14
Lider Israel sira fahe rai iha mota Jordaun parte loromonu
1 Rai hirak tuir mai nee mak nai lulik Eleazar, Nun nia oan Josué ho xefi familia sira fahe ba suku Israel sira iha rai Kanaán para sai sira nian.
2 Suku sia ho balu simu rai liu husi dada rifa, tuir NAI Maromak nia orden ba Moisés.
3 Suku rua ho balu, Moisés foo tiha ona rai ba sira iha mota Jordaun nia sorin ba. Suku Levi la hetan rai.
4 Nunee iha nafatin suku sanulu resin rua simu rai tanba José nia jerasaun sira fahe ona ba suku rua, Manassés ho Efraim. Suku Levi la hetan teritoriu. Sira so hetan deit sidade balu hodi hela, ho mos rai luan haleu sidade ida-idak hodi hakiak sira nia karau ho bibi.
5 Ema Israel sira fahe rai tuir orden nebee NAI Maromak foo ba Moisés.
Caleb simu sidade Hebron
6 Iha loron ida, Judá nia jerasaun sira baa hasoru Josué iha Gilgal. Too iha nebaa, Jefune nia oan Caleb, nia ema Kenaz, hatete ba Josué, “Ita boot hatene buat nebee NAI Maromak koalia ba Nia liman-ain Moisés iha Kades-Barnea kona ba ita nain rua.
7 Iha tempu nebaa hau tinan haat-nulu. NAI Maromak nia atan Moisés haruka hau lao husi sidade Kades-Barnea hodi hafuhu rai nee. Bainhira hau fila fali ba, hau konta lo-loos ba nia kona ba buat nebee mak hau haree.
8 Hau nia maluk sira nebee baa hamutuk ho hau halo povu Israel sira seluk sai tauk teb-tebes. Maibee hau lae, hau tuir nafatin NAI hau nia Maromak ho hau nia laran tomak.
9 Iha loron nee Moisés jura mai hau dehan, ‘Rai nebee o nia ain sama iha nebaa nee sei sai o nian ho o nia jerasaun sira nian too tinan ba tinan, tanba o tuir NAI hau nia Maromak ho o nia laran tomak.’
10 NAI Maromak hatoo liafuan nee ba Moisés tinan haat-nulu resin lima liu ba. Iha tempu nebaa povu Israel sira muda ba-mai iha rai fuik maran. Agora haree ba, NAI Maromak kuidadu hau nia moris tuir Nia promesa. Agora hau tinan walu-nulu resin lima ona.
11 Hau sei forti nafatin hanesan uluk bainhira Moisés haruka hau baa hafuhu rai. Hau nia forsa sei nafatin hanesan uluk. Hau sei forti atu bele halo funu, hau atu halo saida deit, sei bele.
12 Nee duni agora foo rai iha rejiaun foho ki-kiik nebee NAI Maromak promete mai hau iha tempu nebaa. Iha loron nebaa ita boot rasik rona katak, iha rejiaun nee iha ema Anak ho sira nia sidade bo-boot ho moru forti haleu. Se NAI Maromak hamutuk ho hau, hau sei duni sai sira tuir NAI hatete tiha ona.”
13 Depois Josué harohan atu NAI Maromak foo bensaun ba Caleb, Jefune nia oan nee. Josué foo sidade Hebron ba nia para sai ninian.
14 Too ohin loron sidade Hebron sai Jefune nia oan Caleb, ema Kenaz nee ninian. Tanba nia tuir NAI, Israel nia Maromak ho nia laran tomak.
15 Sidade Hebron nee uluk naran Kiriat-Arba. Arba nee ema ida nebee mak boot liu iha ema Anak sira nia leet.
Hotu tiha rai nee hakmatek, funu para ona.