22
Solam A Cheng Phungho Hung Kile
1 Joshua Reuben chate le Gad chate chule Manasseh phung kehkhat chutoh akou khomin,
2 ajah uva hiti hin aseitai, “Nanghon Pakai lhacha Mose in na thupeh jouse abonchan nanit sohkeiyun, keiman nangho ka seipeh ka thusei jouse jong nangai tauve.
3 Nikho hijat sung tuni geijin nang hon nasopi phungdang te ho jong na dalha deh pouvin, Pakai na Pathen uvin na thupeh chengseu jong chingthei tah in nanit sohkeiyun ahi.
4 Tunvang Pakai na Pathen uvin athutep bang bangin nasopi phungdang te ho jong jong akitepna bangin akicholdo sah tai. Hijeh chun tun kiheijun lang Jordan gal lam'a Pakai lhacha Mose’n napeh nau gam, nangho chenna gamsung nagoulo u, na inlam'u jonin chetauvin.
5 Pakai lhacha Mose’n na thupeh u dan thupeh chengse chu nanit jingna diuvin ching theiyun. Pakai na Pathen'u na ngailut uva ama lamlhah jouse na juithem uva athupeh chengse nanit uva ama jong na kolchah jing uva, chule na lungthim pumpiu le na hinkho pumpiuva ama kin jeng nabol diu nagin jing diu ahi.” ati.
6 Hiti chun Joshua’n amaho chu phatthei aboh in, phatthei abohjou phatnin asoldoh tai. Amaho jong a inlam cheh uva ache tauve.
7 Manasseh phung akehkhat chu Bashan gamsunga Mose’n achan diu gam ana pehsa ahin, Manasseh phung kehkhat ma chu Joshua’n Jordan vadung gal nilhum lam, asopi teu dang ho lah a chenmun anapeh ahiye. Amaho chu Joshua’n a inlam uva asoldoh phatnin abonchauvin phatthei aboh sohkeijin ahi.
8 Ajah uva Joshua’n hitin ati, “Nei le gou tampitah kipoh uvin lang gancha jong tamtah kipoh uvin lang na ponbuh akon namun cheh a kile tauvin, nagal mite uva konna na chomdoh jouseu jong kihom'un” ati.
9 Hijeh chun Reuben chate le Gad chate chuleh Manasseh phung kehkhat chun Israel chate amoh chengse chu Canaan gam'a Shiloh kiti khopiah chun adalhauvin, amaho chu Pakaijin Mose athupeh banga agamlosa sung’u Gilead gamsung jonin ache tauve.
Solam’a Cheng Hon Pathen Maicham Atundoh-U
10 Ahin amaho chu Canaan sung’a aum jinglai un, Geliloth kiti mun Jordan vadung kom'ah chun, Reuben chate le Gad chate chule Manasseh phung kehkhat chu akingapa un, maicham phung lentah le thupitah khat asem'un ahi.
11 Israel chaten, Reuben chate le Gad chate, chule Manasseh phung kehkhat chun Canaan gammongchin Jordan vapang lhang chung khat a Israel chate gamsunga khun maicham asem'u chu ajadoh tauve.
12 Athudol hi Israel chaten ajahdoh phatnun Shiloh mun a cheng Israel chate khopi pumpi akikhom uvin amaho chu gal a sattho din ago tauve.
13 Ahinlah, amasan, Eleazar thempu chapa Phinehas lamkainan mi phabep Reuben phung mite le Gad chule Manasseh phung kehkhat toh kihou din anasol uve.
14 Hichea kihoulimpi dia kalsong miho chu Israel phunglah a lamkai som ahiuvin, a insung khat bahkailhah a aluboh cheh, chule Israel insung phung khat cheh a konna kilhengdoh phung upa cheh mi ahiuve.
15 Amaho chu Gilead gam ahunglhun phat un, Reuben chate le Gad chate chule Manasseh phung kehkhat hengah hitin asei uve,
16 Pakai khoppi amiten hitin aseijun, “Ipi dinga nang hon tulaija hi Israel Pathen douna thil nabol uva Pakai nung na juida uva nakiheimang jeng uva nacham chamma maicham nakisem jeng uva Pakai douna hitobang pihi nabol'u hitam?
17 Peor mun'a ichonset nau jong phaset nasah louvu ham? Hichea konna bon ithensoh jouloulai u hilou ham? Hiche ichonset jeh uva jong chu Pakai khoppi mipi chunga jong gamna hise ana langsa ahi.
18 Tuni geija jong nangho hitobanga hi Pakai chu iti na dalhah uva na kiheimang jeng diu hitam? Tuni jenga jong nang hon Pakai doumah nabol uva ahileh ama chu Israel khoppi pumpi chung jenga jong hung lunghang jeng ding ahi.
19 Na chennau gamsung athen louva ahi jongleh hung galkai unlang Pakai Houbuh kisonna gamsung Pakai gamsunga khun keiho lah a hung cheng jeng uvin, Pakai doumah hi nabol louhel diu, Pakai iPathen'u maicham semna tailouva nacham-nacham'a nakisem thu uva keiho geija doumah hol neiso louhel dingu ahi.
20 Suhmang dinga kikatdohsa thil ho chunga Achan kitipa Zerah chapan tohkhel anei chu Israel khoppi pumpi chunga lunghanna hung chu jengsa hilou ham?” ahung tiuve.
21 Reuben chate le Gad chate chule Manasseh phung kehkhat chun Israel phung sunga insungmi upaho donbutnan aneiyun,
22 “Pakai, Hatchungnung chu Pathen ahi! Pakai, Hatchungnung chu Pathen ahi! Aman thudih le thutah chu ahenai, chule Israel chaten jong nahet uva pha ahi. Keihon maicham kasem uhi Pakai doumahna dia kabol'u ahipoi. Ka thilbol uhi doumah lam ahitah a Pakai dinga tahsan suhbeina ahi ding leh keiho hi tunin eihinghoi da jeng uvin.
23 Ahin maicham khat ka semdoh jeh uva Pakai nungjuija konna kihei mangna ahi mong ding leh ahilouva keihon hiche maicham chunga hi pumgo thil hihenlang lhosoh thilto hijongleh chamna thilto hijongleh kato uva ahivang leh Pakaijin kachung uva gotna eipe jeng uhen.
24 Tahbeh mongin, keihon hiche maicham kasem uhi katijat man uva kabol'u ahi bouve, ajeh chu khonung tengleh nacha teuvin ka chateu jah a, ‘Nang hon Pakai Israel Pathen chu koi thusahna a nahou uham?’ ahinti diu ahi.
25 Ajeh chu Pakaijin nangho toh Reuben chate Gad chate, ikikah uva Jordan vadung hi gamgia asemsa ahitai, khunungleh nang hon Pakaiya chan nanei pouve ati theiju ahi, hitobanga hi nacha teuvin ka chateu hi Pakai ahousah da theiyu ahi.
26 Hiche jeh a chu keihon ka maicham sem uhi pumgo thilto gona ding le kilhaina ganthana ding ahipoi,
27 ahin keiho leh nangho kikah a hetjingna dia kasem'u ahi, chujongleh hichun eiho nunga khangthah te kah a jong hettohsah nan hung pangin tin, keihon jong Pakai angsunga ama kin kabol mong-mong uvin pumgo thilto jong kilhaina gantha jong chule chamna thilto gantha jong kabol nauve ti hetjingna in hung pang nante, katiu ahi. Achuti louva ahileh khonung phat leh nacha teuvin keiho chate jah a, “Nang hon Pakaiya chan nanei pouve” ahinti khah tei diu ahi tia kabol'u ahi bouve.
28 Ijemtia hita chu ahinsei khah tah ujongleh, khonunga katu kacha teuvin jong, ‘Veuvin, Pakai dinga kapu kapa teuvin asemsa maicham khu pumgo thilto kitona jong hilou, kilhaina gan thana maicham jong hilou, ahin nangho leh keihon Pakaiyah chan inanei khom'ui ti melchih nan pang nante’ katiu ahi bouve.
29 Itihchan hijongleh keihon Pakai doumah kabol louhel diu ahin, chujongleh Pakai iPathen'u maicham ama Houbuh maiya kitung tailouva keihon kacham cham uva pumgo thilto tona ding leh lhosoh thilto tona ding chule kilhaina ganthana dia maicham kasem uva Pakai nunga konna kaki heimang louhel diu ahi” atiuvin ahi.
30 Reuben chate leh Gad chate chule Manasseh phung kehkhat thusei ho jouse chu ajah doh phat uvin, Phinehas thempupa le akilhonpi khoppi lamkai ho leh Israel insung jouse phung upa chengse chu alungu alhaisel tauvin ahi.
31 Eleazer thempupa chapa Phinehas chun Reuben chate Gad chate chule Manasseh phung kehkhat jah a aseipeh in, “Ilah uva Pakai aum jing nai, ti keihon tunin kahe tauve, ijeh-inem itileh keihon nangho kana ginmo bang’un Pakai dounan thilse ima nabol hih nauve chuleh nang hon Pakai khutna kon'in jong Israel chate hi suhmang’a aum thei nauva kon'in na huhdoh tauve” atin ahi.
32 Chujouvin Eleazer thempupa chapa Phinehas le lamkaiho chun Reuben chate le Gad chate Gilead gamsung’a chun adalhauvin, hikom'a kon chun Canaan gamlam, Israel chate chenna lam'a ahung kile tauvin, Israel te henga chun thilsoh um chan thu chengse chu alhut tauvin ahi.
33 Athulhut u chun Israel chate chu alungdam sah lheh jengin ahi, chuphatnin Israel chaten jong Pathen avahchoijun, Reuben chate le Gad chate chenna gamsung suhmang ding le galbol ding jong aseipoh kit tapouve.
34 Reuben chate le Gad chaten maicham asemsau chu ‘Hettohsah’ tin aminsah tauvin ahi, ama hon aseijun, “Ijeh-inem itile eiho le amaho kikah a Pakai chu eiho Pathen jong ahi ti hettohsah a pang ahi,” atiuve.