16
Samson In Gaza Khopi Kelkot Apohmang
1 Nikhat hi Samson Philistine khopi Gaza a chun achen numei chavai khattoh jan in aga lumkhom'in ahi.
2 Samson hikom'a aum chu akithangdoh loijin Gaza a um miho chu akikhomun khopi kelkot phunga chun angah khovah tauvin ahi. Amaho thipbeh chan aum’un, “Jingkah kho ahung vah-vah leh itha diu ahi” akitiuvin ahi.
3 Ahinlah Samson chu jankhang geijin bou jalkhun a chun alumin ahi. Hijou chun athoudoh in khopi kelkot chu akhom tenia apun Hebron lam ngat thinglhang vum'a apudoh in ahi.
Samson Le Delilah
4 Chomkhat jouvin Samson hi Sorek phaicham'a cheng Delilah kiti numei khat toh ahung kilungset in ahi.
5 Philistine vaipo ho chu amanu kom'a acheuvin hitin aga seijun ahi, “Samson hi jolin lang ipipen in ahatsah ham chuleh i-nakilo leh chatmo hel'a nakikan tum jou ding ham? Hitia chu nahin bol thei leh keiho mikhat cheh in dangka 1,100 kapeh diu ahi atiuve.
6 Hijeh chun Delilah in Samson kom'ah hitin aseije, “Ipi penin nang hi hibanga nahat sah ham chuleh i-nakilo leh chatmo hel'a nakikan tum jou ding ham lungsettah in nei seipeh in” ati.
7 Samson’in adonbutnin, “Keima hi gophel khao athahleh jang sagi in eikikan chah kheh henlang hileh katha lhasam’in tin midang bep-bep kahi ding ahitai” ati.
8 Hichun Philistine lamkai hon gophel khao athah cheh jang sagi ahin choipeh un, Hichea chun Delilah in Samson chu akanchah kheh in ahi.
9 Amanun a insung pindan sunga chu mi phabep asel ahin, hichun amanu apeng jah in, “Samson, Philistine te naman dingin ahung tauve!” atin ahi. Ahinla Samson chun gophel khaoho chu meiyin ahallhah bangin abot tan gamtan ahil. Hiti chun athahatna chu akimandoh jou tapon ahi.
10 Hiche jou chun Delilah in akom’ah aseijin, “Nangin nei dai chavaijin jouvin neibol'e! Tun lungsettah in nei seipeh in” ati.
11 Samson’in adonbutnin, “Kei hi khatveicha ana kimang cha khalou khaovin eikikan leh katha lhasam'in tin midang toh kabah ding ahitai,” atipeh e.
12 Hijeh chun Delilah in khatveicha ana kimang khalouhel khao thahbeh cheh in akantum’in ahi. Mi phabep khat chu amasa a banga chu indan sung khat a kisel uva ahi, avellin Delilah apeng jah kit in, “Samson, Philistine te naman dingin ahung tauve!” atin ahileh akikan na khao ho jouse chu patjang bangin atan gamtan ahi.
13 Hichun Delilah in aseijin, “Nangin nei dai chavaijin, jou jengin nei bol'e! Tunvang itileh chatmoa nakikan tum thei ding ham nei hetsah tan” ati.
Samson’in adonbutnin, “Nangman kaluchanga kasam ba-sagi hi pheh lechun katha hung lhasam in tin, midang bep-bep kahi ding ahitai,” ati.
14 Hiti chun a imut sungin Delilah in aluchanga asam basagi chu alom lommin aveijin chule abonchan thih khatnin akildet sohkeijin ajah a, “Vo Samson, Philistine mite naman dingin ahung tauve” ati. Samson ahung khah phatnin thihjang jong asam lom jong aban bodoh soh kittan ahi.
15 Hiche jou chun Delilah chun lung nommo tah in ahin seijin, “Nangin na thuguh bon nei seipeh nom louva iti danna kalungset e nati ham? Nangin thumvei jen nei dai chavaijin ipin nahatsah ham ti nei seipeh pon ahi!” ati.
16 Amanun niseh a hitia hi anano jinga asuhboi jing phat hin alungthim asuna lheh jengin athinom leu tan ahi.
17 Akhonna in athuguh ho chu ahin seidoh tai, kasam hi khatveicha kivou khaloulai ahi tin ahin phongdoh tai, “Kei hi kapen apatna Nazir hinkho mang dinga Pathen'a eina kitohdohsa kahitai. Kasam hi kivou henlang hileh ka thahat nan eidalhah ding ahitai, hiteng chuleh midang bep-bep kahi ding ahitai” ati.
18 Delilah in tuavang hi atahbeh eiseipeh ahitai ti ahet phatnin Philistine lamkai ho chu akou kittai, “Khatvei hungkit pou pouvun, tuvang hin atahbeh chu eiseipeh tai” ati. Hijeh chun Philistine lamkaiho chun sum ahin choijun akom'a ahungkit tauvin ahi.
19 Delilah chun Samson chu asam ba-sagi a kipheh chu avolhah sah in, hiti chun Samson chu imacha hilou asosah tan, athahat nan adalha tan ahi.
20 Hichun ama apeng jah in, “Samson, Philistine te naman dingin ahung tauve,” ati. Ama ahungkhah phatnin akingaiton, “Keima amasa bang bangin kei le kei kihuhdoh jou nange,” tin agelin ahi. Ahinla aman Pakaijin adalhah lam chu ana hetlou ahi.
21 Hiti chun Philistine ten aman’un amit teni akheodoh peh un Gaza lama apuijun hichea chun sum-eng thihkhaovin akannun songkulla ahen’un sumhei goijin apansah tauvin ahi.
22 Ahinlah chomkah louvin asam ahung kehdoh pan kittan ahi.
Samson Galjona
23 Philistine lamkai ten golvah loupitah khat aneiyun hichea chu pumgo thilto abolji uva asemthu pathen'u Dagon chu athangvah jiu ahi. Ama hon hitin aseijun, “Eiho pathen’in igalmi u Samson hi eiho khut ah eipe tauve” atiuve.
24 Mipi ten amu phat un amaho semthu pathen chu athangvah un hitin asei uve, “Eiho pathen’in igalmi pau eiho khut ah ahin pedoh tan ahi, igamsungu sumanga mi tamtah eithat pau chu tun eiho thaneina noijah aumtai” atiuve.
25 Amaho akham thim laitah un, “Samson chu hin puidoh un golnop bolnan neiju hite!” atiuve. Hichun Samson chu mipi nopsahna dingin songkul'a kon'in ahin puidoh tauvin, hiche inpi thah apanga khompi lencheh ni kikah a chun adinsah tauvin ahi.
26 Hichun Samson’in ama kailea pang chapangpa kom'a chun, “Hichea inpi theh a pang khomlen cheh ni kikah a chun nei dinsah in keiman kingainan nei jinge,” atin ahi.
27 Hiche inpi chu mi dimset jenga ahi. Philistine te milen milal jouse jong um uva ahin, chuleh hiche inchung dan a chun numei pasal aboncha uvin mi 3,000 jenin Samson chu golnop a avet u ahi.
28 Hichun Samson chu Pakai kom'ah ataovin, “Vo thanei tah Pakai keima hi neihin geldoh kitnin O Pathen, lungsettah in khatvei seh-seh neihin hatdoh sah kit in. Hiche khatvei thaneina chun Philistine ten kamit teni asuh chot u phu hi nei lahsah teijin” ati.
29 Hichun Samson’in hiche inpi theh a pang khompi teni a chun akhut teni chu akoiyin,
30 hichun Samson ataovin, “Hiche Philistine te hitoh thi tha tange” ati. Hichun athanei chasun’in asonin ahileh inpi chu ahung chimin Philistine milen milal ho leh asunga um mipi ho jouse chu aseplih tan ahi. Hiti chun hiche athi nikhoa atha ho chu adamlaija atha ho sangin atamjon ahi.
31 Hiche jou chun asopiho leh a insung miho along la dingin achesuh un, ama hon along chu agala uvin apa Manoah kivuina Zorah leh Esthtaol kikah ah chun avui tauve.