3
Jonas baa sidade Nínive
1 Depois NAI Maromak lia tuun ba Jonas ba dala rua dehan,
2 “Baa kedas iha sidade boot Nínive. Lia menon nebee Hau dehan ba o, o tenki hatoo ba povu iha nebaa.”
3 Jonas halo tuir Maromak nia liafuan hodi baa iha Nínive. Nínive nee sidade ida boot teb-tebes, atu lao haleu sidade nee tomak haan loron tolu.
4 Jonas komesa tama ba sidade. Nia lao durante loron ida tomak, depois nia foo sai dehan, “Hela loron haat-nulu tan, Nínive sei rahun.”
5 Ema Nínive sira fiar ba Maromak nia lia menon nee. Entaun sira deklara ema hotu-hotu tenki halo jejun. Husi ema boot too ema kiik, sira hotu hatais hena lutu.
6 Bainhira lia menon nebee Jonas foo sai nee too ba liurai Nínive nia tilun, liurai hamriik husi nia kadeira ukun, hasai tiha nia batina liurai nian, no taka fali hena lutu ba nia isin hodi tuur iha rai rahun laran.
7 Nia foo sai deklarasaun iha Nínive hanesan tuir mai nee: “Liurai ho nia ukun nain sira hasai orden nunee: ‘La bele husik ema ka animal, karau ka bibi haan buat ida. See-see deit la bele haan, la bele hemu.
8 Ema ho mos animal sira tenki taka ho hena lutu. Ema ida-idak tenki harohan ba Maromak ho laran tomak. Ida-idak tenki husik tiha nia hahalok aat ho violensia nebee mak nia halo.
9 See mak hatene? Dala ruma Maromak bele muda Ninia hanoin, Nia bele hatudu Nia laran luak mai ita hodi husik tiha Ninia laran nakali, nunee ita sei la mate mohu.’ ”
10 Bainhira Maromak haree buat nebee sira halo nee, no haree katak sira husik ona sira nia hahalok aat, Nia muda Nia hanoin. Dezastre nebee uluk Nia dehan atu hatuun ba sira, Nia la halo.