14
Jonathan Hansan Thilgon
1 Nikhat hi Jonathan in agal manchah polea pangpa kom'a, “Hungin Philistine sepaiho umna langa khun galkai hite,” ati. Ahinlah Jonathan in, ipi abol ding chu apa henga ana hetsah pon ahi.
2 Phat chomkhat jouvin, Saul in mi jagup chu Gibeah khopi pam langa Migron mun'a kolbuthei phung vella chun ana khom khom’in ahi.
3 Saul miho lah a chu Ahijah chun thempu von chu akivon in ahi. Ahijah chu Ichabod sopipa Ahitub chapa ahin, Ahitub chu Phinehas chapa, Shiloh’a um Eli chapa Pathen thempu tupa ahi.
Jonathan in Israel te ngahmun adalhai ti koiman ahetlou ahi.
4 Philisitne te ngahmun lutna dia chu Jonathan in lampi jet le veiya songpi kochetchut khat gel aumin, songpi khatpa min chu Bozez ahin, khatjopa chu amin Senez ahi.
5 Sahlam a songpi khat aum in, khatjoh Micmash lhanglam a um, khat chu Geba lam a um ahi.
6 Hichun Jonathan in, “Hiche cheptan lou sepai ho ngahmun lah a khun cheu hite, Pakaijin eini eikithopi tei lhon ding ahi, ajeh chu Pakai chu koiman atin jou theilou ding ahi, Aman gal eijosah tei diu ahi, lhomcha hijong leuhen ijotei diu ahi,” ati.
7 Hichun gollhang avon popan, “Ipi hile phante natipen chu bol jengin, chule keima nakom'a kaumnai, na gellhuh bangin bol jengin,” tin adonbut in ahi.
8 Jonathan in, “Achutile apha lheh e, eini galut hitin, amaho gakimu sah hite,” ati.
9 Ahinla ama hon, ‘Na umna lhon'ah dingden lhon’in achuti louva ahileh katha diu ahi atiuva ahile ikaltou louding,
10 ahinlah, ‘Hung kaltou lhon'in kisat ute’ atiuva ahileh ikaltou lhon ding ahin, hichu Pakaiya konna melchihna khat hi ding ahin aman eikithopi lhon’a ijo lhon ding ahi,” ati.
11 Chuin Philistine ten amu phat un ahoh un, “Veuvin, Hebrew miho akosunga kon'in ahung potdoh tauve,” atiuve.
12 Chuin khopi ngah a umpa chun Jonathan ahin sam’in, “Hichea hung kaltouvin, thil khat na vetsah unge atiuve,” ati.
Chuin Jonathan in agalvon popa jah ah, “Hungin hung kaltouvin, Pathen’in eipanpi lhona ijotei lhon ding ahi!” ati.
13 Chuin amanin akhut le akeng atho lhon'in akaltou lhon'a ahile Philistine mite chu Jonathan masanga abohkhum gam tauvin, anung’a hung kaltou agalvon popan ana that thu-thu jengin ahi.
14 Amanin, mi somni athat lhon'in, atahsau chu acre keh khat a len sung ‘ah athethang lhon'e.
15 Hiti chun gangtah in, Philistine te gamsung ho lah le camp jousea thusoh chu ahung kithang soh tan, loujaova mipi holah le mijouse lah a chun tijatna nasatah in aum tan, sepai hon ho leh thilchom ho jong ati akihot hot un chule liingjong akihot e.
Israel ten Philistine Te Ajo U
16 Chuin Saul in Benjamin gam'a Gibeah gam gallang chu avet a ahile Philistine mite simsenlou chu muntin gamtin'ah ajam cheh gam tauvin ahi.
17 Saul in asepai te jah a thu apen, “Min kou unlang, koi-koi um’a, koi-koi umlou ham,” ati. Hitia chu akihol ule Jonathan le agal manchah popa aum tapon ahi.
18 Chuin Saul chu Ahijah chunga alunghang in, “Thempu von chu hilam’ah hin choiyun!” ati. Hiche pet a chu Ahijah chu Israel te masanga thempu von kivon'ah ahi.
19 Ahin Saul thempupa toh aki houlim sungse chun Philistine ngahmun sunga chun boina ahaginjep jep in ahi. Hichun Saul in thempupa jah a, “Imacha akhohpoi chejom jingu hite,” ati.
20 Chuin Saul le asepai te chu galmun'a ahin nokhum ule Philistine mite chu amaho leh amaho akithatto tauvin, boina le kihet khelna nasatah asoh tan ahi.
21 Chule tumasang’a Hebrew mi Philistine mite lah a ana jamlut ho jong chu Saul, Jonathan le Israel lah a adang-dang ho langa ahung kiheilut jong aumin ahi.
22 Hiti chun, Ephraim molsanga ana kisel Israel te jouse chun Philistine te ajam tauve tithu ajah phat un, amaho jong chun galsat na a chun hatah in anung’u adel’un ahi.
23 Chuti chun hiche nikho chun Pakaijin ami Israel te ahuhdoh in chule gal kisat chu Beth-aven geijin gal akisat peh’un ahi.
Saul Ngol-hoi Kihahsel
24 Hiche nikho chun Israel te chu alung genthei lheh un ahi, ajeh chu, “Saul in kamelma te phu kalah theina dingin, nilhah ahi kahsea annea chu sapset changhen tia mipi chu akihahsel sah ahi.” Hijeh a chu sun nilhum keiya koima anne umlou ahi.
25 Hijeh chun, ama hon gamlah lampia chu khoibel khat ana um amu vang’un koiman ane pouvin ahi.
26 Chuin khoiju chu mipi koima chan ana ne-ngam pouvin ahi. Ajeh chu kihahselna chu akichat u ahi.
27 Ahinlah Jonathan in apa thupeh chu ana jahlou jeh in, atenggol muh in khoiphang khat agah sun in, agah te a ahile, atha akido ma-ma jengin ahi.
28 Ahin mikhat in hichu ana mudoh in, “Napan mipi nasatah a eigihsal uva tunia nilhum masanga anne a mi chu sapset changhen tia eigaosap jeh uva koiman kaneh lou u ahi, hijeh a chu mipi jong hung lhasam'ah ahi,” ati.
29 Chuin Jonathan in, “Kapan gamsung hi agenthei sah ahi. Hitobang thupeh chun eiho ma-ma eisuhgenthei u ahi. Ven hiche khoiju chu themkhat kate jeh a kamit hi iti hung ha doh hitam?” ati.
30 Mipi jong hin amelma teu thil achom nauva amu hou hi aning anop in nele phachom louding ham? Hijeh a chu eihon tuni geija Philistine te tamtah itha theilou-u hilou ham? ati.
31 Chule hiche ni chun Micmash a kipat Aijalon geijin Philistine te chu anung adel’un athat peh un chule mipi chu alhasam lheh jeng tauvin ahi.
32 Chuin mipi chu thil kichomho chunga achu uvin, kelgoi ho, bongchal ho, bongnou ho chu tollhanga athat un thisan pum chun aneuvin ahi.
33 Mikhat in Saul jah a, “Mihon sa thisan pumin aneuvin Pakai dounan achonse tauve,” tin ana seidoh peh un ahi.
Chuin Saul in, “Na thilbol’u chu adihlou ahi, songtum lentah khat kihol unlang kilih piuvin,” ati.
34 Saul in aseibe kit in, “Sepai ho lah a khun chelut unlang a gancha u, akelngoi u, akelcha u jong kaheng’ah hin choiyun.
Hichelai mun'a hin that unlang chule naneh masang’un athisan chu lhoh kanghel un. Asa le thisan nehkop jeh a Pathen dounan chon dauvin,” ati.
35 Chuin Saul in, Pakaiya dingin maicham asemin, hiche maicham chu Saul in Pakaiya dinga maicham asem masat pentah ahi.
36 Chuin Saul in amite kom'a, “Eihon janteng kitolsuh uhitin Philistine te nung del uhitin, khovah kah in amaho chu thatgam uhitin chomgam uhite,” ati.
Hichun mipi jong, “Pha nasah sah chu bol jengin,” atiuve.
Ahivangin Thempupan, “Pathen dong masaute,” ahinti.
37 Chuin Saul in Pathen adongin, “Philistine te nung kadel diu ham? Kajo nadiuva nei panpi diu ham? Ahinlah hiche nichun Pathen'in adonbut tapoi.
38 Chuin Saul in lamkaiho kom'a aseijin, “Adih lou khat aumtai! Galmi lamkai jouse hikom'a hungun. Tunia ipi suhkhel ineijum? Kikhol uhite chonset hi hoilaiya um ham? Hin kholdoh un.
39 Ajeh chu Israel huhhing'a hingjing Pakai min'a kasei ahi, kachapa Jonathan chunga um ahijongleh ama jeng jong thon louhel ’a thi tei-tei ding ahi,” ati. Ahinla mipi ho jouse lah a konna ipia konna boiham ti koiman aseipoi.
40 Chuin Saul in aseijin, “Nangho lang khat ah um unlang, kei le ka chapa Jonathan lang khat ah um lhon inge,” ati.
Chule mipi ten Saul kom'a chun, “Phante tia nagel chu aphapen ahi,” ati.
41 Chuin Saul ataovin, “O Pakai, Israel te Pathen, koi hi dih a, koi hi dihlou hitam nei seipeh un,’ ati. Hichun vang asan ule Jonathan le Saul lhendoh ahung hin, hijeh chun mipi te chu ahoidoh tai.
42 Chuin Saul in, “Tun vang sang kit uhitin kei le Jonathan kah a dingin,” Tun Jonathan chu athemmon ahung kilangdoh tai.
43 “Ipi na bolkhel ham nei seipeh in?” Hiti chun Saul in Jonathan kom'a adongin ahi. “Khoiju themkhat kana tep e,” tin Jonathan akiphong doh tai. “Tenggol muh a themcha khat bou, hichun thina asothei ham?” atipeh in ahi.
44 Saul in “Henge Jonathan, nathi tei ding ahi! Hiche jeh a hi nathi louleh Pathen'in kei eideng henlang chule eithat hen” ati.
45 Ahin mipi ten Saul kom'ah, “Jonathan in Israel dia gal lentah eijopeh u ahin, Jonathan hi thi ding ham?” tin ana dongui. Hichu ahi ding ahile, Pathen'in jada hen, hingjing Pakai min'a kaseiju ahi, aluchunga kon samjang khat jong lha louding ahi. Ajeh chu tunin Pathen toh atongkhom in ahi,” atiuvin. Hijeh chun mipi ten Jonathan ahuhdoh un, athisah tapouve.
46 Saul chu Philistine te nung adel nauva kon'in achetou tan chule Philistine te jong aum nauvah ache tauve.
Saul Sepai te Lolhin
47 Chuti chun Saul in Israel mite chunga lengvai anapon, muntin'a amelma te jouse, Moab, Ammon chate, Edom, Zobah lengho chule Philistine mite toh akidouvin akiheina lam jousea gal ajoupeh in ahi.
48 Aman thil lentah Amalek mite asat in, ajouvin, chule amaho chom gam'a miho khutna kon'in Israel te ahuhdoh in ahi.
49 Tun Saul chapa te chu Jonathan, Ishbosheth, chule Malkiishua ahiuvin. Chule achanu teni lah a apeng masanu min Merab ahin, chule aneonu min Michal ahi.
50 Chule Saul inneipi min Ahinoam ahin, Ahimaaz chanu ahi. Chule ajanel gal lamkaipa min chu Abner ahin, Saul pangahpa Ner chapa ahi .
51 Chule Saul pa, Kish chule Abner pa, Ner chu ani lhon'a Abiel chapa hicheh lhon ahi.
52 Chule Saul nikholai sungse chun Philistine mite toh kidouna chu anasa lheh jengin ahi, Chuti chun Saul in mihat le mihangsan amupou pouva ahile amanin ama a dingin akipui jengin ahi.