14
Samson Thulem
1 Nikhat hi Timnah khopia Samson aga chesuh leh, Philistine nungah khat ahin mudoh in ahi.
2 Inna ahung kile phatnin aman anu le apa kom'ah, “Timnah kho ah Philistine nungah khat kamun kadei lheh jengin ahi, ama khu kaji dingin eiga puipeh lhon'in,” ati.
3 Anu le apan anel lhon'in, “Eiho phunga numei umlou hija ahilouleh Israel te jouse lah a nakichenpi thei umlouhel'a hitam?” Amanin aseilhon'in, “Ipi dinga chep tanlou Philistine holah a ji naga kipui ding ham?” ati lhon'e.
Ahinlah Samson'in apa kom'ah “Neiga puipeh in, amanu khun kalung atoh lheh jenge” ati.
4 Hiche thilsoh hi Samson chu Philistine te toh akidouna dinga Pathen thilgon ahilam chu anu leh apan ahet lhon lou ahi. Ajeh chu hichea pat a hi Israel te chu Philistine te thaneina noija uma ahiuve.
5 Hiti chun Samson chu anu leh apa toh Timnah kho a achesuh un ahileh Timnah kho a lengpithei lei kom aphah uchun keipi bahkai gol khatnin poh phungin ahin ngih in ahi.
6 Hiche pettah chun Pakai Lhagao chun Samson chu poh phungin ahin hatdoh sah in ahileh, Samson in akhutkeo seh in akha ahin kaopeh in, min kelnou abolna bangin abol jengin ahi. Ahinlah aman thilsoh chu anu leh apa ana seipeh pon ahi.
7 Samson chu Timnah khopi alhun phat in hiche nungahnu chutoh akihoulim lhon'in ahileh amanun Samson chu alunglhai sah lheh jengin ahi.
8 Khonungin amanu chu kichenpi dingin Timnah kho achun aga kilekitnin ahileh lampam’a chun keipi bahkai thilong chu agahven ahileh hiche thilong sunga chun khoiju bom ana kaijin ahi.
9 Aman khoiju chu akhut in themkhat agah kheodoh in achepum pumin anen ahi. Aman anu le apa jong themkhat apen ahile amanin jong anelhon’in ahi. Ahinla aman keipi bahkai thilong sunga khoiju alahdoh chu aseipeh lhon pon ahi.
10 Apan kichenna dinga tohgon achai ding konna akisahlel laitah chun, Samson in Timnah kho a golvah khat abollin ahi, hichu hiche phat laija khangthah ho chonna ngai chu achepi ahi.
11 Mounu nu le pa chun Samson chu amu phatnin aloi agol dingin khopi sunga kon chun gollhang somthum agonpeh in ahi.
12 Samson’in amaho kom'a chun, “Nangho kom'ah thulem khat seijing ting nang hon hiche golvah nisagi sunga hi na seidoh thei uva ahileh keiman nangho tupat ponnem somthum leh golvah von somthum kapeh diu ahi,” ati.
13 “Ahinlah nang hon na seidoh theilou uleh nang hon tupat ponnem somthum leh golvah von somthum keima neipeh diu ahi,” ati.
Ama hon “Aphai kanom uve hiche thulem chu ipiham nei seipeh tauvin” atiuvin ahi.
14 Hiti chun aman aseitan ahi:
“Mi nepa a kon'in nehthei themkhat ahungdoh e,
mihatpa a kon'in alhumkei themkhat ahung doh e,” ati.
Nithum sungin ama hon hetdohtei ding ago uvin ahin ahedoh jou pouvin ahi.
15 Anili chanin Samson jinu kom'a chun, “Hiche thulem hi najipa a kon'in hetdoh tei hin gon achuti louleh napa in hi nang puma kahal lhah tha diu ahi. Nanghon hiche golvah a hi suhjum dinga neikou uham?” atiuve.
16 Hijeh chun Samson kom'a chun ajinu in mitlhi pumin aseijin, “Nang hin nei lungset ahipoi, nei vetda joh ahi bouve! Nangin kamite thulem khat nasei khumin ahinlah kei kom'ah aledohna ding nei seipeh poi” ati.
Aman adonbutnin, “Hiche ledohna hi kanu le kapa kom jenga jong ka seipeh lou ahi, nang kom'a iti ka seidoh ding ham?” ati.
17 Hiti chun golvah sunga chun amanun nei seipeh teijin tin akom'a akap jengin ahi. Ajonan nisagi channa in aman aledohna chu aseipeh tan ahi, ajeh chu amanun phat tinna asuhboi jing jeng ahi. Hichun amanun gollhangho kom'a chun aseipeh tan ahi.
18 Hijou chun nisagi channi nilhum masangin khopi miho chu ahungun
“Khoiju sanga lhumjo ipi um ding ham?
Keipi bahkai sanga hatjo ipi um ding ham?” atiuve.
Samson in adonbutnin,” Kabongla na manchah louvu hileh ka thulem chu hoiya nahet diu ham!” ati.
19 Hiche jou chun Samson chunga Pakai Lhagao chu thaneitah in achung’ah ahung chutan, ama Ashkelon khopia chun achesuh in, mi somthum aga thatnin anei hou ahin chomin athulem seidoh miho chu akitepna ponho chu aga petan ahi. Ahinla Samson chu hiche chung changa chun alung phamo lheh jengin a inlanga akile in anu le apa toh aum khom'un ahi.
20 Hijeh chun ajinu chu Samson golphapen pa kom'ah ana peuvin ana kichen sah tauvin ahi.