24
David In Saul Hinkho Ahinghoi
1 Saul in Philistine mite agasat a ahung kile jouvin, En-gedi gamthip mun’ah David aluttai tithu aseipeh tauvin ahi.
2 Hijeh chun Saul in Israel mite jousea kon'in galsat them cheh mi 3,000 akilhen doh in David le amite hol dingin gam kelcha umna songkol lang’ah aga hol tauvin ahi.
3 Saul chu ahunga ahile lampia kelngoi honlah khat agatoh khan, hiche laiya chun songkohom khat aumin, hikom'a chu chomkhat kicholdo din aluttai, hiche songko sunga adan sungnung lang ma-ma a chu David le aloite kisel ahiuve!
4 David loihon ajah a guhthimin, “Tuhi nang dia phat kijen petcha ahi! Tunia hi Pakaijin asei, ‘Keiman na melma pa chu nakhut a kapeh doh a, nangman na phatsah lam-lam'a nabol ding ahi’ tia asei nikho chu tunia hi hunglhunga ahitai,” atiuve. Hijeh chun David jong akipatdoh in, kangchan akithol thol’in, Saul sangkhol chol mong chu aga attan peh tan ahi.
5 Ahin David in Saul sangkhol chol mong chu aga attan chu alungsunga nommo asan ahi.
6 Hijeh chun amite jah a, “Pakaijin ahet ahi, hiche hi kana bollou ding dol ahi, ajeh chu amahi ka pakai le kaleng ahi. Pakaijin adeilou, ka pakai le ka lengpa chunga hiche kabol hi alhendohsa le athaonu doudal kahi,” atin ahi.
7 Hijeh chun David in a sepai te chu atuhtang nah-nah in, Saul chu atha sah tapon ahi.
Saul athouvin songko adalhah a, alampia akiche phat in,
8 David ahung potdoh in anung ajuijin asamin, “Ka pakai le lengpa!” atileh Saul ahung kihei phat in ama jabolnan David tol’a abohkhup in chibai aboh in ahi.
9 Chuin hitin Saul jah a asamin, “Ipi bolla nangin mipi ho thusei na ngaiya, keihin nang chu kasuh genthei dan a nagel ham?
10 Tuni nikho tah jeng’a jong nangman namit tah in namun ahi, hichu atahbeh ahi. Ajeh chu Pakaijin kei khotona noiyah songko sung jenga jong nakoijin ahi. Kamite ho phabep khat in katha ding hitam tia eidoh uva kana noplou ahi. Ipi jeh inem itileh, ‘Keiman ka lengpa sugenthei louding kahi. Ama hi Pakai thaonu sa ahi,’
11 Ven, kapa, kakhutna ipi kachoi em? Na sangkholchol among kachelhah chu bou kachoi ahi bouve! Nathat pong kate. Nas ugenthei pong kate ti vetsahna a keiman nangma kasuh genthei louding chule nangin tha dingin nei del le-le jong lechun na chunga ka chonset louding ahi,” ati.
12 “Pathen chu eini kah a ahetoh, athutan ahi. Ijem tia kei chunga nabolla ahile Pathen'in gotna napeh ding ahi, ahinlah ken vang nang kasuh genthei louding ahi.
13 Thuchih lui khat in, ‘Miphalou hoa kon'in, thil phalou tohdoh in aum'e,’ ati. Hijeh chun nang douna a itih chan hijongleh kakhut kalap louding ahi.
14 Israel lengpa chu koipen nunga hung hija, koipen thu nung nahin dal mong-mong ham? Uicha thisa khat tou ham, uili khattou nung del nahim?
15 Hijeh chun Pakai chu thutanin pang henlang, kei le nang kikah a thutan pa hijing jeng hen,” ati.
16 Chuin David in aseiding jouse asei jou phat in Saul in ahin donbut in, “Thu hin sei a chu chapa David mong-mong nahi hinam?” atin akap pan tan ahi.
17 Chule David kom'a aseijin, “Nang hi kei sangin nadih e, ajeh chu keiman na chunga thil phalou jeng kabollin ahin nangman vang thilpha jengin nei lethuh jing jenge,” atitai.
18 “Henge, nangman hepina dihtah in tunin nei ngailun, nei tha theina ding laitah a jong neithat pon ahi.
19 Hitobang hi mihem khat in amelma pa ato khah a ahile damsel a alhadoh mong-mong ding hinam? Hijeh chun tunia kei dinga thilpha na boldoh jeh in Pakaijin thilpha na bolpeh tei-tei hen.
20 Chule tun keiman kichen tah in kahetai, nangma Israel te leng nahung hitei tei ding ahi.
21 Hijeh chun tunin Pakai minin kaheng'a kitem'in, ‘Kathi nung le ka insung jong na hinghoiya, ka khanggui le ka chilhah jong nei hoipeh teijin!” ati.
22 Chuin David jong Saul kom'a akihahsel in, hichun Saul jong inlam ajon tan; David le asepai chengse akulpiu mun'a akaltou tauvin ahi.