15
Suku Judá nia teritoriu
1 Judá nia jerasaun hetan rai liu husi dada rifa, depois fahe tuir familia ida-idak. Rai Judá nee nia baliza halai ba parte sul too fronteira rai Edom nian, depois baa tan too rai fuik maran Zin.
2 Rai nee nia baliza iha parte sul hahuu husi tasi Mate parte sul,
3 kontinua ba foho Sakunar parte sul, baa liu tan too iha rai fuik maran Zin, sae tan ba sidade Kades-Barnea parte sul, baa tan too sidade Hezron, sae ba sidade Adar, depois baa fali sidade Karka.
4 Husi nee baa tan too sidade Azmon, halai tuir mota Ejitu, depois baa too iha tasi Mediteráneu. Ida nee mak suku Judá nia baliza parte sul.
5 Baliza rai iha parte lorosae tuir tasi Mate too mota Jordaun. Baliza parte norte nian hahuu husi mota ibun Jordaun nian,
6 depois halai sae fali ba sidade Bet-Hogla, baa tan too sidade Bet-Araba parte norte, depois baa fatuk Bohan, Bohan nee Ruben nia oan.
7 Husi fatuk Bohan, baliza halai liu husi rai klean Akor sae ba too iha sidade Debir, depois fila fali ba parte norte nian atu baa Gilgal, Gilgal nee hateke malu ho rai lolon Adumim iha mota sorin parte sul. Husi nee baliza halai liu ba bee matan En-Semes, depois kontinua ba tan too bee matan En-Rogel.
8 Husi bee matan nee baliza sae liu kona rai tetuk Ben-Hinom iha sidade Jerusalém nia parte sul, Jerusalém nee mos naran Jebus. Husi nee sae fali ba too foho tutun nebee mak iha rai tetuk Ben-Hinom nia parte loromonu, iha rai tetuk Refa nia parte norte.
9 Husi foho tutun nee baa tan too bee matan Neftoa, depois baa fali sidade sira nebee besik foho Efron. Husi nee baa fali too iha sidade Baalá, nee mak Kiriat-Jearim.
10 Husi sidade nee halai fali liu kona Baalá parte loromonu, baa tan too iha foho Seir, depois halai tuir foho lolon Jearim parte norte, foho nee mos naran Kesalon. Husi nee baliza halai tuun ba fali sidade Bet-Semes, depois baa too Timna.
11 Husi nee baa fali foho lolon iha sidade Ekron nia parte norte, depois halai fila fali ba sidade Sikeron, halai liu fali foho Baalá too iha sidade Jabneel, ikus liu too iha tasi.
12 Fronteira parte loromonu mak tasi Mediteráneu.
Nee mak suku Judá sira nia baliza rai. Sira simu rai nee tuir familia ida-idak.
Caleb halo funu manaan sidade Hebron
13 NAI Maromak haruka ona Josué atu foo rai ba Jefune nia oan Caleb iha teritoriu Judá nian. Josué mos halo tuir, nia foo sidade Kiriat-Arba, Arba nee ema Anak nia bei-ala. Sidade nee mos naran Hebron.
14 Depois Caleb duni sai tiha ema Anak husi sidade nee. Sira nee mak Anak nia oan nain tolu Sesai, Ahiman ho Talmai sira nia jerasaun.
15 Husi Hebron Caleb sae baa halo funu hasoru ema Debir, sidade Debir nee uluk naran Kiriat-Sefer.
16 Caleb dehan, “Ema nebee mak baa asalta no hadau Kiriat-Sefer, hau sei foo hau nia oan feto Aksa hodi sai nia kaben.”
17 Iha tempu nebaa, Caleb nia alin Kenaz nia oan Otniel konsege hadau sidade nee, entaun Caleb foo nia oan Aksa ba Otniel hodi sai nia kaben.
18 Bainhira sira nain rua kaben, Aksa foo hatene nia laen para husu nia aman Caleb hodi foo toos ida. Depois Aksa baa atu hasoru nia aman. Bainhira Aksa tuun husi nia kuda buru, Caleb husu, “O hakarak saida?”
19 Aksa hataan, “Foo tan bensaun mai hau. Apaa foo ona rai iha rai maran Negeb mai hau, agora foo mos bee matan.” Nunee Caleb foo bee matan rua ba nia, ida iha leten, ida iha kraik.
Suku Judá nia sidade
20 Sidade sira nebee Judá nia jerasaun sira hetan hodi sai sira nian, tuir familia ida-idak mak hanesan tuir mai nee.
21 Judá nia jerasaun sira nia sidade iha parte sul liu, besik ho baliza rai Edom nian mak nee: Kabzeel, Eder, Jagur,
22 Kina, Dimona, Adada,
23 Kedes, Hazor, Itnan,
24 Zif, Telem, Bealot,
25 Hazor-Hadata, Keriot-Hezron (nee mak Hazor),
26 Amam, Sema, Molada,
27 Hazar-Gada, Hesmon, Bet-Pelet
28 Hazar-Sual, Berseba, Biziotia
29 Baalá, Iim, Ezem,
30 Eltolad, Sesil, Horma,
31 Ziklag, Madmana, Sansana,
32 Lebaot, Silhim, Ain ho Rimon, hamutuk sidade rua-nulu resin sia, ida-idak ho nia aldeia.
33 Sidade sira iha foho huun parte loromonu nian mak Estaol, Zora, Asna,
34 Zanoa, En-Ganim, Tapua, Enam,
35 Jarmut, Adulam, Soko, Azeka,
36 Saraim, Aditaim, Gedera ho Gederotaim, hamutuk sidade sanulu resin haat, ida-idak ho nia aldeia.
37 Iha tan sidade Zenan, Hadasa, Migdal-Gad,
38 Dilean, Mispá, Jokteel,
39 Lakis, Bozkat, Eglon,
40 Kabon, Lamas, Kitlis,
41 Gederot, Bet-Dagon, Naama ho Makeda, hamutuk sidade sanulu resin neen, ida-idak ho nia aldeia.
42 Iha mos Libna, Eter, Asan,
43 Ifta, Asna, Nezib,
44 Keila, Akzib ho Maresa, hamutuk sidade sia, ida-idak ho nia aldeia.
45 Iha tan sidade Ekron ho nia sidade ho aldeia sira nebee haleu,
46 ho mos sidade sira nebee besik Asdod iha Ekron ho tasi Mediteráneu nia klaran, ida-idak ho nia aldeia.
47 Iha mos sidade Asdod ho Gaza ho sidade ho aldeia sira nebee haleu sidade rua nee. Iha mos rai too mota Ejitu no too tasi ibun Mediteráneu nian.
48 Iha rejiaun foho ki-kiik iha sidade tuir mai: Samir, Jatir, Soko,
49 Dana, Kiriat-Sana (nee mak Debir),
50 Anab, Estemo, Anim,
51 Gosen, Holon ho Gilo, hamutuk sidade sanulu resin ida, ida-idak ho nia aldeia.
52 Iha mos Arab, Duma, Esan,
53 Janim, Bet-Tapua, Afeka,
54 Humta, Kiriat-Arba (nee mak Hebron) ho Zior, hamutuk sidade sia, ida-idak ho nia aldeia.
55 Iha tan Maon, Karmel, Zif, Juta,
56 Jezreel, Jokdeam, Zanoa,
57 Kain, Gibea ho Timna, hamutuk sidade sanulu, ida-idak ho nia aldeia.
58 Iha tan Halhul, Bet-Zur, Gedor,
59 Maarat, Bet-Anot ho Eltekon, hamutuk sidade neen, ida-idak ho nia aldeia.
60 Iha tan Kiriat-Baal (nee mak Kiriat-Jearim) ho Rabá, hamutuk sidade rua, ida-idak ho nia aldeia.
61 Sidade sira nebee iha rai fuik mak Bet-Araba, Midin, Sekaka,
62 Nibsan, Sidade Masin ho En-Gedi, hamutuk sidade neen, ida-idak ho nia aldeia.
63 Maibee ema Judá la konsege duni sai ema Jebus, sira nee hela iha sidade Jerusalém. Tanba nee mak too ohin loron ema Jebus sira hela nafatin iha Jerusalém iha suku Judá sira nia leet.