3
Changphol'a Ruth Le Boaz
1 Hiti chun nikhat Naomi in Ruth kom’a chun, “Ka chanu keiman na inchen theina ding ngaito peh leng hichu nang dinga pha ding ahi.
2 Boaz hi eini dinga ikinaipi pen i-inko’u khat ahi, chule khotona neitah anungah goiho toh natoh khomsah jing ahi. Tujan’a hi aman achangphol’a sakol chang aden ahi.
3 Hijeh chun kasei bang-bang hin bollin, “Kisil thengsel inlang thao kinunlang navon hoipen kivon inlang, achangvohna phol'a chun gachesuh in ahinla aneh a adonchai tokah in Boaz chu kimusah hih in.
4 Alup tengleh alupna mun chu melchih in, chuteng chenlang akengphang chu hohdoh inlang hilai mun’ah chun lum in. Hiteng chuleh aman nabol ding nahin seipeh tante,” ati.
5 Ruth in adonbut in, “Bollin nati tichu kabol jeng ding ahi,” ati.
6 Hiche jan chun amanu jong achesuh in atehpi’n bol ding’a aseipeh jouse chu abol tan ahi.
7 Boaz chun aneh a adon jouva chuleh lung kipah tah a aum jouvin Boaz chu achang kiset vumna pang’a chun agalum tan ahi. Hichun Ruth jong kangchan aga vahlut in, akengphang teni ahohdoh in alumtai.
8 Jan khangkim donin Boaz chu ahung kin khang in, agah kihei leh akengphang kom’a numei khat analup chu amudoh tan ahi.
9 Hichun aman jong “Koi nahim?” tia adohleh, numeinu chun ahin donbut in
“Keima nasohnu Ruth kahi, napon chu keijong neihin silpeh in ajeh chu nangma hi insungmi kinaipi pen chu nahi,” ati.
10 Hichun Boaz injong aseijin, “Ka chanu Pakaijin phatthei naboh hen, nangman natoh masat thilpha sanga jong tua hi aphacheh nabol kit ahitai, hao hen vai jongleh gollhang ho joh hol louva umah nahi.
11 Chuti ahile, tun ka chanu lungkham hih in keiman bol dinga lom ho chu hinbol nange, ajeh chu hiche khopi sunga mijouse hin nangma hi numei phachom tah nahi ahet sohkeiyu ahi.
12 Keima hi na kinaipi insungmi chu kahinai ahinla kei sanga na kinaipi khat aum nalai in ahi.
13 Tujan geh khovah den inlang, jingkah teng ama chun phung kinaipi toh dingdol kin na bolpeh leh apha ahi jenge, ahinlah aman hichu abolnom louva ahileh hingjing Pakai minna kasei ahi, keiman na bolpeh nang'e, tun jingkah geijin umtan,” ati.
14 Hiti chun Ruth jong Boaz kengphang bulla chun jingkah geijin alum’in, ahin jingkah lang kungbul le mi kimah donin athoudoh in Boaz in, “Hiche changvohna phol'a hin numei aum'e ti koima chan hetda hen,” ati
15 Hiche jou chun Boaz in amanu kom'a chun, “Napon chu hin phan” atin sakol chang chu atena dim gup jen asempeh in akiputsah tai, hiti chun khopi sung lang’a chun achetan ahi.
16 Ruth chu atehpi kom alhun phat in Naomi’n, “Ipi toh nagabah hinam?” atileh,
Ruth chun Naomi chu Boaz in abolpeh jouse chu aseipeh tan ahi.
17 Chuleh Ruth chun aseijin, “Natehpi kom'a sagoh keuva nakinung le louding ahi tin sakol chang atena dimgup eihin pohsah e,” ati.
18 Hichun Naomi’n amanu kom'ah, “Ka chanu, itobang thil hung sohdoh mong-mong am ti ijah kahsen ngah hat in, amapa chun tunia hi thil khat atohlhah tokah a umthim louhel ding ahi,” ati.