Jonas
1
Jonas halai sees husi NAI Maromak
1 NAI Maromak lia tuun ba Amitai nia oan Jonas dehan,
2 “Baa kedas sidade boot Nínive hodi hatoo ba povu iha nebaa katak, sira nia hahalok aat too ona Hau nia oin.”
3 Maibee Jonas hahuu halai fali ba rai Tarsis atu bele sees husi NAI Maromak nia prezensa. Nia lao tuun ba portu Jafa, iha nebaa nia hetan roo ida nebee mak atu baa sidade Tarsis. Nia selu tiha roo, nia sae ba atu halai sees husi NAI Maromak.
4 Depois NAI Maromak haruka anin boot huu ba tasi, laloran boot teb-tebes, too roo nee atu nakfera sal-sala.
5 Haree nunee ema sira nebee servisu iha roo nee tauk, nunee sira hotu hamulak ho lian makaas ba sira ida-idak nia maromak. Sira soe naha hotu-hotu ba tasi laran atu hakmaan roo nee. Maibee iha tempu nebaa, Jonas tuun tiha ona ba roo laran parte okos liu hodi latan aan iha nebaa too toba haluha rai.
6 Kapitaun roo nian tuun ba hodi dehan, “Oinsaa mak o bele toba dukur tiha nunee?! Hadeer kedas hodi harohan ba o nia maromak! Dala ruma nia sei tulun ita, nunee ita sei la mate mohu.”
7 Depois ema sira nebee servisu iha roo dehan ba malu, “Mai ita dada rifa atu ita bele hatene see loos mak lori dezastre nee mai ita.” Entaun sira dada rifa, rifa monu loos ba Jonas.
8 Entaun sira husu ba Jonas, “Hatete took mai ami, see loos mak lori susar boot nee mai ita? O servisu saida? O mai husi nebee? O husi nasaun nebee? O husi suku ida nebee?”
9 Jonas hataan, “Hau nee ema Ebreu. Hau adora NAI, Nia mak Maromak lalehan nian, Nia mak halo tasi ho rai.”
10 Rona nunee, sira tauk loos, depois sira husu ba Jonas, “O halo saida mak nee?” Sira hatene ona katak nia halai sees husi NAI Maromak, tanba nia dehan ona nunee ba sira.
11 Laloran tasi nian kontinua aumenta siak liu tan. Entaun sira husu ba Jonas, “Ami tenki halo saida ba o atu nunee tasi sai hakmatek fali?”
12 Jonas hataan, “Hiit hau hodi soe ba tasi laran, nunee tasi sei hakmatek fali. Hau hatene katak, tanba hau nia sala mak tasi siak makaas nee akontese ba imi.”
13 Maski nunee sira la halo ida nee, sira hakaas aan atu hean makaas roo nee ba fali rai maran, maibee la konsege, tanba laloran tasi sai siak liu tan.
14 Entaun sira harohan ho lian makaas ba NAI Maromak dehan, “NAI, keta husik ami mate tanba ami halakon ema ida nee nia moris. Keta foo sala mai ami tanba ami oho ema nebee la sala. Tanba NAI, Ita Boot halo tuir ona Ita Boot nia hakarak.”
15 Depois sira hiit Jonas soe ba tasi laran. Derepenti tasi siak nee sai hakmatek kedas.
16 Haree nunee, sira hamtauk teb-tebes NAI Maromak, sira hasae sakrifisiu ba NAI Maromak hodi halo promesa ba Nia.
17 Maibee NAI Maromak haruka ikan boot ida hodi tolan tiha Jonas. Jonas hela iha ikan nee nia kabun laran durante loron tolu kalan tolu.