2
Ruth In Boaz Louva Na Atoh
1 Tun hiche Bethlehem ahin mihaotah leh mithunei tah khat amin Boaz kitipa chu ana umin ama chu Naomi jipa Elimelech sopi anahi.
2 Nikhat hi Moab numeinu Ruth chun Naomi kom'ah, “Keima hi nei sollin lang chang-at ho lah a che ing kating, koi hijongleh khotona einei pou-pou kom’ah changkhai gahol tange,” ati.
Hichun Naomi chun ajah a “Chanu, che jengin,” ati.
3 Hiti chun Ruth chu akipatdoh in chang-at ho nung langa chun achen, changkhai ho chu achom pan tan ahi. Hitia changkhai achomna loulai chu atehpu Elimelech sopipa Boaz loulai ana hikha in ahi.
4 Hitia changkhai ana kichom lai pettah chun Boaz chu Bethlehem’a kon'in ahungin “Pakaijin na umpiu hen,” atin, ama hon jong “Pakaijin phatthei naboh hen” atiuve.
5 Hichun aman tohvaihompa kom’ah chun, “Hichea numei khangdong nu khu koiham? Koiya kon ham?” tin adong'e.
6 Tohvaihompan ahin donbutnin, “Amanu khu Moab numei Naomi toh hung kinungle khom numei chu ahi.
7 “Amanu hin tujingkah chun chang-at ho nung langa akhaiho hi kaki donkhom thei ding ham tin eina dongin ahi. Chomkhat cha jong touthim man louvin anatoh ding toh nan akisalel lheh jeng e,” tin adonbut in ahi.
8 Hichun Boaz chu Ruth kom'a chun achen ajah a, “Ngaijin ka chanu, changkhai nakihol sung hin keiho kom’ah um jengin, koima dang louva che hih in, kalouva natong numeiho nunga hin um jengin.
9 Achang atna mun u melchih inlang chule anung’u jui jengin, gollhang ho hin nadai chatvai louna diuva keiman kagihsal ahitai. Nadang achah teng twikul'a konna aga dop u twi khu don jengin,” atipeh tan ahi.
10 Ruth chu akengphang’a abohkhup jengin hiti hin kipathu aseije, “Keima hila gam chommi kahin, i-atileh hibang lom'a hi nei khoto hitam?” ati.
11 Boaz in adobutnin, “Ken nangma kahenai,” ati, “chujongleh najipa athijou nung’a nangin ichan geiya natehpi khohsahna neitah a nahin jen hitam, chujongleh ichan geija nagam leiset nanu leh napa nahin dalhah a gam chombeh miho lah a hi nahung chenkhompi jeng ham tijong kahei.
12 Alhaving noija nahung kipehlutna Pakai, Israel Pathen chun na thilpha bol ho jeh hin phattheina lhingset in nape tahen,” ati.
13 Ruth in adonbut in, “Pu, kachunga nalung lhaina umjing tahen, na natongho lah a khat jeng jong kahilou vang'in nangin khotona neitah in thu naseijin nei lhamon’e,” ati.
14 Sun-an nehphat in Boaz in amanu chu akouvin, “Hilanga hungin lang bu hung nen, na changlhah chu lengpi thei twi lah ahin sulut inlang nen,” ati. Hiti chun Ruth chu chang at holah a chun atouvin ahileh, Boaz in aneh ding changlhah apen, aman jong a oivaset anen, aneh moh themkhat jong anei nalaijin ahi.
15 Ruth chu natonga akilekit phatnin, Boaz in agollhang ho chu thu apen, “Amanu hi jada hih un, nalah uva changvui chu kilo khomsah un,” ati.
16 “Sakol changvui ho chu alomlah a kon’in ladoh unlang amanun akilo ding gunset in selhah peh jengun, hichu kilhen sah unlang sugenthei hih un!” ati.
17 Hiti chun Ruth in nilhum keijin chang chu akidon khomin achangho chu ajeplhah phatnin abeng chu adimset tai.
18 Amanun hichu khopi sunga atehpi kom’ah apolut in avetsah in achanglhah nehmoh akhenpeh jong chu apetan ahi.
19 Naomi’in, “Chang hijatpi hi hoilanga nagalo khom ham? Pakaijin nahin kithopi pa hi phatthei boh hen!” ati.
Hichun Ruth in atehpi kom’ah chun changkhai aga kidonna louneipa thu chu aseipeh tan ahi. “Tuni kagatohna louneipa chu Boaz ahi,” ati.
20 “Ama chu Pathen’in phatthei boh hen!” atin, Naomi’n amounu jah a chun hitin aseipeh tai “Aman hitobang khotona anei hi eini chung’a ahin, chule najipa chung’a ahi. Amapa hi i-insung’u kiledohsah thei ikinaipi pen khat u chu ahi,” ati.
21 Ruth’in aseibe in, “Boaz in hungkit inlang chang-at hi akichai kahsen, changvo ho lah a hi kaum khom jingna diuvin eiseipeh in ahi,” ati.
22 Naomi’n, “Aphai, ka chanu aman naseipeh bang-bang hin chonin, hiche chang-at hi akichai kahsen a nungah ho lah a chun um'in, loumun danga che hih in, min nadai chatvai thei ahin ama louva vang hi imacha tilou ding ahi,” atipeh e.
23 Hiti chun Ruth jong Boaz loulai achun sakol chang-at kichai kahse chun anumei hou toh atongkhom’in, changkhai chu akilokhom’in ahi. Chuleh sakol chang leh suhlou chang-at kichai kahsen changkhai akichom tai, hiche sungse hin ama atehpi toh aum khom jing jengin ahi.