24
Pathen Toh Kitepna Kithah Sem
1 Hiche jou chun Joshua’n Israel phung jouse chu upaho leh lamkai ho chule thutan vaihom ho jouse Shechem'ah anakou khom'in hiti chun amaho ahungun Pathen angsung'ah ahung dingun ahi.
2 Joshua’n mipi aboncha uva jah a chun hitin ana seije, “Pakai Israel Pathen'in hitin aseije, napului teniu Abraham le Nahor pa Terah chu khanglui laijin Euphrates lui gal'a acheng uvin chujongleh ama hon pathen limsemthu ho jong ana houvun ahi.
3 Ahinla Keiman napuluiju Abraham chu Euphrate gallam akon chun Canaan gam'a kahin puilutnin ahi. Keiman achapa Isaac a kon'in chilhah tamtah kana pen ahi.
4 Isaac chu Jacob le Esau kana pen ahi. Esau chu Seir molsang lang chu kana pen, Jacob le achilhah te chu Egypt langa ana chesuh un ahi.
5 Hiche jou chun Keiman Mose le Aaron kana sollin chuleh Egypt achun natset khohtah kana lansah in, hiche jou chun Keiman nangho chu chamlhat mite nahi theina diuvin kahin puidoh un ahi.
6 Ahinlah napu napa teu hin Twikhanglen San alhun phat un, Egypt miten Sakol kangtalai jin nahin nungdel tauvin ahi.
7 Hichun napu napa teu chu Pakai kom'a ahung penjah jeng phat un nangho leh Egypt te kikah a thim kana jinsah in, twikhanglen chu kana vallhum sah in, hiti chun na mitmu changtah un Egypt te chunga hitobang hi kana tongdoh in ahi. Hiche jou chun gamthip noijah phat sottah nahung cheng tauvin ahi.
8 Ajona in Keiman nangho chu Jordan pang nisolam'a cheng Amor mite gamsunga kahin puilut un ahi. Ama hon nangho chu nakisatpi uvin ahinlah keiman amaho chu na masang tah uva ka suhmang peh un ahi. Keiman amaho chunga galjona kape uvin hiti chun nang hon agamsungu nalo uvin nachen khum tauvin ahi.
9 Hiche jou chun Moab lengpa Zippor chapa Balak chun Israel dounan gal ahin bol tan ahi. Aman Beor chapa Balaam chu nangho gaosap dingin ahin kouvin,
10 ahinlah keiman kana noppeh pon, keiman Balaam chu nangho joh phatthei kana bohsah tan, hiti chun nangho chu Balak a kon'in kana huhdoh tan ahi.
11 Nangho Jordan vadung na galkai uva Jericho nahung lhun phatnun, Amor mite, Periz mite, Canaan mite, Hit mite, Girgash mite, Hivi mite le Jebus miten bang bangun Jericho miten jong na-na dou tauvin ahi. Ahinlah keiman amaho chu kana josah tauve.
12 Keiman Amor leng teni delmang dingin nangho masang’ah khoise kanasol masan ahi. Nagaljo nau chu nachem uleh na thalpiu ahipon ahi.
13 Na thanat nau hilou gam chu kapeuvin chuleh na sahdoh sau hilou khopiho kapeuvin nang hon tun na chenpha tauvin ahi. Natusau hi hih jongleh Olive gammang jong naneh diuvin kapeuvin ahi.
14 “Hijeh chun na lungthim pumpi uvin Pakai chu gingun lang akin bol uvin. Napu napa teuvin Euphrate vadung gallang Egypt a ana chenlai uva ana houvu semthu pathen ho chu a itih a dingin paimang sohhel uvin lang Pakai kin jeng bou bollun.
15 Ahinlah hiche Pakai kin hi nabol nom louhel uva ahileh koi kin nabol dingu ham tuni hin kilhen khen jeng uvin. Euphrates gallanga napu napateu semthu pathen ho chu nahou joh diu ham? Ahilouleh tua na chennau gamsunga ana chengah Amor mite semthu pathen ho joh chu nahou diu ham kilhen khen tauvin. Keima leh ka insung miten vang a i-tih chan hijongleh Pakai kin chu kabol jing jeng dingu ahi,” ati.
16 Mipi ten hiti hin adonbut uva, “Keihon itih hijongleh Pakai chu nungsun a semthu pathen dang kin kabol louhel diu ahi.
17 Ajeh chu Pakai iPathen'un keiho leh kapu kapateu Egypt gam sohchan na a konna eina huhdoh uva chu ahi. Aman datmo um thil kidang nasatah keiho mitmu tah in ana bollin ahi. Keihon gamthip noiya melmate lah a lam kahin jot nauva hin aman eihin pui galkai uvah ama bou ahi.
18 Hiche gam'a ana cheng Amor mite leh namdang ho jouse eina nodoh peh uvah Pakai ama bou ahi. Hijeh chun keihon jong ama kin bou kabol diu ahi, ajeh chu ama bou hi ka Pathen'u ahi.”
19 Hichun Joshua in mipi ho chu agihsallin hitin aseije, “Nanghon Pakai kin hi boljou pouvin nate, ajeh chu Pakai hi thengtah leh thangthip Pathen ahi. Aman na chonset nau leh Ama na douna hou jouse na ngaidam pouvinte.
20 Ahin nang hon Pakai chu na nungsun uva semthu pathen dang kin nahin bol jeng tah uva ahileh tumasangin nahin ngailulheh jengu jongleh, nangho douva hung pang ding nahin suhmang dingu ahi” ati.
21 Ahinlah mipi ho chun Joshua chu adonbut un, “Ahipoi keihon Pakai kin chu kabol tei diu ahi” atiuve.
22 Joshua’n jong aseijin, “Nanghon na thulhuh nau chunga nang ho leh nangho ahettohsah nahiuve, nang hon Pakai kin bol ding nakilhen tauve” ati. Ama hon adonbutnun, “Henge, keihon ka thusei uhi keiho ma-ma ahetoh kahiuve,” atiuvin ahi.
23 Joshua’n aseijin, “Aphai chuti ahileh nalah uva milim semthu ho chu sumangun lang Pakai na Pathen'u langa chun kiheijun lang nalungthim pumpi peuvin,” ati.
24 Mipite chun Joshua kom'a aseijun, “Keihon, Pakai iPathen'u kin jong kabol diu, ama thujeng bou kangai diu ahi” atiuve.
25 Hiti chun Joshua’n hiche nikho chun Shechem’ah mipi chutoh kitepna khat ana sem’un Pakai thupeh ho leh adan thupeh ho chu anit diuvin ana kitepsah in ahi.
26 Joshua’n hiche ho chu Pathen dan lekhabua ana jihlut in ahi. Chuleh hiche hetjingna dinga hin song lentah khat Pakai ponbuh kom gangpi phungnoiya ana tungdoh in ahi.
27 Joshua’n mipi ho kom'ah ana seije, “Pakaijin eiho kom'a asei jouse chu hiche song hin aja sohkeijin ahi. Nangho Pakaiya nakitep nauva konna nanung chon uva ahileh hiche hi nangho douna a hettohsah hi ding ahi” ati.
28 Hiche jou chun, Joshua’n mipi ho chu abonchan a inlam cheh a asoldoh tan ahi.
Gamtep Gam’a Kivui Lamkai Ho
29 Hiche jou hin Pakai lhacha Nun chapa Joshua chu kum jakhat le somkhat alhin chun athitan ahi.
30 Ama hon ama gam chan dinga ana kipehna mun, Gaash Mol sahlang Ephraim thinglhang gam Timnath-serah mun'ah anavui tauvin ahi.
31 Israel mipi te chun Joshua hinlaisen chuleh Pakaijin Israel te dinga anabol ho jouse atahsa tah a hin hechen Joshua thinunga hing nalai upaho hinlai sungsen Pakai kin phatah in ahin bol'un ahi.
32 Israel ten Egypt ahin dalhah uva ahinpoh u Joseph gu ho chu, Jacob in Hamor chatea konna dangka 100 a ana choh gamsung Shechem mun a chun ana vuiyun ahi. Hiche gam hi Joseph chilhah ho chan dinga ana kipe gamsunga chu uma ahi.
33 Aaron chapa Eleazer athitai. Ama chu achapa Phinehas ana kipe Gibeah khopi sung Ephraim thinglhang'ah ana vuijun ahi.