13
Rai nebee mak ema Israel seidauk domina
1 Bainhira Josué katuas loos ona, NAI Maromak hatete ba nia, “O katuas loos ona, maibee sei iha rai barak mak imi seidauk manaan.
2 Rai sira nee mak ema Filistin ho ema Gesur sira nia rain tomak,
3 hahuu husi mota Sior iha Ejitu parte lorosae too fronteira sidade Ekron iha parte norte, rai hirak nee hotu uluk ema Kanaán nian. Ema Filistin sira nee iha liurai nain lima, liurai hirak nee ukun iha sidade Gaza, Asdod, Askelon, Gat ho Ekron.
Imi mos seidauk foti ema Aveu sira nia rain
4 iha parte sul. Iha tan ema Kanaán nia rain inklui ema Sidon nia sidade Meara too sidade Afek, sidade nee baliza ho ema Amori sira nia rain.
5 Iha tan ema Gebal sira nia rain ho mos rejiaun Líbanu parte lorosae nian tomak, husi sidade Baal-Gad iha foho huun Hermon too dalan atu tama ba sidade Hamat.
6 Iha tan ema sira nebee hela iha rejiaun foho ki-kiik husi Líbanu too sidade Misrefot-Maim. Rai hirak nee hotu ema Sidon mak hela.”
NAI Maromak dehan tan, “Hau rasik mak sei duni sai ema sira nee iha ema Israel sira nia oin. O tenki fahe rai nee ba ema Israel sira hodi sai sira nian, tuir Hau nia orden.
7 O tenki fahe rai nee ba Israel suku sia ho mos ba suku Manassés sorin balu hodi sai sira nian.”
Rai iha mota Jordaun parte lorosae
8 Suku Manassés sorin balu seluk ho suku Ruben ho Gad, NAI nia atan Moisés foo tiha ona rai ba sira iha mota Jordaun parte lorosae.
9 Rai nee hahuu husi sidade Aroer iha mota ninin Arnon nian, inklui sidade ida iha rai tetuk Arnon nia klaran, ho mos rai aas husi sidade Medeba too sidade Dibon.
10 Rai nee inklui mos sidade sira nebee uluk ema Amori sira nia liurai Sihon ninian, Sihon nee ukun husi sidade Hesbon. Rai nebee Moisés foo nee baliza ho ema Amon sira nia rain.
11 Sira mos simu rai Gilead, ema Gesur ho ema Maaka sira nia rain, foho Hermon tomak ho rejiaun Basán tomak too sidade Saleka.
12 Rai hirak nee hotu iha rejiaun Basán. Uluk liurai Og mak ukun rai nee husi sidade Astarot ho Edrei. Og nee mesak deit mak sei hela husi ema Refa sira, tanba Moisés halakon sira hodi duni sai sira hotu, depois foti tiha sira nia rain.
13 Maibee ema Israel la duni sai ema Gesur ho ema Maaka. Too ohin loron sira hela nafatin iha Israel nia leet.
14 So suku Levi deit mak Moisés la foo rai ba sira. Maibee tuir Maromak nia promesa, sira simu ai haan husi oferta tunu nebee povu foo ba NAI, Israel nia Maromak.
Teritoriu nebee Moisés foo ba suku Ruben
15 Uluk Moisés foo rai ba suku Ruben para sai sira nian, tuir ida-idak nia familia hanesan tuir mai.
16 Rai nee inklui sidade Aroer iha rai klean Arnon nia ninin, ho mos sidade ida iha rai klean nee nia klaran, ho rai tetuk tomak nebee besik Medeba,
17 Iha mos sidade Hesbon ho sidade sira hotu nebee iha rai tetuk besik Hesbon. Iha tan sidade Dibon, Bamot-Baal, Bet-Baal-Meon,
18 Jahaz, Kedemot, Mefaat,
19 Kiriataim, Sibma, ho Zeret-Saar, sidade nee iha foho oan nia leten iha rai tetuk nee.
20 Iha mos sidade Bet-Peor, foho lolon Pisga ho sidade Bet-Jeximot.
21 Nee dehan katak, suku Ruben simu sidade hotu-hotu iha rai tetuk nee ho mos ema Amori sira nia liurai Sihon nia rain tomak. Sihon nee uluk ukun husi sidade Hesbon. Moisés halakon tiha nia ho mos ema Midian sira nia nai ulun sira, nee mak Evi, Rekem, Zur, Hur ho Reba, sira nee hotu ukun iha liurai Sihon nia okos no hela iha rai nee.
22 Iha tempu nebaa ema Israel oho ema barak ho surik. Ida mak Beor nia oan Balaão, nia nee siik door ema nia futuru.
23 Suku Ruben nia rain baliza ho mota Jordaun.
Rai hirak nee ho nia sidade ho aldeia sira hotu sai Ruben nia jerasaun sira nian tuir ida-idak nia familia.
Teritoriu nebee Moisés foo ba suku Gad
24 Moisés foo rai ba suku Gad para sai sira nian, tuir ida-idak nia familia.
25 Sira nia teritoriu inklui sidade Jazar ho sidade hotu-hotu iha rejiaun Gilead, ho ema Amon sira nia rain sorin balu too sidade Aroer iha Rabá parte lorosae.
26 Sira nia teritoriu mos husi sidade Hesbon too Ramat-Mispá ho Betonim, no husi sidade Mahanaim too Debir.
27 Iha tan sidade iha rai tetuk, nee mak Bet-Haram, Bet-Nimra, Sukot ho Zafon. Iha tan Sihon liurai Hesbon nia rain balu. Suku Ruben nia rain baliza ho mota Jordaun too fali tasi Galileia nia parte sul.
28 Rai hirak nee ho nia sidade ho aldeia sira hotu sai Gad nia jerasaun sira nian tuir ida-idak nia familia.
Teritoriu nebee Moisés foo ba suku Manassés sorin balu
29 Moisés foo rai ba suku Manassés sorin balu para sai sira nian, tuir ida-idak nia familia.
30 Sira nia teritoriu inklui sidade Mahanaim ho rai Basán tomak, Basán nee uluk liurai Og nia rain. Rai nee iha sidade neen-nulu nebee uluk Jair hadau tiha ona.
31 Moisés mos foo rejiaun Gilead sorin balu ho sidade Astarot ho Edrei iha liurai Og nia rain Basán. Sidade hirak nee hotu foo ba Manassés nia oan Makir nia jerasaun tuir familia ida-idak. Makir nia jerasaun nee mak Manassés nia jerasaun sorin balu.
32 Nee mak rai nebee Moisés fahe ba suku Israel balu iha rai tetuk Moab iha mota Jordaun nia sorin ba, rai nee baliza ho sidade Jerikó nia parte lorosae.
33 Maibee Moisés la foo teritoriu ba Levi nia jerasaun para sai sira nian. Tanba sira nia riku-soin mak NAI, Israel nia Maromak, hanesan uluk Maromak promete ona ba sira.