi suku Efraim.
21 Iha rejiaun foho ki-kiik Efraim nian, sira simu sidade Sikem (nee sidade protesaun ida ba ema nebee halo ema mate la ho intensaun), Gezer,
22 Kibzaim ho Bet-Horon, hamutuk sidade haat, ida-idak ho nia rai luan haleu.
23 Husi suku Dan sira simu sidade Elteke, Gibeton,
24 Aijalon ho Gat-Rimon hamutuk sidade haat, ida-idak ho nia rai luan haleu.
25 Husi suku Manassés sorin balu, sira simu sidade Taanak ho Gat-Rimon, hamutuk sidade rua, ida-idak ho nia rai luan haleu.
26 Nunee Kohat nia jerasaun sira seluk simu sidade sanulu, ida-idak ho nia rai luan haleu.
27 Gerson nia jerasaun sira husi suku Levi simu sidade hanesan tuir mai. Husi suku Manassés sorin balu, sira simu sidade Golan iha rai Basán (nee sidade protesaun ida ba ema nebee halo ema mate la ho intensaun), Be-Estera, hamutuk sidade rua, ida-idak ho nia rai luan haleu.
28 Husi suku Isakar, sira simu sidade Kision Daberat,
29 Jarmut ho En-Ganim hamutuk sidade haat, ida-idak ho nia rai luan haleu.
30 Husi suku Asér, sira simu sidade Misal, Abdon,
31 Helkat ho Rehob, hamutuk sidade haat, ida-idak ho nia rai luan haleu.
32 Husi suku Naftali, sira simu sidade Kedes iha rai Galileia (nee sidade protesaun ida ba ema nebee halo ema mate la ho intensaun), Hamot-Dor ho Kartan hamutuk sidade tolu, ida-idak ho nia rai luan haleu.
33 Nunee Gerson nia jerasaun sira simu sidade hamutuk sanulu resin tolu, ida-idak ho nia rai luan haleu.
34 Suku Levi sira seluk mak Merari nia jerasaun. Husi suku Zebulón, sira simu sidade Jokneam, Karta,
35 Dimna ho Nahalal, hamutuk sidade haat, ida-idak ho nia rai luan haleu.
36 Husi suku Ruben, sira simu sidade Bezer, Jahaz,
37 Kedemot ho Mefaat, hamutuk sidade haat, ida-idak ho nia rai luan haleu.
38 Husi suku Gad, sira simu sidade Ramot iha rejiaun Gilead (nee sidade protesaun ida ba ema nebee halo ema mate la ho intensaun), Mahanaim,
39 Hesbon ho Jazar, hamutuk sidade haat, ida-idak ho nia rai luan haleu.
40 Nunee Merari nia jerasaun, nee mak suku Levi nia jerasaun sira seluk, simu sidade hamutuk sanulu resin rua.
41 Entaun suku Levi simu sidade hamutuk haat-nulu resin walu iha teritoriu Israel nian, ida-idak ho nia rai luan haleu.
42 Sidade hirak nee hotu iha nia rai luan haleu.
43 Ho nunee rai tomak nebee uluk NAI Maromak promete ba ema Israel nia bei-ala sira, Nia foo ba sira. Sira sai nain ba rai nee hodi hela metin iha nebaa.
44 NAI Maromak halo sira hela hakmatek iha teritoriu tomak, hanesan uluk Nia promete ona ba sira nia bei-ala sira. La iha inimigu ida mak bele manaan sira, tanba NAI Maromak entrega tiha sira nia inimigu sira hotu ba sira nia liman laran.
45 Buat hotu-hotu nebee NAI Maromak promete ba ema Israel akontese hotu. La iha ida mak Nia la kumpri.