12
Samuel In Lhahna Thu Asei
1 Chuin Samuel chun Israel pumpi jah dingin thu aseijin, “Veuvin kaheng'a nasei jouseu kangaiyin, nachung uva vaihom ding leng khat jong kasempeh tauve.
2 Naleng’u hi tun nalamkai u jong ahitai, namasang laitah uva ka dinge, kumtam tehse samkang kahitai. Kachapa te to nakiloi diu ahi. Kachapan laiya kipan in tuni chan geijin na lamkaiyun kahung pangin ahi.
3 Tun hikom'a kaume, koi bongchal ahilou le koi sangan kalahpeh umkha em? Koi ka lheplhah umkha em? Koi ka suhgenthei umkha em? Koi kom'a sumguh thol'a ka lahpeh umkha em? Pakai le athaonu pa ang’ah kachung chang thu hettohsah pumin nei seipeh un, kana suhkhel aum jongleh tun sudih inge,” ati.
4 Mipin adonbut’un, “Aumpoi, nangman nei joulhep kha pouve, nangman keihoa kon'in thil neocha jeng jong nalapoi,” atiuve.
5 “Pakai le athaonu pa hi tunia na angsung laitah uva ahetoh ahi, kanung thu atheng’e” tin Samuel in aphongdoh in ahi. Chuin mipin,
“Henge ama hi ahetoh ahi,” tin adonbut uve.
6 Samuel in abanjom in, “Aaron le Mose ana gong jong chu Pathen ahi, napu napa teu Egypt a konna hin puidohpa chu Ama chu ahi,” ati.
7 “Hijeh chun, tun nangho le napu napa teu chunga Pakaijin thil kidang nasatah tah abol chengse ageldoh sah u bang chun Pakai masanga nangho dingdet un,” ati.
8 “Israel mite Egypt a aumlaiyun, Pakai henga akap un ahile, Aman Mose le Aaron chu Egypt gam'a kon'in Israel te ahin puidoh sah lhon'in, hiche gam'a ahin lhut lhontai.
9 Ahivangin mipi hon hetman louvin Pakai a Pathen'u asumil’un, aman Sisera, Hazor khopia sepai janel gal lamkai khut le Philistine te khut a chule Moab lengpa khut a apedoh in ahi.
10 Chuin amaho Pakai henga akap un, keihon Pakai ka dalhauvin Baal lim le Ashtoreth kahou jeh un kachonse tauve, ahinlah tun kamelma teu khut a kon'in nei huhdoh uvin, chutileh nangma kahou diu ahi atiuve.
11 Chutengleh, Pakaijin Gideon, Bedan, Jephthah chule Samuel asol in muntin'a na melma te hou khut a kon'in nei huhdoh un lungmong in acheng tauvin ahi.
12 “Pakai na Pathen'u chu na lengpau ahilaiyin, Ammon chate lengpa Nahash nangho douna a ahung namu phat un, nang hon kaheng'a, ahipoi, leng khat in kachung uva vai ahom ding ahi bouve natiuve,
13 Tun veuvin, nang hon nalhen ule na ngaichat u lengpa chu hikom'a aum'e chule veuvin, Pakaijin nachung uva leng khat atungtai.
14 Tun Pakai nagin uva chule nahou uva, chule athusei chu na ngai uva, na doudal loubeh uva ahileh nangho le na lengpauvin Pakai chu Pathen ahi ti avetsah na ahitai.
15 Ahinlah Pakai thusei chu na doudal vang uleh chule na ngaipeh lou uva ahivang le akhut nachung uva gihsa ding nang le namite chunga chu ding ahi.
16 Pakaijin, thil lentah tah abol ding ho, tun ding doh uvin lang veuvin,” ati.
17 “Nanghon naheuve, tuphat hi suhlou chang atlai ahin go ajuji pon ahi, ahin tao leng Pakaijin van kithinsah intin go ju ding ahi. Hiteng chule Pakai kom'a leng nathum'u chu Ama douna melse tah a chonse nahiu kihet tauvin nate,” ati.
18 Chuin Samuel in Pakai akouvin ahile, hiche nikho chun Pakaijin van-gin le keh ahin sol’in, hiti chun mipi chun Pakai le Samuel aging tauvin ahi.
19 Mijouse chun Samuel hengah, “Pakai henga nei taopeh un, achuti louva ahileh ka thigam diu ahi,” atiuve. “Tua hi leng ithum jeh uva chonset ikiholbeu ahitai,” atiuve.
20 Hichun Samuel in, “Kicha hih uvin, nabol khel’u ahitai, ahinlah Pathen phaten dihtah in hou uvin na lungthim pumpi uvin houvun, chule kinungle kit bol hih un,” atin ahi.
21 “Nungchon hihbeh un, nungchon a milim paotheilou ho chun napanpi louhel diu ahi, hiho chu panna bei jeng ahiuve.
22 Pakaijin amite itih hijongleh adalhah louhel ding ahi, ajeh chu adalhah a ahile aman amin lentah chu asuh minset ding ahi. Hijeh chun Pakaijin nangho amite dia agot hi ama lunglhaina ahi,” ati.
23 “Keiman vang nangho ding’a taopeh hi kangah a, hichu Pakai douna a kachonset louhel ding ahi. Chule thilpha le thildih nabol jing diu hi nangho kahil jing diu ahi.
24 Ahinlah hiche hi na boltei diu ahi, Pakai chu ging’un chule tahsan umtah in jen’un, chule nangho ding’a thil kidang abol jouse chu geldoh jing’un.
25 Ahinlah na chonset jom jing uva ahileh, nangho le na lengpau kisumang ding ahi,” ati.