12
Jepthah In Ephraim Chung’a Gal Abol
1 Hiche jou chun Ephraim mipi hon asepai teu achom khom'un Jordan vadung apal galkaijun Zaphon geijin acheuvin Jepthah kom'ah thupoleho thu athotnun hitin aseijun ahi, “Ammon mite toh kisat dinga nakon uva chu ipi dinga neihin koulou uham? Nang hi na intoh kahallhah tha ding nahi” atiuvin ahi.
2 Jepthah in amaho chu adonbut in, “Boina ahung kipat chun nangho kahin kou uve, ahinla nangho nahung pouvin ahi!
3 Hitia hi nangho nahung nomlou kahetdoh phatnin hinkho phalngam in nangho pang louvin galmun ahin kachen Pakaijin Ammon mite chunga hin galjona eipe tan ahi. Ahile tua hi ipi dinga keima to kisat dinga nahung jengu ham?” atin ahi.
4 Nangho Gilead mite hi imacha hilou Ephraim le Manesseh a konna jamdoh ho mai-mai nahilou uham?” atiuve. Hijou chun Jepthah in Gilead mite jouse chu aloikhom’in Ephraim mite chu akisatpin ajoutan ahi.
5 Jepthah in Jordan vadung palmun chu alonkhum’in Ephraim’a konna jamdoh khattou chu akinungle a hiche mun hi ahinpal gotleh Gilead miho chun “Ephraim phungmi nahim?” tin adong jiuvin, kahipoi atiuleh,
6 ama hon “Shibboleth” ti-in atiuvin, ama chu Ephraim mi ahileh “Shibboleth’’ ati diu ahi, ajeh chu Ephraim miten hiche thucheng hi adih a aseitheiji louvu ahi. Hiteng chuleh ama hon apuidoh uva Jordan kaimun’a chu atha jiu ahi. Hiche phat lai chun Ephraim te chu 42,000 ana thatnun ahi.
7 Jepthah in Israel te chunga ana vaihomna chu kum gup alhingin ahi. Ama athi chun Gilead gamsunga ama khopia anavui un ahi.
Ibzan Thutan Vaihom’a Ahungpan
8 Jepthah thinungin Bethlehem mi Ibzan chun Israel te chungah thutanin ana pangin ahi.
9 Aman chapa somthum leh chanu somthum ana neijin ahi. Aman achanu te chu ama phungmi hilou hotoh ana kichen sah in, chule achapa te jidingin midang chanute somthum ana kipuilutnin ahi. Ibzan chu Israel te chungah kum sagi thutanin apangin ahi.
10 Ama athip phatnin Bethlehem'ah ana vuijun ahi.
Elon Thutan Vaihom’a Ahungpan
11 Ibzan thi nungin Zebulun phungmi Elon'in Israel te chunga kum som thutanin ana pangin ahi.
12 Ama athiphatnin Zebulun gamsunga Aijalon’ah ana vuijun ahi.
Abdon Thutan Vaihom’a Ahungpan
13 Elon thijouvin Pirathon’a kon'in Hillel chapa Abdon’in Israel chunga thutanin ana pange.
14 Aman chapa somli, tupa somli ana neijin, amaho hi sangan som sagi chunga ana touvun ahi. Ama hi Israel chungah kum get thutanin ana pange.
15 Ama athi phatnin Amalek te thinglhang gam Ephraim sunga um Pirathon’ah ana vuijun ahi.