7
Gideon'in Midian Mite Ajo
1 Jerub-baal (Gideon tina) leh asepai te matah in athouvun Herod twinah chan geiyin ache tauvin ahi. Midian sepai te chu amaho sahlang Moreh lhang kom'a phaicham'a ngahmun ana kisem'un ahi.
2 Pakaijin Gideon kom'a aseijin, “Nangin galsat ding mi natam pui behseh e. Keiman na boncha uvin Midian te gal nasatsah uleng, Israel miten keiho thahatna a kaki huhdoh u ahi, tin Keima dounan hung kiletsah get un nate,
3 Hijeh chun mipite jah achun koi hileh kichatna neiho sesen hiche mol hi dalhau henlang a incheh uva che tauhen tin seipeh in,” ati. Hiti chun alah uva 22,000 chu inlanga acheuvin, galsat ding ngapcha a mi 10,000 bou adalha tauvin ahi.
4 Ahin Pakaijin Gideon aseipeh kit in, “Tun jong atam behseh nalaiye hijeh chun don ding twikhuh a puisuh inlang hiche mun a chu keiman nache khompi ding ho leh nache khompi louding miho kahin lhenkhen ding ahi,” ati.
5 Gideon'in mipi ho chu twikhuh phunga apuisuh phatnin Pakaijin hitin ahin seipeh in ahi, “Mipi ho chu loi-ni in homkhen inlang loikhat chu akhut nia twi soh a uicha banga aleija le-tho ho hi ding, loikhat chu akhupma dilsua amuh a chiptho ho hi ding ahi,” ati.
6 Mi 300 in bou akhut tenia kon'in adontho uvin ahi. Adangse chu akhupmin adilsu uvin amuh in achip tho uvin ahi.
7 Pakaijin Gideon kom'ah ahin aseijin, “Hiche mi 300 ho hi kipuijin Keiman na huhdoh ingting Midian ho chu nagajo ding’u ahi, midang ho jouse chu a inlang cheh uva soltan,” ati.
8 Hijeh chun Gideon'in midang ho neh le chah chuleh saki sumkon apoh hou chu achom khom’in, hiti chun adangse chu a inlanga asoltan ahi. Amavang mi 300 bouseh chutoh aum tan ahi.
Midian ho chun Gideon umna noi phaicham'a chun ngahmun asem tauvin ahi.
9 Hiche jan chun Pakaijin hitin aseije, “Kipat inlang Midian ngahmun'a gachesuh in, ajeh chu amaho chunga hi galjona kamusah ding nahi!
10 Ahinlah amaho gasat ding hi nakichat a ahileh na lhacha Purah chu kipuijin angahmun uvah gachesuh lhon'in,
11 Midian ten ipi asei uvam ga ngailhi lechun nangma na kitilkhou chom lheh ding ahi, hiteng chuleh nangin amaho gasat ding chu ngapcha tan nate,” ati.
Hijeh chun Gideon'in Purah chu akipuijin gal miho ngahmun komcha achun achesuh lhon tan ahi.
12 Midian mite le Amalek mite chuleh solam mite sepai ho chu hiche phaicham'a chun khaokhote alomchang lah bangin atam a tam ana pansa uvin ahi. Asangan hou jong chu twikhanglen panga neldi jat bangin sim a sim joulou jat ana phauvin ahi.
13 Alah uva mikhat chun aloipa kom'ah amang ahin seijin ahileh Gideon chun hichu ajah phahna dingin agah kithol lut in ahi. Hiche pa chun hitin ahin seije, “Keiman mangkhat kana neijin kamang’a chun sakol chaang a kisem changlhah lumkhat Midian te ponbuh geiyin ahung kilih suh peh in, hichun ponbuh hi ahin tat khan akhup athal'in akileh jengin chujouvin akiphamat deh jengin ahi!” ati.
14 Hichun aloipa chun hitin adonbutnin, “Namang chun thil khat adoi aum'e Pathen’in Israel mi Joash chapa Gideon hi Midian mite le apan khompiho jouse chung’a hi galjona apeh ahitai!” ati.
15 Gideon in hiche mang akiledohna thucheng chu ajah phatnin Pakai ang’a abohkhup in chibai aboh tan ahi. Hiche jou chun Israel te ngahmun’ah ahung kilekit in kho asam tan ahi, “Kipatdoh un Pakaijin Midian mite le akiloikhompi chengse chung’a hi galjona eipeh u ahitai!” ati.
16 Hiti chun Gideon'in a sepai 300 chu loi thum'in ahomin mikhat cheh chu saki sumkon khat cheh leh leibel khat cheh asunga meisel um cheh toh apehtha in ahi.
17 Hiche jou chun Gideon'in ajah uvah hitin aseije, “Namit teni uvin keima neihinve jingun, amaho ngahmun kom kalhun tengleh keiman kabol bol hinbol'un.
18 Kei le kalhonpi kaloi hon saki sumkon kahin mut tengu leh, ngahmun kimvel jousea konna nang hon jong sumkon nahin mut sohkei uva nahoh diu, ‘Pakai ding le Gideon dingin’ tin hinsam cheh un!” ati.
19 Jan khangkim jou panmun ngahho kikhel jou pettah chun Gideon leh aloi mi jakhat chu Midian te ngahmun komcha chu agalhung tauvin ahi. Photlot tah in ama hon saki sumkon chu amut un leibel chu avokeh tauvin ahi.
20 Hiche jou chun loithum ho cheng chun asumkon cheh u amut un aleibel cheh u jong avokeh tauvin ahi. Ama hon ameisel'u kong leiloi chu akhut veilamin achoijun chuleh jetlangin asumkon uchu achoijun ahoh cheh un, “Pakai chemjam ding leh Gideon dingin” tin hasap in asam'un ahi.
21 Ngahmun kimvel achun abonchauvin ama-ama dinmun cheh a chun dettah in adingun ahileh, Midian mite chu tijatah in apentoh akatoh ajamtoh atho tauvin ahi.
22 Israel mi 300 in saki sumkon chu amut cheh phat un Pakaijin ngahmun sunga um galsat dia kigong miho chu achemjam un amaho leh amaho akisatto sah tan ahi. Akisatlih lou chengse chu Zererah kom Beth-shittah chan gei leh Tabbath kom Abel-meholah gamgi geijin ajamlut tauvin ahi.
23 Hijou chun Gideon'in, Nephtali le Asher chuleh Manasseh sepaiho akou khomin Midian mite gal jamho chu adelpeh un ahi.
24 Gideon'in Ephraim thinglhang gamsung muntin a thupole ho asolin hiti hin aga seisah in ahi, “Hung konsuh unlang Midian te hung satnun Beth-barah mun Jordan vadung paltanna mun'ah amaho hi hung ting tan’un,” ati.
Hijeh chun Ephraim mite jousen akisei bangin atongdoh sohkeiyun ahi.
25 Ama hon, Midian mite gal lamkai teni Oreb le Zeeb chu amanun, Oreb chu Oreb songpi munnah athatnun chuleh Zeeb chu Zeeb lengpithei hehna munnah athatnun ahi. Chuleh Midian te chu ana nungdel peh un ahi. Hiche jou chun Israel ten Oreb leh Zeeb luchang teni chu Jordan vadung gal lam'a Gideon kom'a chun ahin polut un ahi.