2
Jonas harohan ba NAI Maromak
1 Husi ikan nia kabun laran, Jonas harohan ba NAI nudar nia Maromak.
2 Nia dehan,
“Ohin iha susar laran hau halerik ba NAI,
NAI hataan tiha ona hau.
Husi matebian sira nia fatin hau harohan husu tulun;
Ita Boot rona ona hau nia lia halerik.
3 Ita Boot soe hau ba tasi klean;
too liu tasi kidun.
Korenti tasi dulas hau ba-mai;
Ita Boot nia laloran nadodon mai halo mout tiha hau.
4 Hau dehan, ‘Ita Boot duni tiha ona hau sai husi Ita Boot nia oin;
maski nunee hau sei hateke fali ba Ita Boot nia uma kreda santu.’
5 Bee taka tomak hau too hau atu mate;
bee klean haleu tiha hau;
duut tasi nian bobar tiha hau nia ulun.
6 Hau mout too foho huun;
hau too iha tasi okos, nia portaun taka metin too tinan ba tinan.
Maibee NAI hau nia Maromak,
Ita Boot hasae tiha hau husi matebian sira nia fatin.
7 NAI, Bainhira hau nia iis besik ona atu kotu,
hau hanoin Ita Boot.
Hau nia orasaun too iha Ita Boot
iha Ita Boot nia uma kreda santu.
8 Sira nebee adora estatua lulik folin laek,
sira see kotuk ba Maromak nia laran luak.
9 Maibee hau lae, hau sei hasae sakrifisiu ba Ita Boot
ho knananuk agradesimentu nian.
Hau sei halo tuir buat nebee hau promete tiha ona.
Salvasaun mai husi NAI Maromak.”
10 Hotu tiha NAI Maromak haruka ikan boot nee muta sai tiha Jonas ba iha rai maran.