4
Jonas hirus tanba NAI Maromak la harahun sidade Nínive
1 Maibee Jonas hanoin buat nebee Maromak halo nee la diak liu, nunee nia hirus.
2 Nia harohan ba NAI Maromak nunee: “NAI, uluk hau sei iha hau nia rain rasik, hau dehan tiha ona katak Ita Boot sei halo hanesan ida nee. Tanba nee mak uluk kedas hau koko atu halai ba iha sidade Tarsis. Tanba hau hatene Ita Boot Maromak ida nebee laran diak no laran luak, Pasiensia Nain no nakonu ho domin rohan-laek. Ita Boot prontu dada fila fali dezastre nebee mak Ita Boot atu foo.
3 Nunee NAI, hasai tiha hau nia vida ba. Diak liu hau mate duke hau moris.”
4 Maibee NAI Maromak hataan, “O hirus hanesan nee diak ka lae?”
5 Jonas sai tiha husi sidade hodi baa tuur iha fatin ida iha parte lorosae nian. Nia harii baraka ida iha nebaa, nia tuur hamahon aan iha okos hodi hein atu haree saida mak sei akontese ba sidade nee.
6 Depois NAI Maromak haruka ai horis ida moris buras lalais too iha Jonas nia ulun leten hodi foo mahon ba nia ulun, nunee satan netik nia husi loron manas. Jonas kontenti teb-tebes ho ai horis nee.
7 Maibee iha aban fali loron matan atu sae, Maromak haruka ular oan ida mai, ular oan nee haan ai horis nee, nunee ai horis nee namlaik.
8 Bainhira loro matan sae dadauk, Maromak haruka anin manas huu husi lorosae. Loro matan halo Jonas nia ulun manas loos, too nia oin nakukun. Nia hakarak atu mate. Nia dehan, “Diak liu hau mate duke hau moris.”
9 Maibee Maromak dehan ba Jonas, “O hirus kona ba ai horis nee diak ka lae?”
Jonas hataan “Diak duni. Hau hirus teb-tebes too atu mate tiha deit.”
10 Maibee NAI Maromak dehan, “O preokupa loos ho ai horis nee, maski o la kuda no la tau rai metan ba nia huun. Ai horis nee moris buras iha kalan ida, iha kalan tuir mai mate fali.
11 Entaun nusaa mak Hau la bele preokupa fali ho sidade boot Nínive? Sidade nee iha povu liu rihun atus ida rua-nulu, sira la hatene sira nia liman loos mak nebee, liman karuk mak nebee. Iha mos animal barak.”