25
Samuel Thi
1 Tun Samuel athi tan ahile Israel mite jouse avui dingin ahung kikhom un, athilong chu a-op uvin, Ramah khoa a-inah avui tauvin ahi.
Nabal In David Asuh Lunghang
Hichun David chu Maon gamthip ah akumsuh tan ahi.
2 Maon a kon nei le gou tampi neiyah mihaothei tah khat Carmel khopia kiveina bol mi khat aum'in ahi. Ama chun kelngoi sang 3,000 chule kelcha 1,000 aneijin ahi chule hiche phatlai chu kelmulvo phatlai ahi.
3 Hiche mipa min chu Nabal akitin, ajinu min chu Abigail akitin ahi. Ajinu chu numei chingtah ahin, thil umdan hekhen themtah jong ahin, amel jong mel-hoi tah ahi. Ajipa vang chu Caleb phungmi, umdan, chondan helou mi ahin, giloutah a chon jeng ahi.
4 Nabal kitipa hin kelngoi avah e tihi David in ahedoh tan ahi.
5 Hijeh chun David in gollhang somkhat asolin Nabal henga thuthot le salam gabol din asol in ahi.
6 Hichun gollhangho chun, “Chamna le khantouna nang le na insunga chule nanei le nanga chengse chunga umhen!” atiuvin ahi.
7 “Nangman kelngoi mulvou ding miho chu keiho Carmel kom'a nakoiye ti kajan, keihon suh gentheina ima kanei pouve chule amahoa kon'in jong ima guh le lah kanei pouve.
8 Namite ho dong jong le chun adihtah chu naseipeh nauvinte. Golvah nikho khat le kahung diu ahin, kipah tah a neisan diu David in adeiye. Lungset tah in napeh thei-thei neipeuvin, na lhacha keiho le nagol ngaitah keima David min'in,” ati.
9 David gollhangho chun David minin hicheng chu Nabal henga alhut uvin chule ama hon Nabal donbutna angah uvin ahi.
10 Nabal in jong noise tah in, “David kitipa chu koi hija ham? Hiche Jesse chapa hi ama le ama ipia kigel ham? Tulaiya hi soh tamtah apakai teu henga konna jammang atam e.
11 Achutile, iti keiman ka kelngoi mulvou a pangho ka thapeh kelngoisa, a twidon ding u chule aneh diu ka changlhah jouse hi kalahpeh a, kahet phahlou gam'a hungkon miho chu kapeh beh ding hija ham?” atipeh tai.
12 Hichun David gollhangho chu ahung kinungle uvin, Nabal in asei jouse chu David heng’ah alhut tauvin ahi.
13 Chuin David in, “Na chemjam kigot un!” atin, hichun mi 400 toh akilhon’un, chule mi 200 anunglam uva thilkeo ngah din adalha uvin ahi.
14 Hichun Nabal soh ho lah a mi khat in Abigail aga hetsah in, “David in gamthip gam'a kon'in gollhangho kapu kom'a salam boldin asol'in ahileh ana phohsal in ahi.
15 Gollhang ho chu keiho dinga phatah ahiuve, keihon amahoa kon'in hahsatna imacha katoh khapouve, kaum khom sung uvin jong keihoa kon'in imacha alahdoh ujong aumpoi.
16 Sun le janin keiho leh kelngoiho dingin baang bangin eihong jingun, eingah tup jing uve.
17 Hiche thu ho hi nangman nahet chet angaiye chule ipi bolding ham ti nagel angaiye, ajeh chu ka pakai pa le a insung mite jousea ding’a thil hahsa hungsoh dingin akilom e. Ama la alungtong lheh in koimacha to kihou thei ahipoi,” ati.
18 Hichun Abigail in gangtah in changlhah lhon 200 akigot in, lengpitwi savun peng ni dimset agongin, honminsa kelngoi nga akigot in, changpoh kana atena dim nga agon, lengpithei changlhah boh 100 toh, theichang changlhah a kisem 200, hciheng hi, amanun sangan chungah asemin,
19 asohte jah ah, “Ana che masauvin, keiman kahin juipai ding nahiuve,” ati.
20 Abigail chu asangan chunga atouvin molchunga akal touvin, aman David le amite ama langa ahung chu amun ahi.
21 David in, “Hiche Nabal kitipa gancha jouse chu keiman khatcha beh jong manthah sah louva gammang noija kachinpeh chu panna beija kabol dan ahitai, tun Nabal in ka thilpha bol jouse thilsen eihin lethoh pehtai.
22 Jingkah teng Nabal mi ahi kiti tapou pasal khatna khat jeng cha jong hinghoi louva ka thagam louva ahile, Pakaijin keima David hi eithat jeng hen,” tin aseitai.
Nabal Dia Abigail Taona
23 Abigail in David amu phat in, asangan chunga kon'in akumlhan amasang ah akunin abohkhup in jana apen ahi.
24 Akengphang bul’a abohkhup in ajah a, “ka pakai, thilsoh hicheng ho hi keima themmona ahi jenge, chule nahenga kasei hi, nei ngaipeh in.
25 Hiche Nabal hi milungtong le mipha ahipoi, thupitah in lahih in, ajeh chu ama hi mingol ahi bouve amin tobang banga ama jong hija ahi. Ahinla kapun nahinsol gollhangho chu nasoh nun kana mulou ahi,” ati.
26 “Tujengin jong Pakai hingjing min'a kasei ahi, kapu jong nahin laihin Pakaijin thisanso a themmo sahna ding jousea na hoidoh sah ahitan, nakhut tah a phu nalah ding jong aphallousa ahitai, hijeh chun suhset ding tha dinga nahol a na melmate jouse chu Nabal tobang hisohkei uhen.
27 Na sohnu keiman hiche nangma le na gollhang ho neh le chah dia kahin poh hi kapu nei sanpeh tei-teijin.
28 Na sohnu hi ipi hile ka themmona aum leh abonchan nei ngaidam in. Pakai dia galsat nahi jeh in Pakaijin nang le na chilhah te lenga natung jing uhen chule na hinkho lhumkeijin thilse bolda jengin,” ati.
29 “Midang hon na that dingin hung kipat uhenlang, nahol hol jeng jongleu, kapu na hinkho hi Pakai na Pathen'in nei le gou manlutah bangin naveng tup jingin ahi. Ahin na melma te jouse gophel a songchang kikap mang bang’a akap mang ding ahi.
30 Chujongleh na chung chang thudol'a Pakaijin aseisa jouse chu kapu dinga na bolpeh sohkeiya, Israel chunga lenga natun tengleh,
31 hitobang ho hi nolnabei nahina chu kipuisetsah hih in. Chutile ajeh beiya mitha jeh ham ahilou le nangin naphu nakilah jeh ham a nalung gimpi louding ahi. Chuleh Pakaijin kapu nangma chung’a phatecha a na inchen sah tengleh, na sohnu keijong neihin geldoh tei teiyin,” ati.
32 David in Abigail adonbut in, “Tunia Israel Pathen'in keito kimuto dinga nahinsol jeh in, Pakai chu thangvah in umhen!
33 Thil nahet them jeh in Pathen thangvah in umhen! Nangma jong phatthei chang in, ajeh chun nangman tuni hin kathemmona ding thisan kaso a kei le kei phulahna a kakhut kalapna dinga kon'in nei huhdoh tai.
34 Pakai Israel Pathen min a kasei ahi, Pakaijin nangho eisuhsetda sah ahitai, neihung kimupi loi hih le chun jing khovah masang’a Nabal mite khat a khatcha kahinghoi louding ka thagam hel diu ahitai,” ati.
35 Hichun David in jong athilpeh chengse akisan in, chule amanu jah ah, “Lungmong tah in na inlam'a chetan, keiman na thusei kangai peh in, na inneipu jong katha louding ahitai,” ati.
36 Hiti chun Abigail ahung kilekit a ain agalhun phat in, Nabal chun a insungah lengpa golvah ni bangin kut ana bollin ahi. Ama chu ju hakham in akhamin, hijeh chun amanun jong ajing jingkah chan geijin David toh akimuto thu jong aseipeh tapoi.
37 Jingkah khovah lhah a Nabal jong ajukhamna a konna ahung limdoh phat in, ajinun thilsoh umchan jouse chu abonchan aseipeh tan ahileh atija behseh jengin, alungsunga alung achat tapon, ajalkhun a songtum bangin akitung dentai.
38 Nisom jouvin, Pakaijin Nabal chu adengin, athipai tan ahi.
Daivd In Abigail Akichenpi
39 David in Nabal thi ajah phat in, “Pakai thangvah in umhen, Nabal khutna konna jumsona hiche Nabal chunga phu eilahpeh chu nunnom hen. Nabal in achonset man akisan ahitai,” ati. Chuin David in Abigail henga aji hina dingin thuthot aneijin, agadoh sah tan ahi.
40 Chuin thupole ho chu Carmel alhun phat un, Abigail jah a, “David in jia nei dia, nang puiya eihinsol’u ahi,” aga tiuve.
41 Hichun Abigail chu tol’ah abohkhup in hitin adonbut in, “Kei, nasohnu, David toh kakichen ding kakipah e, alhacha hiya akeng soppeh dia gotsa kahi,” ati.
42 Abigail jong lungkin tah in akigongin, akipatdoh pai paiyin, sangan chung khat a akaldoh in ama jenlea pangji asoh numei nga chu akipuiyin, David sohte nung ajuijin, David ji dingin apangtai.
43 David chun Jezreel kho mi Ahinoam jong akichenpin, anigel lhon'in ajidin apang lhontai.
44 Hiche kahlah chun Saul chun achanu Michal kitinu, David jinu chu Gallim kho mi Palti chapa Laish chu aji din apetai.