12
Liurai nebee lakon funu hasoru Israel iha parte lorosae
1 Iha liurai nain rua nebee uluk lakon funu hasoru Israel iha mota Jordaun parte lorosae nebaa, depois ema Israel mak sai nain fali ba rai nee. Liurai sira nee nia rain husi mota Arnon too foho Hermon. Rai tetuk Jordaun parte lorosae tomak tama hotu.
2 Liurai sira nee, ida mak Sihon liurai suku Amori, nia hela iha sidade Hesbon. Nia teritoriu hahuu husi sidade Aroer iha mota Arnon nia ninin, no husi rai tetuk Arnon nia klaran too fali mota Jabok, mota nee mak baliza ho suku Amon. Rai nebee nia ukun nee mak rejiaun Gilead sorin balu.
3 Nia mos ukun rai tetuk iha mota Jordaun parte lorosae husi tasi Galileia too tasi Mate, baa tan too sidade Bet-Jeximot, ho mos rai iha sul too foho lolon Pisga.
4 Liurai ida seluk mak Og, liurai Basán. Ema Refa sira hela uitoan deit, ida mak nia. Nia hela iha sidade Astarot ho sidade Edrei.
5 Nia ukun husi foho Hermon, sidade Saleka, ho rai Basán tomak too baliza ho ema Gesur ho ema Maaka sira nia rain, ho mos Gilead sorin balu too baliza ho Sihon liurai Hesbon nia rain.
6 NAI Maromak nia atan Moisés hamutuk ho ema Israel halakon ona liurai nain rua nee. NAI Maromak nia atan Moisés nee foo sira nia teritoriu ba Ruben ho Gad nia jerasaun sira ho mos Manassés nia jerasaun sorin balu hodi sai sira nian.
Liurai nebee lakon funu hasoru Israel iha parte loromonu
7 Liurai sira nebee lakon funu hasoru Josué ho ema Israel iha mota Jordaun parte loromonu mak hanesan tuir mai. Liurai sira nee hela iha rejiaun husi sidade Baal-Gad iha rai tetuk Líbanu too foho Halak sae ba rejiaun Seir. Rai nee Josué foo ba Israel nia jerasaun sira tuir suku ida-idak hodi sai sira nian.
8 Nee foho, foho huun parte loromonu nian, rejiaun Araba, foho lolon parte lorosae, rai fuik ho rejiaun Negeb. Rai hirak nee uluk ema Ete, Amori, Kanaán, Perez, Heveu ho ema Jebus sira nian.
9 Liurai sira nebee lakon funu nee mak liurai Jerikó, liurai Ai besik sidade Betél,
10 liurai Jerusalém, liurai Hebron,
11 liurai Jarmut, liurai Lakis,
12 liurai Eglon, liurai Gezer,
13 liurai Debir, liurai Geder,
14 liurai Horma, liurai Arad,
15 liurai Libna, liurai Adulam,
16 liurai Makeda, liurai Betél,
17 liurai Tapua, liurai Hefer,
18 liurai Afek, liurai Lasaron,
19 liurai Madon, liurai Hazor,
20 liurai Simron-Meron, liurai Aksaf,
21 liurai Taanak, liurai Megido,
22 liurai Kedes, liurai Jokneam iha foho Karmel,
23 liurai Dor iha Nafot-Dor, liurai Goim iha Gilgal
24 ho liurai Tirsa. Liurai sira nee hamutuk nain tolu-nulu resin ida.