19
Suku Simeão nia teritoriu
1 Rifa segundu monu ba suku Simeão tuir familia ida-idak. Sira nia rain nee iha suku Judá nia rain nia klaran.
2 Rai nee inklui sidade Berseba (ema bolu mos Seba), Molada,
3 Hazar-Sual, Bala, Ezem,
4 Eltolad, Betul, Horma,
5 Ziklag, Bet-Markabot, Hazar-Susa,
6 Bet-Lebaot ho Saruhen, hamutuk sidade sanulu resin tolu ho ida-idak nia aldeia.
7 Iha mos sidade Ain, Rimon, Eter ho Asan, hamutuk sidade haat ho ida-idak nia aldeia,
8 ho mos aldeia hotu nebee haleu sidade hirak nee too Baalat-Beer (ema mos bolu Rama) iha rai Negeb.
Nee mak rai sira nebee Simeão nia jerasaun sira simu hodi sai sira nian, tuir familia ida-idak.
9 Rai nebee Maromak foo ba Simeão nia jerasaun sira nee, foti husi suku Judá nian, tanba suku Judá nia rain boot liu. Nunee Simeão nia jerasaun sira simu rai iha Judá nia teritoriu laran.
Suku Zebulón nia teritoriu
10 Rifa terseiru monu ba suku Zebulón tuir familia ida-idak. Sira nia rai nia baliza too sidade Sarid.
11 Husi nee baliza halai ba loromonu baa iha Marala too sidade Dabeset baa tan too mota ida besik sidade Jokneam.
12 Husi Sarid baliza mos halai ba lorosae too baliza sidade Kislot-Tabor nian, baa Daberat, depois sae fali ba too Jafia.
13 Husi nee kontinua baa lorosae, baa Gat-Hefer, kontinua too Et-Kazin. Husi nee baa tan too sidade Rimon, depois baa fali sidade Nea.
14 Husi nee baliza halai liu parte norte sidade Hanaton nian too iha rai tetuk Ifta-El.
15 Teritoriu nee iha sidade Katat, Nahalal, Simron, Idala ho Belém, hamutuk sidade sanulu resin rua ho ida-idak nia aldeia.
16 Nee mak rai nebee Zebulón nia jerasaun sira simu hodi sai sira nian, tuir familia ida-idak.
Suku Isakar nia teritoriu
17 Rifa dala haat nian monu ba suku Isakar tuir familia ida-idak.
18 Sidade iha sira nia teritoriu mak Jezreel, Kesulot, Sunem,
19 Hafaraim, Sion, Anaarat,
20 Rabit, Kision, Ebez,
21 Remet, En-Ganim, En-Hada ho Bet-Pazez.
22 Sira nia baliza too sidade Tabor, Sahazima ho Bet-Semes, depois halai too mota Jordaun. Nee hamutuk sidade sanulu resin neen ho ida-idak nia aldeia.
23 Nee mak rai nebee Isakar nia jerasaun sira simu hodi sai sira nian, tuir familia ida-idak.
Suku Asér nia teritoriu
24 Rifa dala lima nian monu ba suku Asér tuir nia familia ida-idak.
25 Sidade iha sira nia teritoriu mak Helkat, Hali, Beten, Aksaf,
26 Alamelek, Amad ho Misal. Iha parte loromonu baliza halai too foho Karmel ho Sihor-Libnat.
27 Husi nee baa fali lorosae nian ba sidade Bet-Dagon. Husi nee sira nia rai baliza ho suku Zebulón too iha rai tetuk Ifta-El, depois baa fali norte too sidade Bet-Emek ho Neiel baa tan norte too sidade Kabul.
28 Baliza halai too Abdon, Rehob, Hamon ho Kaná too Sidon Boot.
29 Husi nee baliza halai fila fali ba sidade Rama too sidade Tiru, sidade nee moru forti haleu. Husi nee baa fali sidade Hosa too tasi Mediteráneu. Suku Asér mos hetan sidade Mahalab, Akzib,
30 Uma, Afek ho Rehob, hamutuk sidade rua-nulu resin rua ho ida-idak nia aldeia.
31 Nee mak rai nebee Asér nia jerasaun sira simu hodi sai sira nian, tuir familia ida-idak.
Suku Naftali nia teritoriu
32 Rifa dala neen nian monu ba suku Naftali tuir familia ida-idak.
33 Sira nia rai nia baliza hahuu husi sidade Helef besik ai huun boot iha sidade Za-Ananim, liu sidade Adami-Nekeb, Jabneel ho Lakum too mota Jordaun.
34 Husi nee baliza halai ba fali loromonu too Aznot-Tabor, depois baa tan too sidade Hukok. Iha parte sul, rai nee baliza ho suku Zebulón. Iha loromonu baliza ho Asér nia rain. Baliza iha parte lorosae mak mota Jordaun.
35 Sidade sira nebee moru forti haleu mak Zidim, Zer, Hammat, Rakat, Kineret,
36 Adama, Rama, Hazor,
37 Kedes, Edrei, En-Hazor,
38 Iron, Migdal-El, Horem, Bet-Anat ho Bet-Semes, hamutuk sidade sanulu resin sia ho ida-idak nia aldeia.
39 Nee mak rai nebee Naftali nia jerasaun sira simu hodi sai sira nian, tuir familia ida-idak.
Suku Dan nia teritoriu
40 Rifa dala hitu nian monu ba suku Dan tuir familia ida-idak.
41 Sidade iha sira nia teritoriu mak Zora, Estaol, Ir-Semes,
42 Saalabin, Aijalon, Itla,
43 Elon, Timna, Ekron,
44 Elteke, Gibeton, Baalat,
45 Jehud, Bene-Berak, Gat-Rimon,
46 Me-Jarkon ho Rakon. Sira mos simu rai nebee hateke malu ho sidade Jope.
47 Maibee suku Dan la konsege domina sira nia teritoriu, entaun sira sae baa ataka sidade Lesem hodi hadau sidade nee sai sira nian. Sira oho hotu ema iha sidade nee ho surik, depois sira hela iha nebaa. Sira hanaran sidade nee Dan, tuir sira bei-ala nia naran.
48 Nee mak rai nebee Dan nia jerasaun sira simu hodi sai sira nian, tuir familia ida-idak.
Josué nia teritoriu
49 Bainhira ema Israel sira fahe tiha hotu teritoriu ba suku ida-idak, sira mos foo rai balu iha sira nia leet ba Nun nia oan Josué,
50 tuir NAI Maromak nia orden. Sira foo sidade nebee mak Josué husu, nee mak Timnat-Sera iha rejiaun foho ki-kiik Efraim nian. Josué harii fila fali sidade nee hodi hela iha nebaa.
51 Rai sira nee hotu mak nai lulik Eleazar ho Nun nia oan Josué hamutuk ho xefi familia sira husi suku Israel ida-idak fahe ba suku Israel sira liu husi dada rifa. Sira dada rifa nee iha NAI Maromak nia oin iha odamatan tenda sorumutu nian iha Silo. Ho nunee sira fahe rai hotu ona.