13
Philistine Douna Gal Che Jom
1 Saul leng’a ahungpan chun akum somthum alhingtai chule kum somli le ni sungin lengvai anapon ahi.
2 Saul in Israel sepaiho lah a kon'in atumbeh in mi 3,000 alheng doh in, mi 2,000 chu Micmash le Bethel mol'a aumpin, 1,000 vang chu Saul chapa Jonathan toh Benjamin gam Gibeah khopiah aum'un chule mipi amoh cheng chu a inlam cheh uva asoltan ahi.
3 Hiche phat chomkhat jouvin, Geba ah Philistine sepai touho chu Jonathan in asat in ahile, Philistine te chu ajou tauve. Hijeh chun Saul in gamsung tin'ah kelki amut in, chule hitin aseiye, “Hebrew mipi te, hiche hi ngai tem’un, Philistine te dounan thoudoh un,” ati.
4 Israel mite jousen Saul in Philistine te chu Geba ngahmun khat abulu in asuhmang jeh in Philistine ten masang’a sangin Israel te chu ahot tauve tithu ajahdoh phat un Israel sepai apumpi chu Gilgal’a Saul kithopi dia kikhom khom din thupeh anei tauvin ahi.
5 Chuin Philistine te chu Israel tetoh kisat dingin akigong un, asakol kangtalai u 3,000, sakol touthem mihem 6,000 akigong’un chule mipi galsat ding chu twikhanglen kam'a neldi jat in atam’un ahi.
6 Israel mite nochintoa aum’u ahetdoh phat un, mipi te chu atijauvin alungdong gam tauvin, songkoho ah, hamboh lah ah, chule kotong dung'ah akisel gam tauve.
7 Mi phabep Jordan vadung agalkaiyun, Gad le Gilead gamsung ah akisel'un ahi.
Saul Lengpa Thungailou Chule Samuel In Apho
Hiche kahlah a chun Saul Gilgal ah aum'e chule amite chu tijat in akihot hot jengun ahi.
8 Saul in Samuel chu nisagi jen angah in, hiti chun Samuel in jong akitepna banga Gilgal’a ahung thei tahlou jeh in, mipite akithe cheh gam tauvin ahi.
9 Chuin Saul in, “Govam thilto ho leh chamna thilto neihin choi peh un” atin ahi. Chule Saul ama tah in govam thilto ho lhandohna aneitan ahi.
10 Saul in govam thilto lhandohna aboljou tah in, Samuel jong ahunglhung paiyin, chuin Saul chun kimutopi a chibai boldin apotdoh in ahi.
11 Hichun Samuel in, “Ipi bolla nahim?” tin adongin ahi.
Saul in jong adonbut in, “Nang la nikho kitepna banga hung louva, mipi ho jouse keija konna akithe cheh uva chule Philistine te gal adia Micmash a akikhop khom’u kamu tai.
12 Hijeh chun kaseijin, “Tua hi Philistine te eiho dou dinga Gilgal’a kigosadem a um u ahitan, Pakai henga panpina jeng jong kana thum manlou ahitai, hiche jeh a chu govamna thilto kanabol ahitai,” ati.
13 Hichun Samuel in adonbut in, “Iti ngol'a ngol nahim! Nangman Pakaijin na Pathen thupeh ho nanit tapoi, asei ngai lechun Pakaijin Israel te lenga imatih chan’a dinga natung jing tadinga.
14 Ahinla, tua hi na lenggam kichai ding ahitai. Pakaijin ama lungthim he mikhat alhen ahitai. Pakaijin amite chunga vaihom ding hi lhendohsa akoi ahitai. Ijeh inem itileh nangin thupeh nanit tapoi,” ati.
15 Chuin Samuel in Gilgal adalhan ajotna ding’a akichetai. Adang hon vang asepai te kithopi dia che Saul nung ajui tauve. Hichun amaho Gilgal apat Benjamin gamsung’a Gibeah ah achetou tauve. Hichun Saul in asepai te ama nungjui ho chu avetoh in ahile pasal mi 600 tobang asimdoh tai.
16 Chuin Saul le achapa Jonathan chule amani toh umkhom miho chu Benjamin gamsung’a Geba achun aum tauve, ahinlah Philistine mihon Micmash a panmun asem’un ahi.
17 Hichun Philistine te, mibulu ding loithum chu panmun'a kon chun ahung potdoh un, loikhat chu Shual gam Ophrah jotna lampi chu ajon’un,
18 chule loikhat chun lhumlam a um Beth-horon lam chu ajonun, chule loi khat chun Zeboim phaicham gamthip kingahna gamgichin lampi ajot un ahi.
19 Hichelai chun Israel gam pumpia chun thihkheng khatcha ana umpon ahi, ajeh chu Philistine ten achuti louva ahile Hebrew miten chemjam le tengcha kikhen get unte atiu ahi.
20 Hijeh a chu Israel te chu amitakip langkon, aloukaina, aheichau chule atupheng’u, akhet hem nom uva ahile akheng dinga Philistine te henga chesuhji ahiuve.
21 Tupheng, langkon thih, thihka, tucha thihmol, heichang suhhemna man chu paisa khat tobang bep ahi.
22 Chuti chun chuche nikhoa kon’in Saul le Jonathan toh kiloi miho khut a chun chemjam le tengcha khatcha Saul le achapa Jonathan tilou adang akimupon ahi.
23 Philistine sepai hon ho chu Micmash lampi chang din achedoh un ahi.