20
Sidade protesaun
1 Hotu tiha NAI Maromak haruka Josué
2 foo hatene ema Israel sira nunee: “Hili sidade balu sai sidade protesaun hanesan uluk Hau hatete tiha ona ba imi liu husi Moisés.
3 See mak halo mate ema laos ho intensaun atu oho, nia bele halai baa subar iha nebaa hodi salva aan husi familia matebian nebee mak hakarak atu oho fali nia.
4 Nia tenki halai ba sidade protesaun sira nee ida. Too iha nebaa nia tenki hamriik iha portaun sidade nian hodi hatoo lai problema nee ba katuas lia nain sira sidade nee ninian. Hotu tiha katuas lia nain sira sei lori nia tama iha sidade nee, no foo fatin ba nia para nia hela iha sira nia leet.
5 Se karik familia matebian duni tuir nia, katuas lia nain sira la bele entrega ema nee ba sira nia liman laran, tanba nia halo mate nia maluk hanesan asidente ida, laos tanba odi.
6 Nia tenki hela iha sidade nee too nia kazu nee rezolve tiha ona iha ema barak nia oin, depois hein tan too nai lulik boot iha tempu nebaa nee mate. Hotu tiha nia bele fila fali ba nia sidade rasik ho nia uma rasik, maski uluk nia halai sai husi nebaa.”
7 Rona nunee ema Israel sira hili sidade Kedes iha rai Galileia iha rejiaun foho ki-kiik Naftali nian, sidade Sikem iha parte foho Efraim nian ho sidade Kiriat-Arba (nee mak Hebron) iha rai Judá parte foho.
8 Sira hili tan sidade iha mota Jordaun nia sorin ba, iha sidade Jerikó nia parte lorosae. Nee mak sidade Bezer iha rai fuik maran iha rai aas suku Ruben nian, sidade Ramot iha rai Gilead, iha teritoriu suku Gad nian, ho sidade Golan iha rejiaun Basán iha teritoriu suku Manassés nian.
9 Sidade hirak nee mak sai sidade protesaun ba ema Israel hotu ho mos ema estranjeiru nebee hela iha povu Israel nia leet. Nunee see-see deit mak halo mate ema maibee laos ho intensaun atu oho nia, ema nee bele halai ba sidade hirak nee para familia matebian la bele oho nia molok nia hamriik hodi hataan iha ema barak nia oin.