6
Gideon Thutan Vaihom’a Ahung Pan
1 Israel ten Pakai mitmun thilse jeng anabol tauvin ahi. Hijeh chun Pakaijin amaho chu kum sagi sungin Midian mite khut a ana pedoh kittan ahi.
2 Midian te chu akhoh behseh jengun ahileh Israel te chun amaho leh akihinso theina dingun molchung ho leh songko ho chuleh kulpi hoilai lai jah kiselna ding akisem'un ahi.
3 Israel ten chang le mim akitu teng’u le Midian mite le Amalek mite chuleh solam mite ahungun Israel te chu ahung delkhum jiuvin ahi.
4 Amaho chu agamsung a chun apansaden jiuvin, alousohga ho asuhsetpeh jiuvin, Gaza chan geijin Israel te gancha ho kelngoi ho le kelcha ho chuleh asangan hou achompeh jiuvin, aneh diu imacha ana khenpehji pouvin ahi.
5 Hiche galmi ho chu agancha houleh aponbuh utoh ahung kon jiuvin khaokho te jat aphauvin, asangongsao tamtah simsenlou ho chutoh ahung tollutji uvin ahi. Amaho chun agamsung chu abah gamhel tokah un aumden jiuvin ahi.
6 Hiti chun Israel te chu Midian te jeh in kel in aumji tauvin ahi; chuphat chun Israel te chu Pakai kom'ah panpi ngeh in ana kapjah jeng tauvin ahi.
7 Midian ten asuh genthei jeh uva aka jah jeng phat un
8 Pakaijin Israel te kom'ah themgao khat anasol tan ahi. Aman hitin ana seije, “Hiche hi Pakai Israel te Pathen'in asei ahi, ‘Ken nangho Egypt a na sohchan nauva konna kahin puidoh u nahi tauve.
9 Egypt mite a kon leh nangho na sugenthei hou jousea kon'a kahin huhdoh u nahi tauve, Keiman nagal mite chu kadel mang peh un hiche gam hi nangho kapeh u nahi tauve.
10 Keima hi Pakai na Pathen'u kahi, tua nachon nauva agam mi Amor mite pathen ho hi nahou louhel diu ahi, kana tin ahi, ahinlah nang hon kasei na ngai pouvin ahi,” ati.
11 Hiche jou chun Pakai vantil chu Ophrah kiti mun a thingphung lentah noiya chun ahung touvin ahi. Hiche Ophrah kiti hi Abiezer phungmi Joash kitipa a ahi. Joash chapa Gideon chun lengpi thei hehna sunga chu suhlou chang anavoh a Midian mite a konna achaang chu sel ana go in ahi.
12 Pakai Vantil chu ahung kilah in ajah a, “Mihat gal-hang nangma Pakaijin na umpi jinge,” ahintin ahi.
13 Gideon’in adonbut in “Hepu, Pakaijin eiumpi uva ahileh hitobang hahsatna hi kathoh diu ham? Kapu kapa teuvin, Pakaijin thil kidang ana tohdoh peh eina seipeh ho chu hoilang geiyah hitam? Pakaijin Egypt gam'a konna eina puidoh u hitalou ham? Ahin tunvang Pathen'in einuse tauvin chule Midian mite khut a eipehdoh u ahitai,” ati.
14 Hiche jou chun Pakaijin amalam ahin ngan, “Na thahatna chu mangchan lang Midian te a kon'in Israel te chu gahuhdoh tan, hiche dinga chu keiman nang hi kasol nahi,” ati.
15 Ahin, Gideon'in adonbutnin, “Pakai ken Israel chu iti kahuhdoh jou ding ham? Kaphung jong hi Manasseh phung lah a alhasam pen ahin chuleh keima tah jeng jong hi ka insung lah uva aneopen kahi bouve” ati.
16 Pakaijin Gideon kom'a chun, “Keiman nanga kaumpi jing ding ahi. Chuleh nangman mikhat seh toh kisatto banga Midian te chu na suhmang sohhel ding ahi,” ati.
17 Gibeon'in adonbut in, “Nangin nei kithopi mong ding ahileh Pakaijin kakom'a hin thu asei mong-mong'e ti kihet theina dingin melchihna khat neipen,” ati.
18 “Keima kahung kilekit a nakom'a maicham a toding kahin choi tokah in ana potdoh hihbeh in” ati. Hichun aman jong “Nahung kilekit kahsen hikom'a hin anaum jing nange,” ati.
19 Gideon gangtah in a inlang’a achen, kelcha dongkhat aga hon’in, changbong pocha khat alan, chol sollou changlhah themkhat aga kangin ahi. Hiche jou chun asahon chu pocha khat a ahin domin atwi jong belkhat ah ahin choijin thingphung len noija ana tou vantil kom'ah aga luipeh tan ahi.
20 Pathen vantil chun akom'ah, “Sa me kihon chuleh cholsolou changlhah chu songpi chunga chun koijin lang chuleh, satwi chu achungah sunglhan,” ati. Chuin Gideon chun akiseipeh bang chun abollin ahi.
21 Hiche jou chun Pakai Vantil'in akhutna achoi atenggol monghem achun kelchasa le changlhah chu agah tongkhan ahileh songpia kon chun mei ahung koudoh in ahin choiho jouse chu akavam tan ahi. Hiche jou chun Pakai vantil chu amang tan ahi.
22 Chutah chun Gideon'in jong Pakai vantil mong-mong ahinai ti ahechen tai, hiche jeh chun Gideon in hitin aseitai, “Pakai, keima amangthah kahitai, ajeh chu keiman Pakai vantil chu kimaiton kakimupin ahi,” ati.
23 Hichun Pakaijin adonbutnin, “Lungmong'in, Imacha tiponte, Kicha hih in. Nathi louding ahi,” ati.
24 Chuphat in, Gideon'in Pakai maicham khat asemin amin Yahweh-Shalom asah in ahi (Hichu Pakai hi chamna ahi tina ahi). Hiche maicham chu Abiezer phung mite gam Ophrah munnah tuni geijin aum jing nalaijin ahi.
25 Hiche jan machun Pakaijin Gideon kom'ah hitin aseipeh tai, “Napa gancha lah a kon'in kum sagi lhingsa bongchal ani channa chu hinkaijin lang, napan ana tundoh Baal maicham chu volhu inlang chuleh akom'a kitung Asherah doikhom chu satlha jengin.
26 Chujou tengleh Pakai na Pathen maicham khat hiche thinglhang leh amuntheng’ah khun tungdoh inlang, songho chu phatah in goltoh inlang, Asherah doikhom nasat lhuh chu meitina’n mangin lang bongchal chu maicham chunga chun pumgo thilto in tohdoh in,” ati.
27 Hijeh chun Gideon'in alhachaho mi som akipuijin Pakaijin bollin ati bang- bang chun aboltan ahi. Ahinlah khopi miho leh apa insungmi adang ho akichat jeh in janin abollin ahi.
28 Ajing jingkah matah in khopi mite ho chu ahungtho phat un Baal doikhom maicham chu ana kivolhu tan chuleh akom'a kitung Asherah doikhom jong chu ana kisat lhutan ahi, ti amudoh tauvin ahi. Hiche ho khel chun maicham thah khat ana kitungdoh in hiche chunga chun bongchal pumgo thiltoa ana kitodoh jong chu amu uvin ahi.
29 Mipi ho chu khat le khat akihouvun “Koi bol ahidem”? atiuvin ahi. Hitia akihoutoh le uva ahin kholchil phat un Joash chapa Gideon ahi ti ahin hedoh tauve.
30 Khopi mite ho chun Joash kom'ah “Nachapa chu hin puidoh in, Baal maicham asuhset jeh leh Asherah doikhom asat lhuh jeh a ama hi thi tei-tei ding ahi,” atiuve.
31 Ahinlah Joash chun ama hung nokhum mipi ho chu ale senjah jengin, “Ipi dinga nang hon Baal doi dinga naseipeh uva nahuh uham? Koi hileh ama huhna a thusei pen-pen chu jing le jingkah langa kithat ding ahi. Baal hi pathen dihtah mong ahileh ama chungthu aman kisei nante, chuleh ama maicham asuse pen-pen chu aman kisuhmang nah hih ding ham?” ati.
32 Hijeh chun hiche nia pat chun Gideon chu Jerub-baal asah tauve. Hichu “Baal chun amapa chunga aphu kilah hen,” tina ahi, ajeh chu aman Baal maicham ana vohchim ahi.
Gideon In Melchihna Athum
33 Hiche jou chun Midian mite le Amalek mite chuleh solam mipite ho chu apangkhom’un Israel te sat dingin Jordan vadung ahung galkaiyun Jezreel phaicham achun akikhom uvin ngahmun akisem tauvin ahi.
34 Hichun Pakai Lhagao chu Gideon chunga apansa tan ahi. Aman saki a kisem sumkon chu amut in galsat ding mi akou khomin ahileh Abiezer phung miho chu ama kom'ah ahung tauvin ahi.
35 Aman thupo miho chu asolin Manasseh, Asher, Zebulun leh Naphtali galsat ding miho chu aga kousah in ahileh amaho abonchan ahung kon tauvin ahi.
36 Hichun Gideon Pathen hengah ataovin, “Nangin na-na sei banga keima hi Israel te jouse huhdoh dinga nei manchah mong-mong ding ahileh,
37 hiti chun nei hetchet sah in, keiman tujan tengleh amulnei kelngoivun hi changvohna phol chunga kakoi ding ahi. Hiche kelngoi vun hi jingkah tengleh daitwi ana chapnou inlang amavang tol hi anagot a ahileh nasei banga chu Israel te hi huhdohna dinga nei manchah got ahi ti ka hetchetna ding hihen,” ati.
38 Hitobang chet chun thil chu ana sohdoh tan ahi. Ajing jingkah chun Gideon matah in athoudoh in kelngoi vun chu aheh a ahileh twi khon khat dimset ahungdoh in ahi.
39 Chujou chun Gideon'in Pathen kom'ah hitin asei kit’e, “Nei lunghan hihbeh in, thil khat kathumbe nom nalaije. Hiche kelngoi vun hi mangcha a hetchetna khat neipehbe nahlai ding kadeije. Tuchung hin hiche kelngoi vun hi gotsah inlang, avel'a tol hi daitwi ana chetsah in,” atin ahi.
40 Hiche jan jong chun Pathen’in Gideon ngeh bang chun ana bolpeh kit in, kelngoi vun agotsah in chule tollhang bou chu daitwi in ana chapkot in ahi.