13
Samson Pen
1 Avellin Israel ten Pakai mitmun thilse jeng abol tauvin ahi. Hijeh chun Pakaijin amaho chu Philistine te khut ah apedoh tauvin ahileh ama hon kum 40 sungin asugenthei lheh jengun ahi.
2 Hiche nikholai hin Manoah kiti Dan phungmi khat Zorah khopi sungah ana chengin ahi. Ama jinu hin nao avop theipon chanei louvin aum lhon'in ahi.
3 Pakai vantil khat Manoah jinu kom'ah ahung kilah in hitin aseije, “Nangma chanei thei louhel'in umjong lechun tua hi gangtah a nao nahin vop ding chapa khat nahin ding ahi.
4 Hijeh chun chingtheijin, nangin ju hihenlang khamnathei dang ipi hijongleh don hihbeh in chuleh neh ding kijahda thil ho chu nehihbeh in.
5 Nangman nao hinvop in natin chapa khat nahin ding ahi, chuleh asam navopeh louhel ding ahi. Ajeh chu ama chu ahung pen a patna athi chan geija Nazir khat hina a Pathen'a kitohdoh ding ahi. Aman Philistine tea konna Israel te ahin huhdoh ding ahi,” ati.
6 Hichun hiche numeinu chu alhai jellin ajipa aga hetsah tan ahi, “Pathen mikhat kakom’ah ahung kilah in, ama chu Pathen vantil toh akilouvin, vet ding tijat umtah ahi. Hoiya hungkon ham ti kana dongpon aman jong amin eiseipeh pon ahi.
7 Ahinlah aman 'Nao nahin vop ding chapa khat nahin ding ahi'” ati. Jujong nadon louding khamnathei adang, ipi hijongleh nadon louding nehjong nanehlou ding ahi ati. Ajeh chu nachapa chu ahung penna patna athi nichan geija Nazir khat iding Pathenna kikatdohding ahi,” ati.
8 Hichun Manoah Pathen hengah ataovin aseitai, “Pakai, lungset tah in Pathen mipa chu avellin hungkit henlang ahung peng ding chapang chung chang chu eiseipeh behen” ati.
9 Pathen’in Manoah taona chu asangin avellin ajinu loulaija atoupetnin Pathen vantil chu ahung kilah kitnin ahi. Ahinla ajipa Manoah chu amanu kom'a ana umlou pet ahi.
10 Hijeh chun amanu chu gangtah in ajipa kom'a alhai jallin agaseipeh in, “Nikhatna kakom'a hung kilah a chu avellin ahung kit e” ati.
11 Manoah chu ajinu chutoh alelhaij'in adongtan ahi, “Nangma hi nikhatna kajinu kom'a hung kilah chu nahim?” tin ana dongin ahi.
Aman ahin donbut in “Kahi” ati.
12 Hijeh chun Manoah in hiti hin ana dong tai, “Na thusei chu ahung guilhun teng hiche chapang chun ipi atoh ding ham chuleh itobanga hinkho aman ding ham?” tin ana dong tai.
13 Pakai vantil chun ahin donbutnin, “Najinun atoh ding ka seipeh ho chu phatah a ajui ding ahi,
14 Amanun lengpithei twija kon poupou chu aneh louding chuleh ju hihenlang khamnathei adang itobang hijongleh adon louding chuleh athenglou pou-pou chu aneh louding ahi” ati.
15 Hiche jou chun Manoah in Pakai vantil kom'a chun aseije, “Lungsettah in keinin naneh ding kelnou khat kahin honlhon tokah in hiche ahin um tadin” ati.
16 Pakai vantil chun adonbutnin “Anaum nange” ahinlah ima kaneh louding ahi, hijeng jongleh Pakai kom'a kilhaina a pumgo thilto nabol thei lhon ding ahi” ati. (Manoah chun Pakai vantil chu Pakai ahilam ahetlou ahi).
17 Hichun Manoah in Pakai vantil kom'a chun “Namin ipi ham?” tin ana dongin ahi. Ajeh chu hiche ho jouse hi ahung guilhun tengleh keinin namin hi kajabol thei lhonna dingin” ati.
18 Pakai vantil chun adonbutnin, “Ipi dinga kamin neidoh ham? Nangin nahet dinga kidang val ding ahi” ati.
19 Hichun Manoah in kelnou khat toh lousohga themkhat toh ahin choijin song chunga chun Pakai kom'ah pumgo thilto din atohdoh lhon tan ahi. Chutia chu Manoah teni nupan avetpet lhon chun Pakai chun thil kidangtah aboldoh tan ahi.
20 Hichea maicham a konna meikong chu vanlanga akontou phat chun Pakai vantil jong chu meikong lah a chun akaltou tan ahi. Manoah leh ajinun hichu amu lhon phatnin abohkhup lhon'in jana apelhon tai.
21 Vantil chu Manoah te nupa kom'ah avellin ahung kilah kit tapon ahi. Hichun Manoah chun Pakai vantil chu Pakai ahi, ti ahedoh tai.
22 Aman ajinu kom'ah hitin aseije, “Eini ithi tei-tei ding ahitai ajeh chu einin Pathen imulhon tan ahi” akiti lhon tan ahi.
23 Ahinlah ajinun, “Pakai chun eitha lhon ding ahilah kelnou leh lhosoh ga chu sang ponte, ama eini kom'a jong hung kilah louding eini kom'a hitobang ho jong abol louding ahi” ati.
24 Achapa chu ahungso phatnin amanun jong amin Samson asahtai, chuleh ama chu ahung khanlet to kilhon'in Pakaijin phatthei aboh in ahi.
25 Ama Zorah leh Eshtaol khopi teni kikah a Mahaneh-dan mun a achen petnin Pakai Lhagaovin ama chu ahin hatdoh sah tan ahi.