16
Teritoriu nebee José nia jerasaun simu
1 José nia oan sira nia jerasaun hetan rai liu husi dada rifa hanesan tuir mai nee. Rai nee hahuu husi mota Jordaun iha bee matan Jerikó nia parte lorosae. Husi nee sae ba liu husi rai fuik maran tama ba rejiaun foho ki-kiik too sidade Betél.
2 Husi Betél (hanaran mos Lus) liu ba Atarot iha ema Ark sira nia rain.
3 Husi nee tuun fali ba loromonu too iha ema Jaflet sira nia rain, baa tan too Bet-Horon, depois Gezer too ikus liu iha tasi Mediteráneu.
4 Rai hirak nee foo ba José nia jerasaun hodi sai sira nian, sira nee mak suku Manassés ho Efraim.
Teritoriu nebee Efraim nia jerasaun simu
5 Teritoriu nebee Efraim nia jerasaun sira hetan tuir familia ida-idak mak hanesan tuir mai nee. Rai nee nia baliza lorosae nian hahuu husi sidade Atarot-Adar, baa too Bet-Horon Leten.
6 Husi nee baliza halai too tasi Mediteráneu. Baliza husi norte liu kona sidade Mikmetat, baa fali lorosae too Taanat-Silo. Husi nee baa tan too iha Janoa nia parte lorosae.
7 Husi Janoa halai tuun fali ba sidade Atarot ho Naara, depois liu kona Jerikó, no ikus liu too iha mota Jordaun.
8 Husi sidade Tapua baliza halai ba fali loromonu too iha mota Kaná, no ikus liu too iha tasi Mediteráneu.
Nee mak rai sira nebee Efraim nia jerasaun sira simu hodi sai sira nian, tuir familia ida-idak.
9 Suku Efraim mos hetan sidade balu iha rai nebee suku Manassés hetan, sidade hirak nee ida-idak ho nia aldeia haleu.
10 Maibee sira la duni sai ema Kanaán sira nebee hela iha sidade Gezer. Nunee ema Kanaán sira nee sei hela nafatin iha ema suku Efraim sira nia leet too ohin loron, maibee sira sai hanesan atan hodi servisu ba ema Efraim sira.