23
David In Keilah Khopi Ahuhdoh
1 Nikhat David heng’ah thu ahung lhungin, Philistine miten Keilah kho abulu uvin, chule changphol'a chang jouse jong akichom gam tauve, ahung tiuve.
2 David in Pakai kom'a, “Kaga che a kaga sat ding ham?” tia adoh leh
Pakaijin ahin donbut in, “Henge, chenlang Keilah khopi khu ga huhdoh in,” ati.
3 Ahinlah David sepai ten ajah a, “Ven eiho Judah gamsung jenga jong kichatah a um ihiuvin, i-atileh Keilah khoa icheuva hiche Philistine sepai te khujatpi khutoh ikisattopi thei diu ham?” atiuve.
4 Hijeh chun David in jong Pakai adongkit in ahile, Pakaijin ajah a, “Keilah ah kumsuh un. Ajeh chu keiman kapanpia Philistine mite najo dingu ahi,” ati.
5 Hijeh chun David le asepai te jong Keilah khopi ah acheuvin, Philistine te agasat un, mi tamtah agathat tauve, chule agancha jouseu ahin kikai’un chule Keilah kho miho jong ahuhdoh un ahi.
6 Ahimelech chapa Abiathar chu Keilah khopia konna ahung jamdoh a David kom ahin jot chun, Thempu von ompho khat ahin kipohlut in ahi.
7 David chu Keilah kho ah ahung luttai tithu Saul’in ajah phat in, “Apha lheh jenge! Tua vang hi Pathen'in kakhutna apehdoh ahitai, ajeh chu kulpi kaikhumsa, kulpi kikamkhum sung’a David hi ama amacham'a hung vahlut ahitai,” ati.
8 Hitah chun Saul in asepai te jouse akhom-khom sohkeiyin, Keilah khopi chu ahin nokhum’un, David le asepai te chu aumkhum tauvin ahi.
9 Ahinlah David in Saul thilgon jouse chu ahen, Abiathar thempupa jah ah, “Thempu von ompho chu hikom'ah hinchoiyin,” ati.
10 Chuin David in, “Vo Pakai Israel Pathen, keima hiche mun'a kaum jeh hin Saul in Keilah khopia hung’a akhopi hi suhchim ding tohgon aneijin ahi.
11 Hiche kho mite hin keima hi amaho khutna eipehdoh diu ham? Chule Saul hung mong ding hinam? Vo Pakai Israel Pathen, lungsettah in nei seipeh in,” tin ataovin ahi.
Chuin Pakaijin,“Hung ding ahi,” tin adonbut in ahi.
12 David in jong, “Keilah khopia lamkaiho hin, keima le ka sepai te hi Saul khutna eipeh doh dingu ham?” tin adong kit in ahi.
Chule Pakaijin, “Henge ama hon na pehdoh dingu ahi,” tin ahin donbut in ahi.
David Thinglhang’a Akisel
13 David le amite chu 600 vel alhin phat un, Keilah mun chu adalha uvin thinglhang lang’ah apotdoh ule David chu ajamdoh tai ti thu chu Saul lengpan ajahdoh phat in Keilah khopi lam chu anajon tapoi.
14 David vang chu gamthip lah ah munthip khat ah aumin, Ziph gamthip thinglhang gamlah achun apansa dentai.
15 Nikhat chu Horesh kom vella David aum pet in, Saul chun David tha ding hollin Ziph lam ahin jon touve tithu ajatan ahi.
16 Hichun Jonathan in jong David kimupia Pathen tahsan tah a dingdet kheh dingin atilkhou dingin ahol in ahi.
17 Jonathan’in, “Kicha hih in, kapan na mudoh jou ponte! Nangma Israel te leng nahung hi ding ahi, keima kapa banga nang ban a kahi ding ahi, hichu kapa Saul in ahet ahi,” tin ana tilkhouvin ahi.
18 Hijeh chun amanin Pakai masang ah kitepna khat anei lhon'in ahi. Chuin Jonathan ain lamah akilen, David vang chu Horesh mun ah aumden tai.
19 Chujouvin Ziph miho chu Gibeah mun'a Saul hengah acheuvin, David chu apedoh tauvin ahi. “Keihon akiselna mun kaheuve. Ama tuhin Jeshimon lhanglam’a um Hakilah thinglhang gamsung Horesh kulpi dunga keiho lah a David kisel ahi,” atiuvin ahi.
20 “Vo lengpa nakigot chaiya nakigin phat-phat a nahung konsuh a ahile keiho jaonan na panpi uving ting, David chu nangma khut a pedoh nauvinge,” aga tiuvin ahi.
21 Hichun Saul in jong, “Pakaijin phatthei naboh uhen, ajeh chu nang hon hibangtah in keima ding neihin gelkhoh peh uve.
22 Cheloiyun lang, phate chan gaphochen un, aumna mun, agena mun, gahechen set uvin lang gavechil chet tauvin, ajeh chu, ama hi mi kilep themtah ahi.
23 Hijeh chun akiselna mun hoilai ham ti, gavechil sohkei uvin ima jouse he sohkei uvin lang, kaheng'a hungkit uvin, chutengleh keijong nangho toh kilhon a icheuva agamsunga David aumpou pouva ahileh ka holdoh tei-tei ding ahi,” ati.
24 Hijeh chun amaho jong akipatdoh uvin Ziph gam langa chun Saul sang'in ana che masa tauve.
David le asepai te chu hiche pet a hi Jeshimon lhanglam a Arabah gamsung Maon gammang noiya kisel’ah ahiuve.
25 Saul le amiten ahol'e leuve ti David in ajahdoh phat in, gamthip sunglam agamla jep songpi lentah khat sungah alut in Maon gamthip ah aum tan ahi. Ahinlah Saul chun ana hol jingin ahi.
26 Chuin Saul le amite molpang langkhat ah achen, hibangma chun David le aloiho jong molpang lang khat ah acheuvin, chuin Saul le aloiho chun, David le amite chu nailutna mat din aumkol tauvin ahi.
27 Ahin Saul heng ah thusoh kin khat ahung lhungin, ajah ah, “Gangtah in hungin ajeh chu Philistine ten gamsung gal ahin bol tauve,” tin ahung seijun ahi.
28 Hijeh chun David nung adella kon'in Saul akinunglen, Philistine te sat din achetai. Hijeh chun hiche mun chu Kiselna Songpi asah tauvin ahi.
29 Chuin David chua kon chun ache touvin En-gedi mun dettah sunga achengtai.