18
Josué fahe rai ba suku hitu
1 Bainhira Israel domina tiha rai Kanaán tomak, povu Israel halibur hamutuk hotu iha Silo hodi harii tenda sorumutu iha nebaa.
2 Iha tempu nee ema Israel sei iha suku hitu mak seidauk hetan rai hodi sai sira nian.
3 Nunee Josué hatete ba povu Israel, “Imi sei hein too bainhira loos mak imi sai nain ba rai nebee NAI, imi nia bei-ala sira nia Maromak foo tiha ona ba imi?
4 Hili mane nain tolu husi suku ida-idak. Hau sei haruka sira baa lao haleu rai nee tomak hodi hakerek kondisaun rai nebee suku ida-idak sei simu hodi sai sira nian, depois sira lori mai hodi entrega ba hau.
5 Sira tenki fahe rai nee ba parte hitu. Suku Judá sei hela nafatin iha nia teritoriu iha parte sul, José nia jerasaun sira hela iha sira nia teritoriu iha parte norte.
6 Bainhira imi fahe ona rai nee ba parte hitu hodi hakerek ida-idak nia kondisaun, imi lori mai hodi entrega ba hau, depois hau dada rifa iha NAI ita nia Maromak nia oin.
7 Levi nia jerasaun sira sei la hetan teritoriu hodi sai sira nian, tanba sira nia riku-soin mak atu serbi NAI Maromak nudar nai lulik. Suku Gad, suku Ruben ho suku Manassés sorin balu, NAI Maromak nia atan Moisés foo ona rai ba sira iha mota Jordaun parte lorosae nebaa.”
8 Bainhira mane sira nebee atu haleu rai nee atu lao ona, Josué haruka sira, “Baa haleu rai nee hodi hakerek rai nee nia kondisaun. Hotu tiha lori mai. Hau sei dada rifa iha Silo iha NAI Maromak nia oin hodi fahe rai ba imi.”
9 Entaun mane sira nee baa dadauk, sira lao haleu rai nee. Sira fahe rai nee ba parte hitu, no hakerek sidade sira nebee tama iha parte ida-idak. Depois sira fila fali ba akampamentu iha Silo hodi entrega ba Josué.
10 Hotu tiha Josué dada rifa iha Silo, iha NAI Maromak nia oin hodi fahe rai ba ema Israel sira tuir suku ida-idak.
Suku Benjamim nia teritoriu
11 Rezultadu rifa primeiru monu ba suku Benjamim tuir familia ida-idak. Benjamim nia teritoriu nee monu iha teritoriu suku Judá ho suku José nia klaran.
12 Iha norte, sira nia baliza hahuu husi mota Jordaun, depois halai sae fali ba too iha Jerikó parte norte, kontinua liu husi rejiaun foho ki-kiik baa loromonu too iha rai fuik maran Bet-Aven.
13 Husi nee baa too iha sidade Lus parte sul. Lus nia naran seluk Betél. Husi Lus tuun fali ba Atarot-Adar iha foho ida iha Bet-Horon Kraik nia parte sul.
14 Husi foho nee nia parte loromonu, baliza halai fila fali ba sul too sidade Kiriat-Baal, nee mak Kiriat-Jearim. Ida nee baliza parte loromonu.
15 Baliza parte sul hahuu husi Kiriat-Jearim baa fali loromonu nian too bee matan Neftoa.
16 Depois husi bee matan nee tuun fali ba foho huun nebee hateke malu ho rai tetuk Ben-Hinom iha rai tetuk Refa parte norte. Husi nee tuun fali ba rai tetuk Hinom, iha foho lolon sidade Jebus nian parte sul. Husi nee tuun ba tan too bee matan En-Rogel,
17 depois halai ba fali norte too iha bee matan En-Semes. Husi nee baa rai Gelilot hateke malu ho dalan sae ba foho Adumim nian, depois halai tuun fali ba fatuk Bohan, Bohan nee Ruben nia oan.
18 Husi nee halai liu fali ba foho lolon Bet-Araba parte norte, depois tuun ba tan too Araba.
19 Husi Araba halai liu ba foho lolon Bet-Hogla parte norte too tasi Mate parte norte iha mota ain Jordaun nian. Ida nee mak baliza parte sul.
20 Mota Jordaun mak sai baliza iha parte lorosae. Nee hotu baliza rai suku Benjamim nian tuir sira nia familia ida-idak.
21 Sidade sira nebee suku Benjamim hetan tuir familia ida-idak mak hanesan tuir mai nee: Jerikó, Bet-Hogla, Emak-Kezis,
22 Bet-Araba, Zemaraim, Betél,
23 Avim, Para, Ofra,
24 Kefar-Amoni, Ofni ho Geba, hamutuk sidade sanulu resin rua ho ida-idak nia aldeia.
25 Iha tan Gibeon, Rama, Beerot,
26 Mispá, Kefira, Moza,
27 Rekem, Irpeel, Tarala,
28 Zela, Haelef, Jebus (nee mak Jerusalém), Gibea ho Kiriat-Jearim, hamutuk sidade sanulu resin haat ho ida-idak nia aldeia.
Nee mak rai sira nebee Benjamim nia jerasaun sira simu hodi sai sira nian, tuir familia ida-idak.