4
Boaz In Ruth Akichenpi
1 Boaz chu khopi kelkot phunga ache touvin hikom'a chun agatou tai. Hiche pettah chun insung kinaipipen atipa chu ahungin ahileh Boaz chun akouvin, “Golpa, hungin lang hichea hin tou tadin kasei nomkhat aum'e,” atin ahi. Hichun amani chu atoukhom lhon tan ahi.
2 Chuin Boaz in khopi sunga lamkai som akou khom'in athu hetoh dingin atousah in ahi.
3 Hichun Boaz in insung kinaipi pen kom'a chun hiti hin aseitan ahi. “Moab gam'a konna hung kile kit Naomi chu nahen ahi. Ama hin ikinaipi Elimelech gam chu ajoh in ahi.
4 Keiman nakom'a ka seinom chu ahileh hiche hi na lhatnom leh kilhatnin kati ahi. Agam chu nadei leh hiche ahetoh mi hijat masanga hin kichoh jengin, ahinlah nangin nadei louva ahileh tutun nei hetsah jengin ajeh chu nang banna alhat thei akinaipi chu kei kahi,” ati.
Hichun mipa chun “Aphai, keiman kilhat nang'e,” tin adonbut in ahi.
5 Hijou chun Boaz in ama kom'a chun hintin aseije; “Aphai, Naomi gam chu nachoh dinga ahileh Moab meithai nu Ruth jong hi na kichenpi ding ahi, hitia chu amanun cha anei teng ajipa min chu aput ding insungmi hina a agam chu nanga hi ding ahi,” ati.
6 Akinaipi penpa chun ahin donbut in hitin aseipeh tai, “Chuti ding ahileh keiman lhat jou ponge, ajeh chu hichun keima gam eisuhboi peh ding ahi, hijeh chun nangin kilhat tan,” ati tai.
7 Tun hiche lai khanga chun Isreal te lah a chun chena dan khat ana um'in mikhat touvin thil achohna ding athaneina chu mikhat kom'a apehdoh a ahileh akengkoh chu asutna ama pa chu apeh ding ahi. Hitia chu mipi hetna kikhut lhehna chu kisudetji ahi.
8 Hiti chun a insung kinaipipen pa chun akengkoh chu asutlhan Boaz kom'a chun aseitai, “Nangin kilhat tan,” ati.
9 Hichun Boaz in upaho leh avel'a ding mipi ho jah a chun “Tunia hi keiman Naomi khutna kon'in Elimelech, Chilion le Mahlon nei jouse aboncha kachoh ahitai.
10 Chujongleh gam jouse puma hi Moab numei Ruth kitinu Mahlon meithainu jong hi kaji dinga kachan tha ahitai. Hitia chu amanun cha pasal ahin'a, athisa ajipa insung min hi atundoh a, hiche achennau khopi sunga hi a insung thil le lo jouse jong hi agouva kisim ding ahi. Nangho jouse hi tunia ahetoh nahi tauve,” ati.
11 Hichun upaho leh mipi kelkotna ding ho jouse chun ahin donbut uvin, “Keiho ahetoh kahiuve, Pakaijin hiche numei na insung’a ahunglut hi Isreal nam hung kondohna Rachel leh Leah toh bahsah hen! Nang jong Ephrathah bangin pungin lang Bethlehem a minthang tahen.” atiuvin ahi.
12 “Chuleh Pakaijin hiche khangdong numeinu a kon hin i-puluiyu Judah leh Tamar chapa Perez tobangin chilhah tamtah nape hen!” atiuve.
Boaz Chilhah Ho
13 Hichun Boaz in Ruth chu a in'ah akipuilut in hiti chun amanu chu amapa jinu ahung hitai. Aman amanu chu aluppin ahileh Pakaijin nao ahin vopsah in, amanun chapa khat ahin hingtai.
14 Hichun khopi sunga numeiho chun Naomi kom'ah “Na insung’a gam ngah ding nahin tundoh peh a Pakai chu thangvah in umhen! Hiche chapang hi Isreal nam sung’ah hung minthang hen.
15 Ama hin na khangdong sah kit henlang chuleh nateh lang hinkho hi nahin vetsui peh tahen. Ajeh chu ama hi nahin ngailua na mounu cha ahin chapa sagi nanei sanga phajo ahi,” atiuve.
16 Hichun Naomi chun hiche naosen chu akipom in a-optoh asipbeh tan ahi. Aman ama cha mong-mong bangin akidon tan ahi.
17 A inheng numei hon, tun Naomi’n cha aneikit tai. Chuleh ama hon amin chu Obed asah tauve. Ama hi Jesse pa ahung hin David pu ahung hitai.
18 Hiche hi apuluiyu Perez son achilhah ho chu ahung hitauve:
Perez hi Hezron pa ahung hi.
19 Hezron hi Ram pa ahi.
Ram hi Amminadab pa ahi.
20 Amminadab chu Nahshon pa ahi.
Nahshon hi Salmon pa ahi.
21 Salmon hi Boaz pa ahi.
Boaz hi Obed pa ahi.
22 Obed hi Jesse pa ahi.
chuleh Jesse hi David pa ahi.