26
David In Saul Avel'a Ahinghoi Kit
1 Mi phabep Ziph a kon'in Saul kimupi dingin Gibeah mun ah ahung’un, “David chu Jeshimon nisolam'a Hakilah mol chunga chu kisel ahi,” ahung tiuve.
2 Hijeh chun Saul in galsat them cheh Israel sepai 3,000 akipuiyin David hol dingin Ziph gammang lam ajonsuh tauvin ahi.
3 Saul chun Jeshimon nisolam'a Hakilah molchung lamlen panga David kiselna mun’a chun ngahmun akisemin ahi. Ahin David chun Saul in gammang noiyah ahung hol'e ti ahedoh tan ahi.
4 Saul chu ahung mong nai ti photoh dingin guhthim in mi asol'in ahi.
5 Jankhat David chu Saul umna ngahmun chu kholchil'in ache in, aven ahileh, Saul, Ner chapa Abner chule a sepai jalamkai chu asung'ah alum'un, sepaiho chun akollin akimvel'ah akigolun un ahi.
6 Chuin David in Hit mipa Ahimelech chule Zeruiah chapa Joab sopipa Abishai jah a, “Saul ngahmun lailunga khu koipentah in kipedoh a ei kilhonpi ding ham?” tia adoh a ahile
Abishai in, “ Keiman nakilhonpi nange,” tin ahin donbut in ahi.
7 Hijeh chun David le Abishai chu Saul umna ngahmun sung’ah alut lhon'in ana imut pettah u agatoh lhon'in, ngahmun lailunga chun Saul alumin, alukhap kom'a chun atengcha tolla ana kiphut in, chule Abner le asepai te chu Saul kimvel'ah ana imu uvin ahi.
8 Hichun Abishai in David kom'a onemtah in, “Tunia hi Pathen'in namelma pa nangma khutna na pehdoh ahitai; keiman ama hi nivei sut ngai louvin khatvei seh-seh sun ingting leitoh sutbeh tange!” ati.
9 Ahin David in, “Bollou ding ahi. Natha louding ahi. Pakai thaonusa douna a akhut lam tapou chu koimacha athemmo louding aumpoi,” tin ana phoh in ahi.
10 “ Hingjing Pathen min'a kasei ahi, nikhat tengleh Pathen'in Saul hinjep nemtei nante, ahilouleh tehthi nante ahilouleh gal’a thi ding ahi.
11 Pathen thaonu khat katha ding chu Pakaijin ajah nompoi! Ahinlah atengcha le alukhap kom'a atwipai vang kilah in, chuteng hia kon'in dalha hitin cheta hite!” ati.
12 Hijeh chun David in tengcha le Saul alu kom'a twipai chu alan chule ama le Abishai chu koimacha hetlou kah in achemang lhon tai, ajeh chu Pakaijin Saul mite alhim imut ngoideh sah ahi.
13 David angahmun gallang’u mol’ah akal touvin akiven phahna chan agei lhon'in ahi.
14 Sepai ho leh Ner chapa Abner jah din, “Abner, kithouvin!” tin ahin samin ahile “Koi nahim?” tin Abner in adonbut in adongin ahi.
15 David in, “Aphai, Abner, nangma milen, nahilou ong? Nang hi pasal nahi hilou ham? Israel lah a hi nang tobang mimo koi umkha am? Ipi dinga nangman napu lengpa chu phatecha nahontup lou ham?
16 Hiche hi phaloubeh ahi! Pakai hingjing min'a kasei ahi, nang le lengpa athisa tobang nahi lhontai, ajeh chu nangman na pakai pa naventup jou tahlou jeh in na losamtai. Na pakai, na leng, Pakai thaonu atengcha le alulhuna atwipai jong phaten koitup peh tangem?” tin ahin samin ahi.
17 Saul in David ogin ahi chu ahen, “Ka chapa David chu nahilou haimo?” ahin tin ahile David in adonbut in, “Henge ka pakai le lengpa.
18 Ibola ba nei chanle le ham? Ipi kabolset em? Kathepmona ipi ham?
19 Ahin tun ka pakai le ka lengpa nasohpa thusei hi ngaiyin, Pakaijin kei douna a natildoh ahi vang leh ka maicham eisan peh hen. Achuti louva mihem tildoh mai-mai ahivang leh, ajao tapou Pakaiya kon'in gaosap changhen. Ajeh chu ama hon ka inmun'a kon'in eidel mangui. Hijeh chun Pakai mite toh kaum khom thei tapoi, chule gamchom mite pathen houtan eitiuve.
20 Pathen’a konna gamla tah a gamdang mite ho gamsunga kathi ding hitam? Ipi jeh a chu Israel lengpa chu uili khat hollea hung kipatdoh ham? Ipi jeh a kei hi molsang vum'a lhanlha adel banga eidel jeng ham?” atin ahi.
21 Chuin Saul in, “Keiman kabol khel tai. Inlam’ah hung kile tan, kachapa, keiman tukal nasugim taponge, tunin ka hinkho hi nei hinghoi peh kittai. Keima angol tobang chule suhkhelna tamtah kana neitai,” tin Saul in ahin donbut e.
22 David in, “Vo lengpa, hichea hin na tengcha aum'e. Khangdong mikhat hinsol inlang hung la hen.
23 Pakaijin midih le kitahna neiho dungjuijin kipaman apejin ahi. Tunin jong Pakaijin nangma chu kei khutna eipehsa ahitan, hijongleh keiman Pakai thaonusa lengpa chunga kakhut kalap louhel ding ahi.
24 Ven tunia keima mitmua nangma hinkho manlutah kahisah bang chun keima hinkho jong Pakai mitmun manlutah hijeng henlang, Pakaijin thoh hahsa kathohna changsea kon'in eihuhdoh tei-tei hen,” ati.
25 Chuphat in Saul jong chun David jah a, “Ka chapa David nunnom in! Nang hin thil tamtah nahin bol ding chule na lolhin tei ding ahi,” ati. Hichun David jong ajotna ding langa akichen, Saul jong akho lama ahung kile kit tan ahi.