8
Gideon in Zebah le Zalmunna atha lhon
1 Hiche jouhin Ephraim mipi ten Gideon adong'un, “Ipi dinga hitia hi neibollu ham? Midian te sat dinga nahung kijot uva chu ipi dinga neina kou louvu ham?” atiuvin; lungnatah in Gideon chu ana kinelpi uvin ahi.
2 Ahin Gideon'in adonbutnin, “Nangho toh tekah dinga ken ipi katohdoh beh am? Ephraim min lengpithei alolhah jouva amoh akhen hou chu Abiezer phungbah neocha ho lhosohga pumpi sanga tamjo hilou ham?
3 Pathen’in Midian gal lamkai teni Oreb le Zeeb chunga galjona napeh toh tekah thei dinga ken ipi katohdoh beh am? ati. Ephraim mihon Gideon thusei chu ajah phat un alunghan nau adailha tai.
Gideon In Midian te Leng Ana Matdoh
4 Gideon'in amite 300 toh Jordan vadung ahin pal galkaijun ahi, athachol lheh jeng vangun agal miteu chu ana del nalaijun ahi.
5 Succoth alhun phat un Gideon'in akhopi lamkaiho kom'ah “Ka sepai te ho dingin anneh themkhat beh neipeuvin amaho hi athachol lheh tauvin ahi. Keiman Midian lengte Zebah leh Zalmunna kahin del ahi,” ati.
6 Ahinlah Succoth lamkai ten adonbut’un, “Zebah le Zalmunna chu hin man masauvin chujou teng keihon na sepai te vah nauvinge” atiuve.
7 Hiche phat chun Gideon'in ajah uvah, “Pakaijin Zebah le Zalmunna chunga galjona eipeh uva kahung kile lam tengleh gammang noiya konna kahin lah ling le molla natahsau kajep teldeh ding nahiuve,” atitan ahi.
8 Hichea kon'in Gideon chu Peniel langah ache touvin amaho kom'a jong chun neh ding an athum’in ahileh ama hon jong hitobang machun ana donbut un ahi.
9 Hijeh chun aman jong amaho kom'a chun, “Gal kahin joa kahung kile teng hiche intingvum hi kaloi chim ding ahi” atipeh tai.
10 Hiche pet hin Zebah leh Zalmunna chu Karkor munnah sepai 15,000 toh aum khom lhon'in ahi, hicheng ho chu solam gamkaija pangkhom sepai 1,20,000 ana kithat holah a amoh ho cheng chu ahiuve.
11 Gideon'in Nobah le Jogbehah solam mi kiveiho lampi chu akolin aum kimvelin, chuin Midian sepai te chu kigingman louvin adelkhum tan ahi.
12 Midian leng teni Zebah leh Zalmunna ana jam lhon'in ahin, Gideon'in adelsuh peh in asepai te jouse toh amattha tan ahi.
13 Hiche jou chun Gideon chu agalsat munna kon chun ahung kile in Heres lampi chu ahin jotnin ahi.
14 Hichea chun Succoth a konna hung gollhang khat amanin akhopi sunga thunei vaihom ho leh lamkai upa somsagi le sagi ho min chu ajihdoh soh tan ahi.
15 Gideon chu Succoth lang’ah akile in alamkai hou kom'a chun hitin aseitan ahi, “Tuhin Zebah le Zalmunna chu hikom'ah aumtai, tumasanga nakom uva kahung chun nang hon noise tah in Zebah leh Zalmunna chu hin man masauvin chutengleh na sepai te thachol chu vah nauvinge natiuvin ahi.
16 Hijou chun Gideon'in akhopi lamkaiho chu gammang noija ahinlah ling le mol chun ajepmin hilchahna anei tan ahi.
17 Aman Peniel intingvum jong chu avochim’in hiche khopi sunga umho jouse chu athat gam tan ahi.
18 Hijou chun Gideon'in Zebah leh Zalmunna chu adongin “Tabor munna natha hou chu itobang mi hiuvam?” ati.
Amanin adonbut lhonin “Nang tobang ahiuve, ama ho chun leng cha hina lim le mel apu cheh uve,” ati lhon'in ahi.
19 Hichun aman jong, “Amaho chu kasopi pasal ho ahiuvin, keima kanu tah chate jeng ahiuve,” ati. Chujouvin Gideon'in, “Hingjing Pakai minna kasei ahi, amaho chu ana that hih leu chun tunia hi nangni katha lhon louding ahi,” tin asaptho jeng tan ahi.
20 Chuin Gideon akiheiyin achapa atahpenpa Jethar kom'a chun, “Kipat inlang ani lhon'in that tan” ati. Ahin Jether chu chapangcha ahijeh in akichan achemjam asatdoh ngam tapon ahi.
21 Hichun Zebah leh Zalmunna chun Gideon kom'ah asei lhon'in, “Pasal nahina tah langin, nangma tah in nei that jeng lhon'in,” ati lhon'in ahi. Hichun, Gideon'in amani chu athat in asangongsang ngong lhon’a thil mantam ho chu akilah tan ahi.
Gideon In Ompho Asem Chule Athi
22 Hichun Israel ten Gideon kom'a chun “Nang le na chate chuleh natute chan geijin kachung uvah vaihomin pang tauvin ajeh chu nangin Midian te a kon'in nei huhdoh tauvin ahi,” atiuve.
23 Ahin Gideon'in adonbut’in, “Kei kahin ka chate ahin nachung uva vaihom pouvinge, Pakai joh in nachung uva vai ahom ding ahi.
24 Ahinlah keiman thil khat kathum nom'e, nang ho mikhat cheh in galmi natha houva konna nahin chomdoh u bilba chu neipe uvin,” ati. (Gal miho chu Ishmael te ahijeh un sana bilba akiba cheh u ahi).
25 Ama hon kipah tah in aseijun, “Peuvinge” atiuve. Hiti chun amaho khat cheh in, galla ahin chomdoh lah uva kon'in sana bilba ho chu pon aphauvin aseplha sohkeiyun ahi.
26 Hiche sana bilba ho chu pounds somli le thum aphan ahi, hichea panglou galla ahin chomdoh u adang ho chu, lengte kijepna thil mantam ho, Midian leng ten akivon'u ponsandup ho leh asangongsao hou ngonga a-opeh u thil mantamho jouse jong ahi nalaiye.
27 Gideon'in hiche sana hoa kon chun ompho asemin ama khopi Ophrah munna akoiyin ahi. Ahinla gangtah in Israel ten hichu ahin hou un kisuhboh nan aneiyun, hichu Gideon le a insung mite dingin kipalna in ahung pangtai.
28 Hiti hin Israel ten Midian te chu ana sunem’un ahileh hiche kah chu Midian te akiledoh jou tapouvin ahi. Hichea kon chun Gideon hinlai sunga kum somli sungin gamsung’ah chamna alengin ahi.
29 Hiche jou chun Joash chapa Gideon chu a inlanga akile tan ahi.
30 Aman chapa som sagi aneijin ahi, ajeh chu amahin ji tamtah anei jeh ahi.
31 Aman Shechem mun a thaikem khat ana neijin, amanu chun chapa khat ahinpeh in amin Abimelech ahi.
32 Gideon athi chun ateh lheh jeng tan ahi, ama chu Abiezer phung mite gamsunga um Ophrah mun'ah apa Joash lhankhuh a ana vui tauvin ahi.
33 Gideon thijou jouvin Israel te chu amaho leh amaho akisuboh un Baal chu pathen’in akisem'un Baal doilim semthu ho chu ana houvun ahi.
34 Ama hon avel uva cheng agal mite jouseuva konna ahin huhdoh uva a Pakai a Pathen'u chu asumil tauvin ahi.
35 Ama hon Israel mite dinga thilpha tamtah ana tongdoh a Jerub-baal kitipa Gideon insung mite jeng jong jana leh gelkhohna imacha ana nei tapouvin ahi.