JUDGES
THUTAN VAIHOM HO
LEKHABU
Judges lekhabu sung thu umdan
Thutan Vaihom Ho (Judges) thusim hi tulai vannoi mite nun le khan to jong vetkahna thei tampi aum in: tijat umtah kitha kimat, jonthanhoi chule khat le khat chungnun ding kichuna thudol aseijin ahi. Hitobang thusim ho hi sunggil lam’a dia kitil khouna phatah ahin, chujongleh hiche lekhabu hin kiloikhomna hoa kivaihomna akitup louteng, ipi sohji em, tijong aseijin ahi. Mihem ten, Pathen lam sanga kisih pum’a aka tengu leh, Pathen'in mihem te akhotona thudol jong aseiye. Hiche lekhabu hin Joshua thinung chule Leng ho phat masanga Israel te Canaan gam’a achen'u thudol jong aseijin ahi.
Judges lekhabu nasim’a kon'a hi, nangma mimal chung chang le thua nanun louna ho kikhol chilna nanei thei ding, chuteng lunghei le taona toh thoa Pathen toh na kiguijopna athahbeh a nasem phatthei ding ahi.
Judges lekhabu jihpa chule ajih kum
Akhang-akhanga pat phat ahung chal dungjuijin Samuel themgao jih ahi akiti, hinlah koipen in ajih ham tihi kicheh tah in akisei poi. Chule Samuel toh kiloiho lah a khat penin anajih jong himai thei, ahilouleh Themgao ho lah a khatpen hidin ginchat ahi, akiti. Judges lekhabu hi 1000 BC vel’a kijih ahin, hiche lekhabua hin kum jathum le somnga sung thilsoh ho akijihlut in ahi.
1
Judah leh Simeon in Gam Alah Lhon
1 Joshua thinungin, Israel ten Pakai kom'a “Canaan mite sat dinga koi phung kon masa ding ham?” tin ana dongun ahi.
2 Pakaijin “Judah kon masa ding ahi, ajeh chu hiche gam hi amaho khut a kana pehdohsa ahi,” ati.
3 Hijeh chun Judah in asopipa Simeon kom'a chun, “Keima eikipe gamsunga Canaan mite toh kisat ding kahi, neihung kithopin chujou teng nangma naki pehna gam'a jong chun gal gasat khomna hite,” ati. Hiti chun Simeon’in Judah chu akithopin ahi.
4 Judah miten galmi ho chu aga nokhum’un ahileh Pakaijin Canaan mite le Periz mite chu gal ajosah in chule Bezek khopia chun galmi 10,000 athat un ahi.
5 Hiche Bezek mun'a chun Adoni-bezek lengpa chu akisatpi uvin gal chu anajou un chule Canaan mite leh Periz mite jong ajou uvin ahi.
6 Adoni-bezek ajamdoh in, ahinlah Israel ten ahin man un akhutpi leh akengpi ho chu atanboh peh un ahi.
7 Adoni-bezek in, “Keiman phat khat in leng somsagi ho chu akhutpiu leh akengpiu ho chu kana tanpeh in ka annehna dokhang noiya alhajah ho ana neuvin, keiman amaho kanabol bangin tun Pathen’in keima eilethuh tai,” ati. Ama chu Jerusalem'a ana puiyun hikom'a chun ana thitan ahi.
8 Judah ten Jerusalem ana sat un ana jou un agam'u ana lauvin amipi te ana that gam’un chule akhopiu chu meijin ana hallha tauvin ahi.
9 Hiche jou chun achesuh uvin Negev leh lhumlam thinglhang gama cheng Canaan mite akisatpi uvin ahi.
10 Hiche jou chun Judah ten Hebron’a cheng Canaan mite aga kisatpi uvin, (Hiche Hebron hi tumasanga chu Kiriath-arba ana kiti ahi) hichea chun, Shesai, Ahiman le Talmai galmi ho jong chu ana jouvun ahi.
11 Hichea kon chun amaho acheuvin Debir khopia chengho satdin akon tauve. Debir khopi jong hi masang chun amin Kiriath-sepher ana kitin ahi.
12 Caleb in koi hileh Kiriath-sepher gasat a ahin lajou pen-pen chu kachanu Acsah hi aji dinga kapeh ding ahi, ati.
13 Caleb naopa Kenaz chapa Othniel’in aga jouvin, hijeh chun Acsah chu Othniel’in akichenpi tai.
14 Acsah in Othniel akichenpi jou chun, Othniel chun Acsah pa kom'a loumun khat thum dingin Acsah chun atil’in ahi. Hiti chun Acsah chu sangan chunga konna akum lhan, chuin Caleb’in “Ipi hitam?” tin ana dongin ahi.
15 Amanun jong “Thil khat neipeh ben kati ahi, nangin Negev gam chu neipeh ahitah leh twinah phung khat toh neipeh than,” ati. Hichun Caleb in twinah achungnung leh anoinung jong apehben ahi.
Judah leh Benjamin phung mite galjona
16 Judah phung miten lusulei khopi tia kihe Jericho khopi chu adalhah phat un, Mose nupa-pa chilhah Ken mite chun Judah gamthip gama chun akilhonpi kit tauvin ahi. Hiti chun amaho chutoh Negev gamsunga Arad khopi kom'a chun agamsung mipi ho chutoh agacheng khom tauvin ahi.
17 Hiche jou chun Judah chu Simeon toh apangkhom lhon'in Zephath a cheng Canaan mite chu agasat lhon'in, hiche khopi chu aga sumanghel lhon tan ahi. Hijeh chun hiche khopi chu Hormah ana sah un ahi.
18 Hiche ban ajong chun Judah in Gaza, Ashkelon chule Ekron khopi ho leh avel'a gamho chutoh alah tha tauvin ahi.
19 Pakai chun, Judah mite chu ana umpin hiti chun ama hon thinglhang gam pumpi chu ana lokhum tauvin, ahivangin ama hon sakol thih kangtalai mangchaa phaicham a cheng ho chu ana deldoh jou pouvin ahi.
20 Mose’n ana thutep peh bangin Caleb chu Hebron ana peuvin ahi. Hiti chun Caleb in hiche mun'a cheng Anak chate chilhah thum ho chu ana nodoh in ahi.
21 Ahinlah Benjamin chaten vang Jerusalem’a chengho Jebus mite chu ana nodoh jou pouvin, hijeh chun tuni geiyin Jerusalem khopia Jebus mite hi Benjamin mite toh achengkhom un ahi.
22 Joseph chilhah ten Bethel khopi anasat un Pakaijin ana umpi uvin ahi.
23 Ama hon khopi velhi dingin mi ana sol'un (Tumasanga chu Luz ana kiti ahi).
24 Ama hon khopia konna hung potdoh mikhat chu ana kihoupi uvin, “Hiche khopi lutna ding lampi neihil'un, achutileh keihon khotona kamu sah diu nahi” atiuve.
25 Hiti chun aman alutna thei diu lampi chu ahil'in, amaho hiche lampi achun alut un hiche khopi sunga um jouse chu abon'in athat un, hiche mipa chule a insung mite sevang ahing hoijun ahi.
26 Khonungin hiche mipa chu Hit mite gama aga chenglut in, hichea chun khopi khat aphutdoh in, aman akhopi min chu Luz asah in tuni geijin hiche min chu apuden tan ahi.
Israel phung dang hon adeldoh joulou miho
27 Manasseh phungin Beth-shan, Taanach, Dor, Ibleam, Megiddo sunga cheng miho ahin, avel uva chengho ahiuvin anodoh jou pouvin ahi, ajeh chu hiche mun'a cheng Canaan mite chun hiche gamsunga chu chen den tei ding anatup u ahi.
28 Israel te chu ahung hatdoh phat un, hiche Canaan mite chu sohna ana tohsah un, hinlah gamsunga kon chun adelmang jou pouvin ahi.
29 Ephraim phung jong chun Gezer gamsunga cheng Canaan mite chu ana deldoh jou pouvin, hiti chun Canaan mite chu amaho lah a chun achengjom tauvin ahi.
30 Zebulun phung miten jong Kitron leh Nahalol gamsunga chengho ana nodoh jou pouvin, hiti chun Canaan mite chu alah uva chun achengden tauvin chule Canaan mite chu Zebulun ten sohna atohsah tauvin ahi.
31 Asher phung mite chun Acco, Sidon, Ahlab, Aczib, Helbah, Aphik chule Rehob gamsunga chengho anodoh jou pouvin ahi.
32 Ahin Asher phung mite chun hiche gamsunga ana chengte Canaan mite chu anodoh joulou jeh uvin, alah uvah chun aga chenlut tho tauvin ahi.
33 Hitobang ma chun Naphtali phung chun Beth-shemesh leh Beth-anath gamsunga chengho ana nodoh jou pouvin ahi. Hiti chun Canaan mite lah a chun ana chenlut tho uvin ahi. Ahivangin, Beth-shemesh leh Beth–anath mipite chu Naphtali mipite sohna ana tohsah un ahi.
34 Dan phung mite chu Amor miten thinglhang gama ale nolut kit un chule amaho chu phaicham ah ahung kumsuh tapouvin ahi.
35 Amor mite chu Heres, Aijalon le Shaalbim Mol lama chun chen den ding atup un ahi. Hinlah Joseph insung chu ahung hatdoh phat un Amor mite chu sohna atohsah tauvin ahi.
36 Amor mite gamgi chu Akrabbim a kon'in Sela ajonin hichea kon chun chunglang ajon toupeh in ahi.