17
Micah Milim Doi Semthu
1 Phat khatnin Micah kiti pasal khat ana umin ama chu Ephraim thinglhang gamsunga chenga ahi.
2 Nikhat hi aman anu kom'ah hitin anaseije, “Mikhat in nasum dangka 1,100 anaguh jeh in nangin na-na samse tai ti kana jan ahi. Ven nasum gu achu keima kahi chuleh tun kakom'a aum'e” ati.
Anun adonbutnin, “Nang le nang na kiphon ahin Pathen'in phatthei naboh hen” ati.
3 Aman sum chu anu kom'a apelutnin ahileh anun hitin aseije “Tun keiman hiche sapsetna chu kachapa chunga achuh louna dingin keima tah in hiche sum chu Pakai kom'ah ka tohdoh tai. Hiche hi kilhajol'a milim doi khat semna a kimang ding ahi” ati.
4 Hitia chu aman sum chu anu khutna apehlut chun amanun dangka 200 chu alan dangka khengpa kom'ah apelut tan ahileh aman milim doikhat asemdoh tan ahi. Chuleh hiche chu Micah insung'ah akikoi tan ahi.
5 Micah hin hiche doi koina dinga hin doiphung khat atung doh in chuleh hiche doi houna ding ompho jong asem’in insunga ding phabep jong asemdoh in ahi. Hiche jou chun achate lah a khat chu ama changa din thempun apansah in ahi.
6 Hichelai phat sung chun Israel ten leng ana nei pouvin mipi ho chu amaho deidan danin ana kimang chauvin ahi.
7 Nikhat chun Judah gam Bethlehem a cheng gollhang khat ahung vahlutnin ahi.
8 Aman Bethlehem chu ahin dalhah a chenna ding holla ahung vale-le leh Ephraim thinglhang gam'a hi hung vahlut kha ahi. Hitia hi ahung vale-le nalam ahin Micah in na hin ahung vahlut khan ahi.
9 Micah in “Hoiya konna hung nahim?” tin ana dongin ahi.
Aman adonbutnin, “Kei hi Levi mi Judah gam Bethlehem'a konna hung kahin keima hi chenna ding mun holla hung kahi” ati.
10 Micah in, “Keikom'a hin um tan chutileh nang keima dinga mipa leh thempu nahi ding ahi” ati.
11 Levi mipa chu ana nom in, hiti chun hiche gollhangpa chu Micah chate khat tobangin aum tan ahi.
12 Hiti chun Micah in hiche Levi pa chu ama thempu in ana pansah in, ama jong Micah in'ah ana cheng tan ahi.
13 Micah in “Tunvang Pakaijin phatthei eiboh ding ahitai, ajeh chu keiman Levi khat thempu a eipan peh ding kanei tai” ati.