17
Teritoriu nebee suku Manassés nia jerasaun sorin balu simu iha parte loromonu
1 Manassés nia jerasaun hetan rai liu husi dada rifa. Manassés nee José nia oan mane boot. Manassés nia oan mane boot Makir, Makir nia oan Gilead. Makir nia jerasaun hetan rai Gilead ho Basán tanba nia nee funu nain ida.
2 Manassés nia jerasaun sira seluk hetan rai liu husi dada rifa, depois fahe tuir familia ida-idak. Familia sira nee mak Abiezer, Helek, Asriel, Sikem, Hefer ho Semida. Sira nee hotu José nia oan Manassés nia jerasaun.
3 Manassés nia jerasaun ida naran Zelofehad la iha oan mane, nia iha deit oan feto. Zelofehad nee Hefer nia oan, Hefer Gilead nia oan, Gilead Makir nia oan, Makir Manassés nia oan. Zelofehad nia oan feto sira mak Mala, Noa, Hogla, Milka ho Tirza.
4 Iha loron ida sira baa hasoru nai lulik Eleazar, Nun nia oan Josué, ho mos nai ulun sira seluk hodi dehan, “NAI Maromak haruka Moisés atu foo rai ba ami hanesan mos ho ami nia naan sira.” Entaun Josué foo rai ba sira iha sira nia aman nia maluk sira nia leet, tuir NAI Maromak nia orden.
5 Nunee Manassés nia jerasaun sira hetan rai Gilead ho Basán iha mota Jordaun nia sorin ba, ho mos rai parte sanulu iha loromonu,
6 tanba Manassés nia jerasaun Zelofehad nia oan feto sira hetan rai hanesan mos ho sira nia naan sira. Rai Gilead foo tiha ona ba Manassés nia jerasaun sira seluk.
7 Suku Manassés nia teritoriu hahuu husi baliza teritoriu Asér nian too sidade Mikmetat iha sidade Sikem parte lorosae. Husi nee baliza halai ba parte sul too ema nia hela fatin besik bee matan Tapua.
8 Rai besik iha sidade Tapua sai suku Manassés nian, maibee sidade nee sai suku Efraim nian tanba sidade nee iha loos fronteira entre suku rua nee.
9 Husi Tapua baliza baa tan sul too mota Kaná. Iha mota Kaná nia parte sul, sidade balu suku Manassés nian, balu Efraim nian. Husi nee baliza Manassés nian halai tuir mota parte norte too tasi Mediteráneu.
10 Suku Efraim nia rain iha parte sul, suku Manassés nia rain iha parte norte. Manassés nia teritoriu too tasi Mediteráneu, no baliza ho teritoriu Asér iha parte norte, husi parte lorosae baliza ho suku Isakar.
11 Suku Manassés mos iha sidade balu iha suku Isakar ho Asér nia teritoriu laran. Sidade sira nee mak Bet-Sean, Ibleam, Dor hamutuk ho nia povu tomak, Endor, Taanak ho Megido. Sidade Dor ema hanaran mos Nafot. Sidade sira nee ida-idak ho nia aldeia haleu.
12 Maibee suku Manassés sira la konsege hadau sidade hirak nee entaun ema Kanaán sira sei hela nafatin iha rejiaun nee.
13 Too ikus bainhira ema Israel sira sai forti ona, sira halo ema Kanaán sira servisu hanesan atan maibee la duni sai ema Kanaán sira nee hotu.
José nia jerasaun sira protesta
14 José nia jerasaun sira dehan ba Josué, “NAI Maromak foo bensaun ba ami too ami sai barak ona. Tanba saa mak ita boot foo rai parte ida deit ba ami hodi sai ami nian?”
15 Josué hataan, “Se imi ema barak maibee rejiaun foho ki-kiik nebee foo ona ba suku Efraim nee kloot liu ba imi, entaun imi sae ba iha ai laran iha ema Perez ho ema Refa sira nia rain hodi loke ai laran ba imi nia aan.”
16 José nia jerasaun sira hataan, “Rejiaun foho ki-kiik nee la too ba ami. Maibee ema Kanaán sira nebee hela iha rai tetuk iha sidade Bet-Sean ho nia aldeia sira ho mos iha rai tetuk Jezreel nian, sira iha kuda kareta funu nian nebee halo husi besi.”
17 Josué hataan ba José nia jerasaun sira, nee mak suku Efraim ho Manassés dehan, “Imi barak loos no forti teb-tebes. Entaun imi sei la hetan rai parte ida deit,
18 maibee imi sei hetan tan rai iha rejiaun foho ki-kiik nian. Imi mos sei loke ai laran iha nebaa hodi halo rejiaun nee tomak sai imi nian. Imi sei duni sai ema Kanaán sira husi rai tetuk maski sira forti no iha kuda kareta besi.”