23
Joshua’n Lhahna Thu Asei
1 Kum phabep ache nungin Pakaijin Israel mipite hi agal miho uva kon'in akicholdo sah tan ahi. Joshua jong ateh lheh tan,
2 aman Israel te upaho leh lamkaiho thutan ho leh vaihom ho akou khomin, aman amaho kom'a hiti hin aseije, “Tuhin keima kateh lheh tai,
3 Pakai na Pathen'un keima phat sunga hi itobang thil na bolpeh uham ti nang hon namu sohkeiyun ahi. Pakai na Pathen'un na melma teu gal nasat peh un ahi.
4 Keiman imelma teu gam ilahsahou leh ihinlah ding hou nachen nau gam dingin kahin hoppeh tauve agamsung hi Jordan vadunga pat a Mediterranean Twikhanglen lhumlam gei ahi.
5 Tun hiche hi nangho gam hi ding ahitai, ajeh chu na Pakai na Pathen'u ama tah in agamsung miho abonna na deldoh peh dingu ahi. Nanghon agam uhi Pakai na Pathen uvin na teppeh bang uva nalo diu ahitai.
6 Hijeh chun Mose’n danbua ana jihlut banga ichepi theina diuvin chingthei jep uhitin, hitia chu kijet hei hihen lang kivei hei hijongleh ichekhel louna diuvin chingthei uhite.
7 Hijeh chun hiche gamsunga um nalai ho lah a ilhahmang louna diuvin ding det uhite. Amaho semthu pathenho nahou theilou diu le akinna jong na kimanchah lou diu, kihahselna a jong naman theilou diu amin'a amin ujong naphah poh theilou diu ahi.
8 Amavang na Pakai na Pathen chu tuni geija dettah a nahin kolchah bang uva hi na kolchah jing diu ahi.
9 Ajeh chu Pakaijin nam hattah tahho nahin deldoh peh un koima chan nangho hi alonaje nahe pouvin ahi.
10 Nangho mikhat seh in jong mi sangkhat nadel jam thei diu ahi, ajeh chu Pakai na Pathen uvin akitepna bangin nagal’u na satpeh tauvin ahi.
11 Hijeh chun na Pakai na Pathen'u na ngailut jingna diuvin, chingtheijun,
12 “Amavang nangho ama a konna na kiheimang uva nalah uva nangho toh umkhom namdang ho chon dan nalah uva amaho toh na kichento uva ahileh,
13 hiteng chuleh nakihet diu chu Pakai na Pathen uvin amaho chu na nodoh peh lou diu ahitai. Hititah sanga chu amaho joh hi nakipalna diuva na lhemlha uva hung pang diu, namit uva ling le khaova hungpang diu chuleh akhonna le Pakai na Pathen uvin napeh nau gampha laija konna delmanga nahung um diu ahi.
14 “Vannoi leiset chena dolla keima hi kahung thivah ding ahitai. Pakai na Pathen uvin akitepna jouse nasuh bukimpeh tauvin khatcha jong athonna aumpoi tihi na lungthim'u giltah in nahe uve.
15 Ahinlah Pakai na Pathen uvin akitepna banga thilpha jouse napeh bang uva hi, athu na ngailou uleh nachung uva hahsatna ahin lhunkhum sah ding ahi. Aman gampha napeh nauva konna hi na suhmang diu ahi.
16 Nanghon Pakai na Pathen'u kitepna hi nanit lou uva semthu pathen ho nahin hou uva akin nahin bol uva ahileh nangho douna a alunghanna mei hung koujah jeng ding chutengle chun aman napeh nau gam phatah a konna hi na mahthah diu ahi.