2
Bokim mun'a Pakai vantil ahung
1 Pakai vantil chu Gilgal'a kon'in ahung kaltouvin Bokim'a Israel te henga hitin ahung seiyin, “Keiman nangho hi Egypt gama konna kahin puidoh uva, napu napa teu peh dia kana kihahselna gam chu kahin lhut nahi tauve, chule Keiman kaseijin ‘Itih chan hijongleh kaki tepna chu kasuh keh louhel ding ahi,” tin kana seiye.
2 Hiche gamsunga nachen lut tengu leh, hiche gama cheng hotoh khun kitepna nasem thei louhel diu, amavang amaicham semna munhou na suhmang peh joh diu ahi. Chule nang hon kathupeh nanit pouvin na ngai pouve. Ipi dinga hitia hi um’ah nahiuvem?
3 Hijeh chun keiman na gamsung uva chengho ka deldoh pehlou diu, amaho hi nangho dinga nasuboi jing uva pang diu, chule a pathen hou hi nangho dinga lhepna a pang jing diu ahi.”
4 Pakai vantil chun Israel te kom'a athusei chu achai phat in mipi chu akapjah jengun ahi.
5 Hijeh chun hiche mun chu amin Bokim asah un (Hichu kana) tina ahi. Hichea chun ama hon Pakaiya kilhaina ana sem’un ahi.
Joshua hinkho bei
6 Joshua’n amaho chu alhahdoh phat in, ama-ama phungho cheh in agoulo mun agamsung cheh toupha dingin ache tauvin ahi.
7 Chule Israel mipi aboncha uvin Joshua hinlai sungse leh Joshua sanga hingsotjo gollui upaho Pakai thilbol loupi tah-tah ho anabol, amittah a ana muho hinlai sungse chun Israel ten Pakai kin chu anabol'un ahi.
8 Pakai lhacha Nun chapa Joshua chu kum jakhat le som alhin'in ana thitan ahi.
9 Ama hon Gaash Mol sahlang Ephraim thinglhang gam, ama ana kipehna Timnath-serah gama chun anavui tauvin ahi.
Israel te Pakai thua nunglou
10 Joshua khanga miho athisoh hel phat un, Israel khangthah ahung kisepdoh ho chun Pathen’in Israel te dinga thil thupi tah-tah ana boldoh peh ho leh, Ama jeng jong hepha le gelpha aum tapouve.
11 Hiche phat hin Israel ten Pakai mitmun thil phalou tah-tah ana boldoh tauvin, chule Baal doi limsemthu ho chu ana hou tauve.
12 Egypt gama konna ahin puidoh uva apu apateu Pakai, Pathen chu ana nungsun tauvin, ama hon pathen dang ho nung ana juiyun avel uva cheng mite pathen ho chu ana houjo tauvin ahi. Hichun Pakai ana lunghan sah lheh jengin ahi.
13 Ama hon Pakai chu ana nungsun uva Baal leh Ashtoreth semthu pathen ho joh ana hou tauvin ahi.
14 Hiche hin Pakai chu Israel chunga nasatah in ana lunghan sah tan, hijeh chun Pakaijin amaho chu michom gamte khut ah apedoh tan Israel te chu ana chom tauve; chule Pakaijin amaho chu akimvel uva cheng agalmi hou khut ah ana pedoh tauvin, hijeh chun Israel te chun agal miteu ana tingjou tapouvin ahi.
15 Israel ten amaho kisatpi dinga akondoh chan’un Pakaijin amaho dounan gal asat jitan, Aman ana gihna bang chun gal alelsahji tauvin ahileh amaho chu ana lungkham lheh jengun ahi.
Pakaijin amite ahuhdoh
16 Chuin Pakaijin Israel te chu ahindel khum houva konna ahuhdoh ding'un thutan vaihom ho ana tundoh peh uvin ahi.
17 Ahivang'in Israel ten thutan vaihom ho thu ngai louvin pathen dang ho houna in numei kijoh ho bangin ana chon tauvin, Pakai thupeh dungjuiya ana chon apu apateu chonna lampia konna i-atileh ana kihei mangloichal jiuva ham?
18 Pakaijin thutan vaihom ho Israel te chunga atundoh kom leh thutan vaihom ho chu ana mangchajin, amaho hinlai sung chun agalmi houva kon'in ana huhdoh jiuvin ahi. Ajeh chu Pakaijin a engbolna leh thohgimna thoh amipi te chu akhoto jin ahi.
19 Ahinlah thutan vaihom ho athi tengu leh, amipi te chu achonna u adihlou nau lampia akinungle kit jiuvin, ama hon pathen dang ana jui jiuvin, ajenle in ana pangun chujongleh ana hou jiuvin ahi. Hiti chun thil dihlou abol hou chu alouchal jeh un ana paidoh nomji pouvin ahi.
20 Hijeh chun Pakai chu Israel chung’ah nasatah in ana lunghang jin, Pakaijin hitin ana seiye, “Ajeh chu kami ten apu apateu toh kitepna kana sem chu asukeh un chule kathupeh jong nahsah louvin akoi tauvin ahi.
21 Keiman, Joshua'n athi chan geija jousoh louva ana dalhah nam mite chu ka deldoh pehlou ding ahitai.
22 Israel te apu apa teuvin Pakai nung ana jui bang uva ajui uvam ajuilou uham ti, patepna keiman hiche hi kabol ahi.” ati.
23 Hiche jeh a chu Pakaijin hiche nam mite chu deldoh louva, Joshua chu abona ana josah lou ahi.