15
Samson In Philistine Te Aphulah
1 Khonungin, suhlou chang lhun phat in Samson’in kelchanou khat ajinu peh dingin ahin choijin ahungin ahi. Hichun aman aseijin, “Keima kajinu indan sunga che–ing ting galuppi ing kate,” atin ahinlah ajinu hingpa apan ana lutsah tapon ahi.
2 Numeinu pan ana seijin, “Keiman kagel'a chu nangman na jinu chu nadeilou mong-mong ahitai katia, nagol phapenpa kom'a aji ding'a kanapeh ahitai, ahinla ven anaonu hi amanu sanga hoijo louham, amahi kichenpi tan” atin ahi.
3 Samson in hitin aseije, “Tunvang Philistine te chunga itobang bol jongleng themmo taponge” ati.
4 Hijou chun apotdoh in Sial jathum aga man’in amei u akhit mat-mat un hiche akopto khat cheh chu meisel toh ahel kopmin ahi.
5 Hijou chun, meiyin ahallin Sial ho chu Philistine te loulai changphung lah a chun alhalut in ahi. Hiti chun chang ho chu aga le akung pummin ahallha jengin lengpithei leh Olive thing kisan’in ahallhah tha jengin ahi.
6 Philistine ho chun, “Hiche hi koibol bepseo hitam?” atiuvin ahileh
“Samson” ahi, Timnah mi apupa chun Samson jinu chu agol phapenpa toh kicheng dinga ana pehdoh jeh a abol ahi” atiuve. Hijeh chun Philistine te chu acheuvin numeinu nu le pa chu amandoh uvin meijah ahallih tauve.
7 Samson akihahsel'in “Nang hon hiche hi nabol jeh un nachung uva phu kalah tokah a kaki choldo louding ahi,” ati.
8 Hijeh chun aman lunghang tah in Philistine ho chu anokhumin mi tamtah athatnin ahi. Hiche jou chun ama achen Etam mun a songpi khat achun agacheng tan ahi.
9 Philistine ten alethuh un Judah gamsung'ah ngahmun asemun Lehi khopi kom geijin akithe jao jengun ahi.
10 Judah mipite chun Philistine ho chu adongun “Ipi bolla neihung delkhum uham?” atiuve.
Philistine ten adonbut un, “Keiho Samson man dinga hung kahiuve, aman keiho chunga thilse abol hi lethuh dinga kahung’u ahi,” atiuve.
11 Hichun Judah mite 3,000 chu Etam songpi ko hom'a um Samson chu gamandoh dingin achesuh un ahi. Ama hon Samson kom'a chun “Philistine te hin ichung uva vai ahom u ahi tihi nahet louham-kachung uva hi ipi bepseo nabol hitam?” atiuve.
Ahin Samson in adonbutnin “Ama hon kei chunga abol tobang bepma kalethuh ahi bouve” ati.
12 Judah mipi ho chun ama kom'a aseijun,” Keihon nangma hi kantum'a Philistine ho khut a pedoh dinga kahungu ahi,” atiuve.
Samson in aseijin, “Aphai ahinla nangho tah in neitha louna diuvin kitem un” atin
13 ama hon adonbut un “Keihon ka kantum uva Philistine khut a ka pehdoh diu ka thalou diu ahi.” Hijeh chun khao thah ni in akan'un songpi a konin ahin puidoh uvin ahi.
14 Samson chu Lehi ahunglhun phatnin Philistine ho chun noise tah in kholhang asam'un ahin delkhumun ahi. Ahinla Pakai lhagao chu thaneitah in Samson chunga ahung chun, akikanna khaoho chu meiyin patjang akahtan bangin atumtan gamtan ahi.
15 Hijou chun aman sangan khagu thah khat amun, hichu alan Philistine mi sangkhat hichea chun athat tan ahi.
16 Samson’in aseije,
“Sangan khagu mangchan
alom chang’in kajam'e!,
sangan khagu mangchan
mi sangkhat kathatnin ahi!” ati.
17 Aman ahanla sap chu achai phat in sangan khagu chu apaimang tan ahi. Hiche mun chu Khagu Mol akisah tan ahi.
18 Hijou chun ama adangchah lheh jengtan ahileh Pakai kom'ah akapjah jengin, “Nangin na lhachapa thahatna mangchan galjona loupitah neipe tan ahi. Tua hi dangchah a kathia hiche cheptan louho khutna hi kalou ding hitam?” ati.
19 Hijeh chun Pathen'in Mol a tolgolai chu apokeh sah in twi ahung kikhodoh jengtan ahi. Samson’in hichu adonin akido doh tan ahi. Hijeh chun hiche mun chu “Akapjahpa Twikhuh” asah un hichu tuni geijin Mol achun aum nalaiye.
20 Philistine ten gamsunga vai ana homlaijun Samson chu Israel te chungah kum somni thutan’in ana pangin ahi.