11
Israel halakon liurai sira iha Kanaán parte norte
1 Jabin liurai Hazor rona katak ema Israel sira manaan funu hirak nee. Nunee nia haruka ema baa bolu liurai sel-seluk hodi halibur sira hamutuk. Nia bolu Jobab liurai Madon nian, liurai Simron, liurai Aksaf,
2 liurai sira iha foho parte norte, liurai sira iha rai tetuk mota Jordaun husi tasi Galileia parte sul nian, ho mos liurai sira nebee hela iha foho huun parte loromonu nian besik sidade Nafot-Dor.
3 Liurai Jabin mos bolu liurai sira husi Kanaán parte lorosae ho loromonu nian. Nia bolu ema Amori sira, ema Ete sira, ema Perez ho mos ema Jebus sira husi rejiaun foho ki-kiik, nia bolu mos ema Heveu sira iha foho huun Hermon nian iha rai Mispá.
4 Liurai sira nee sai baa ho sira nia tropas hotu. Sira barak teb-tebes, hanesan rai henek iha tasi ibun. Sira iha kuda ho kuda kareta funu nian barak teb-tebes.
5 Liurai sira nee hotu lori sira nia tropas baa harii tenda hamutuk besik iha mota Merom atu halo funu hasoru Israel.
6 NAI Maromak hatete ba Josué, “Lalika tauk sira, tanba aban oras hanesan nee Hau sei halo sira mate hotu hodi entrega ba imi nia liman laran. Imi sei tesi kotu sira nia kuda nia ain uat. Sira nia kuda kareta imi sei sunu hotu.”
7 Entaun Josué ho nia militar sira hotu baa hodi ataka sira derepenti deit iha mota Merom.
8 NAI Maromak entrega sira ba Israel nia liman laran. Ema Israel ataka sira, no duni sira too sidade Sidon Boot ho sidade Misrefot-Maim. Ema Israel duni tan too rai tetuk Mispá iha parte lorosae. Ema Israel oho sira hotu, la iha ida mak moris.
9 Josué halo tuir Maromak haruka, nia tesi kotu sira nia kuda nia ain uat, no sunu sira nia kuda kareta.
10 Hotu tiha Josué baa fali hadau sidade Hazor hodi oho nia liurai ho surik, tanba liurai nee mak lidera liurai sira seluk hodi halo funu hasoru Israel.
11 Ema hotu nebee iha hela sidade nee, militar Israel oho ho surik. Hotu-hotu mate, la iha ida mak moris. Depois Josué sunu tiha sidade Hazor nee.
12 Josué hadau tiha hotu liurai sira seluk nia sidade. Nia oho hotu liurai sira nee, no oho mos ema hotu-hotu iha sidade sira nee ho surik, tuir orden nebee uluk NAI Maromak nia atan Moisés haruka.
13 Maibee sidade sira nebee harii iha foho oan nia tutun, ema Israel la sunu, so Hazor deit mak sira sunu.
14 Sasaan ho animal sira iha sidade hirak nee sira foti hotu, maibee populasaun tomak, sira oho ho surik. Ema hotu-hotu mate, la iha ida mak moris.
15 Uluk NAI Maromak foo orden ba nia atan Moisés hodi halo ida nee, depois Moisés foo tutan orden nee ba Josué. Josué mos halo tuir orden tomak nebee NAI Maromak foo ba Moisés.
Sidade sira nebee Josué hadau
16 Ho nunee Josué hadau rai nee tomak. Nia manaan rejiaun foho ki-kiik, rai Negeb tomak, rejiaun Gosen tomak ho foho huun. Nia hadau foho ho rai tetuk iha rejiaun mota Jordaun nian,
17 husi foho Halak besik Seir too iha sidade Baal-Gad iha rai Líbanu iha foho huun Hermon.
18 Josué halo funu hasoru liurai hirak nee durante tempu naruk.
19 Sidade hotu-hotu iha rai nee, la iha ida mak dame malu ho Israel, so ema Heveu sira nebee hela iha sidade Gibeon deit mak halo akordu pas ho sira. Sidade sira seluk, ema Israel sira halo funu hasoru sira hotu too manaan.
20 Tanba NAI Maromak mak halo ema sira nee nia laran toos para halo funu hasoru ema Israel, atu nunee ema Israel la bele hanoin sira maibee oho sira hotu. Ema Israel halo sira mate mohu, tuir orden nebee NAI Maromak foo ba Moisés.
21 Iha tempu nebaa Josué oho hotu ema Anak sira nebee hela iha rejiaun foho ki-kiik tomak Judá ho Israel nian. Ema sira nee hela iha sidade Hebron, Debir ho Anab. Josué oho sira hotu no halo rahun sira nia sidade.
22 Nunee la iha tan ema Anak ida mak moris iha rai Israel. Maibee sei iha ema Anak balu hela iha sidade Gaza, Gat ho Asdod.
23 Ho nunee Josué hadau rai nee tomak tuir buat hotu nebee NAI Maromak foo hatene ona ba Moisés. Hotu tiha Josué fahe rai nee ba ema Israel tuir suku ida-idak. Rai nee hakmatek ona, funu para ona.