5
Deborah le Abinoam chapa Barak labol
1 Hiche nichun Deborah leh Abinoam chapa Barak in hihe la hi asa lhon'e.
2 “Israel lamkai hon alamkaiyun
chule mipin kipah tah in anung’u ajuiyun,
Pakai chu thangvah in umhen!
3 “Leng te ho ngaitem un!
Nangho vaihom mithupi ho phaten ngaitem uvin!
Keiman Pakai thangvahna la kasah ding,
Pakai Israel Pathen kom'a tumging tum pum’a
keiman la kasah ding ahi.
4 “Pakai nangma Sier mun'a kon nahung kipatdoh a
Edom phai nahin lonkhum chun,
leiset pumpi akithing jengin,
chule vanlai jol'a meilhang jeng jong gotwi juh in ahung julhai.
5 Pakai Sinai Mol chu nahung kilandoh phat in,
mol ho chu Israel Pakai, Pathen masang'ah akithing jengin ahi.
6 Anath chapa Shamgar nikholai
chuleh Jael nikho laijin
mipi ten lamlen jeng jong apelun,
kholjin ho jengin jong lampel lang ajotji tauve.
7 Israel te minu banga Deborah ahung kipat tokah chun
Israel thinglhang khoho a mihem themkhat bou ana kidalha tan ahi.
8 Israel ten pathen thah thahho ahin kilhen phat un
khopi kelkot phungho a gal ahung pohjal jengin ahi.
Ahinlah Israel galmi sang somli ho lah a chun
tengcha le lum akimudoh pon ahi.
9 Kalungthim pumpi hi Israel gal lamkai galsat dinga
hung kipedoh ho chung achengin ahi.
Pakai chu thangvah in umhen!
10 “Nangho sangan hoitah tah chunga kampol pon
hoitah tah toupha a lhaiho leh
lamlen dunga vahle hon ngaito uvin!
11 Thinglhang’a la a sathem tahtah ho
twi lonlhahna vadung panghoa akikhom’un
Pakai chonphatna galjona loupitah tah asamphong uve.
Hiche jou chun Pakai mipi te
khopi kelkot phung lang jonin
ahung konsuh tauve.
12 “Thouvin, Deborah, thouvin!
Thouvin, thouvin la saovin!
Thouvin, Barak!
Abinoam chapa na gal-hing mat ho hinkaijin!
13 Tabor molla kon'in milen milal ho themcha bou ahung kijot suh ui.
Pakai mipi chu gal-hattah ho nokhum dingin ahung kijot suh un ahi.
14 Amalek mitea konna kilahpeh
Ephraim'a kon'in ahungsuh un
Benjamin, nangma le na sepai te nahin jui uve.
Makir a kon'a gallamkai ho ahungsuh uvin
Zebullun na kon'in gal lamkaiho manchah choiho ahungun ahi.
15 Issachar a leng chapa te chu Deborah leh Barak lam’ah apangun ahi.
Ama hon Barak ahinjui un phaicham langa ahung lhailut un ahi.
Ahinla Reuben phung sung’a vang lungkhat ahithei pouve.
16 Ibol'a nangho kelngoi hon ho lah a nomsatah a na touthim uva
kelngoi chingho saisip sap chu namoh ngai-gai uham?
Ahinla Reuben phung sunga vang
kilungkhatna anei thei pouve.
17 Gilead vang Jordan solam'a aumden tan
chule Dan chu ipi dinga inmun'a um nalai ham?
Asher vang twikhanglen panga kongkai munna
achengden tan ahi.
18 Ahinlah Zebulun vang Naphtali te ho bol bangin
gal kisat khoh laitah a chun ahinkhou phal ngam’in pan alauvin ahi.
19 Canaan lengte ahungun Megiddo twinah phung kom'a chun
Taanach munnah gal asatnin imacha alemlo pon ahi.
20 Chunga ahsi ten van'a kon'in gal asatnin,
ahsi ten akikhai khum nauva kon'in Sisera dounan gal ahin sat un ahi.
21 Kishon vadungin alhohmang gam tauve.
Kishon kiti gollui laija twi hattah chutoh
kalhagao hangsan tah in kijot khom lhon tan.
22 Hiche jou chun sakol kengin leiset achon in,
Sisera sakol thupitah chu akinunkho jing jengin ahi.
23 ‘Meroz mite chu sapsetna changhen,’ tin Pakai Vantil ten aseije
nasatah in sapsetna changuhen tin asam’un ahi,
ajeh chu amaho galsat hattah hotoh kisatto dingin
Pakai langa pang dinga ahung pouvin ahi.
24 Numei lah a phatthei chang chungnung Ken mi Heber jinu Jael ahi.
Amanu hi numei ponbuh sung’a chengho jouse lah a nunnompen hen.
25 Sisera in twi anathum’in ahileh
aman bongnoi ana donsah e.
Mithupi tahho peh dinga kilom khon achun,
bongnoi ha tuitah achoipeh e.
26 Hiche jou chun akhut veilam'a ponbuh thih hemkhat achoijin
chule akhut jet lam'a natohna sehcha chu achoijin
hiche sehcha chun Sisera chu akhenin, aluchang akhenchip tai.
Aman hakhetnin akhenin angeichang chu akhen lhumtai.
27 Ama alhulhop jengin,
amanu kengphang kom'a chun akijam jeng'e.
Chuleh alhuh lhopna achun athiden tai.
28 Bangkot a kon chun Sisera nu ahung khodah in,
hiche bangkot a kon chun achapa hung kile ding chu galdot jing
pumin hitin aseije, “I-atile tugeija sakol kangtalai chu hung kilelou?
Itidan'a sakol kangtalai khogin tugeija kija louva ham?” ati.
29 “Numei ching theitah kilhamonna thucheng hin
avel vellin hiche thucheng hin ama le ama akidonbut in ahi.
30 'Amaho hi athil chomdoh uchu kihom'u hinte,
numei khat le ni pasal khat cheh changun te.
Sisera dingin ponjem hoitah tah gong’un tin,
chule ponjem hoitah a kikhong kei dingin jong hin gong’un te' ati.
Akichomdoh ho lah a chu alangtoa ponjem hoitah tah a
kikhong ho jong jao ding ahinai.
31 Pakai, nagal mite ho jouse Sisera te bangin thina toh cheh uhen!
Amavang nangma ngailu jouse chu nisa bangin thanei tah in khangtou jing tauhen!”
Hiti chun gamsunga kum 40 geijin chamna ana um'in ahi.